By ByndoorchiZalak, Pics: Lawrence Fernandes, 08 Dec 2024
ಬೈಂದೂರ್: ಕಥೊಲಿಕ್ ಸಭಾ ಉಡುಪಿ ಪ್ರದೇಶ್ (ರಿ). ಬೈಂದೂರ್ ಘಟಕಾ ಥಾವ್ನ್ ಫಿರ್ಗಜೆಚಾ ಪ್ರತಿಭಾವಂತ್ ಭುರ್ಗ್ಯಾಂಕ್ ಪ್ರತಿಭಾ ಪುರಸ್ಕಾರ್ ಆನಿ ಭಾಷಣ್ ಸ್ಪರ್ಧ್ಯಾಂತ್ ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟ್ಚೆ ಕಾರ್ಯಕ್ರಮ್ ಆಯ್ತಾರಾ, ದಸೆಂಬರ್ 8 ತಾರೀಕೆರ್ ಫಿರ್ಗಜೆಚಾ ಮಿನಿ ಹೊಲಾಂತ್ ಚಲ್ಲೆಂ. ಕಾರ್ಯಕ್ರಮಾಚೆ ಅಧ್ಯಕ್ಷ್ ಜಾವ್ನ್ ಫಿರ್ಗಜ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ, ಮುಕೆಲ್ ಸಯ್ರೆಂ ಜಾವ್ನ್ ಕುಂದಾಪುರ್ ಆನಿ ಬೈಂದೂರ್ ತಾಲೂಕ್ ನಗರ ಯೋಜನ ಪ್ರಾಧಿಕಾರಾಚೊ ಅಧ್ಯಕ್ಷ್ ವಿನೋದ್ ಕ್ರಾಸ್ತಾ, ಕಥೊಲಿಕ್ ಸಭಾ ಕುಂದಾಪುರ್ ವಾರಾಡ್ಯಾಚೆ ಅಧ್ಯಕ್ಷ್ ವಿಲ್ಸನ್ ಆಲ್ಮೇಡಾ, ಫಿರ್ಗಜೆಚೊ ಸಹಾಯಕ್ ವಿಗಾರ್ ಬಾ| ಜೊಸ್ವಿನ್ ಪಿರೇರಾ, ಫಿರ್ಗಜ್ ಮಂಡಳಿ ಉಪಾದ್ಯಕ್ಷ್ ಸ್ಟೀಫನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, 21 ಆಯೋಗಾಚಿ ಸಂಯೋಜಕಿ ಅನಿತಾ ನಜ್ರೆತ್ ವೆದಿಚೆರ್ ಹಾಜರ್ ಆಸ್‍ಲ್ಲಿಂ. ಭುರ್ಗಿಂ ಶಿಕ್ಷಿತ್ ಜಾವ್ನ್ ಸಮಾಜ್ ಸೆವಾ ದಿಲ್ಯಾರ್ ಆಮ್ಚೊ ಗಾಂವ್ ಅಭಿವೃದ್ಧಿ ಜಾಂವ್ಕ್ ಕಾಂಯ್ಚ್ ಕಷ್ಟ್ ಜಾಂವ್ಚೆನಾ, ಆಮಿ ಆಮ್ಚೆಂ ಖಾತಿರ್ ಜಿಯೆಂವ್ಚೆ ಪ್ರಾಸ್ ಹೆರಾಂ ಖಾತಿರ್ ಜಿಯೆಂವ್ಚೆ ಮುಖ್ಯ್ ಉದ್ದೇಶ್ ಜಾವ್ನಾಸೊಂಕ್ ಜಾಯ್ ಮ್ಹಣ್ ವಿನೋದ್ ಕ್ರಾಸ್ತಾನ್ ಸಂದೇಶ್ ದಿಲೊ.
ಭಲಾಯ್ಕೆಚಾ ಶೆತಾಂತ್ ನರ್ಸ್ ಜಾವ್ನ್ ಲೊಕಾಂಚಿ ಸೆವಾ ದಿಂವ್ಚ್ಯಾ ವಿಲ್ಮಾ ರೆಬೆರೊಕ್ ಸನ್ಮಾನ್ ಕೆಲೆಂ. ಪಿ.ಯು.ಸಿ., ಡಿಗ್ರಿ ಆನಿ ಸ್ನಾತಕೋತ್ತರ್ ಪದ್ವಿ ಶಿಕ್ಷಣಾಂತ್ ಉತ್ತಮ್ ಅಂಕ್ ಜೊಡ್‍ಲ್ಲ್ಯಾ ವಿದ್ಯಾರ್ಥಿಂಕ್ ಪ್ರಶಸ್ತಿ ಪತ್ರ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಪುರಸ್ಕಾರ್ ಕೆಲೆಂ. ಕಥೊಲಿಕ್ ಸಭಾ ಬೈಂದೂರ್ ಘಟಕಾನ್ ಮಾಂಡುನ್ ಹಾಡ್‍ಲ್ಲ್ಯಾ ಭಾಷಣ್ ಸ್ಪರ್ಧ್ಯಾಂತ್ ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟ್ಲೆ.
ಕಾರ್ಯಕ್ರಮಾಕ್ ಕಥೊಲಿಕ್ ಸಭಾ ಅಧ್ಯಕ್ಷ್ ಪ್ರದೀಪ್ ಫೆರ್ನಾಂಡಿಸಾನ್ ಸ್ವಾಗತ್ ಕೆಲೆಂ, ಕಾರ್ಯದರ್ಶಿನ್ ಧನ್ಯವಾದ್ ಪಾಟಯ್ಲೆಂ ಆನಿ ಆಶಾ ಲೋಬೊನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
