By ByndoorchiZalak, 18 Aug 2024
ಬೈಂದೂರ್: ಅಗೋಸ್ತ್ 18 ತಾರೀಕೆರ್ ಫಿರ್ಗಜೆಂತ್ ರಾಷ್ಟ್ರೀಯ್ ಯುವಜಣಾಂಚೊ ದೀಸ್ ಆಚರಣ್ ಕೆಲೆಂ. ಯುವಜಣಾಂ ಖಾತಿರ್ ಸಕಾಳಿಂ ಸಾಕ್ರಮೆಂತಾಚೆ ಆರಾಧಾನ್ ಆನಿ ಸರ್ವ್ ಫಿರ್ಗಜ್ ಲೊಕಾಂ ಸಾಂಗಾತಾ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊನ್ ಸಂಭ್ರಮೀಕ್ ಮೀಸಾಚೆ ಬಲಿದಾನ್ ಭೆಟಯ್ಲೆಂ. ICYM ಆನಿ YCS ಯುವಜಣಾಂನಿ ಮಿಸಾಚಿ ಲಿತುರ್ಜಿ ಚಲವ್ನ್ ವ್ಹೆಲೆಂ. ಉಪ್ರಾಂತ್ ಸಮುದಾಯ್ ಭವನಾಂತ್ ಮಾಂಡುನ್ ಹಾಡ್‍ಲ್ಲ್ಯಾ ಕಾರ್ಯಕ್ರಮಾಂತ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ, ಬ್ರ| ಜೊಸ್ವಿನ್ ಪಿರೇರಾ, ಕೊವೆಂತಾಚಿ ಧರ್ಮ್ ಭಯ್ಣ್ ಸಿ| ಜ್ಯೋತಿ, ಪಿರ್ಗಜ್ ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಸ್ಟೀಫನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, ವಿವಿಧ್ ಆಯೋಗಾಚಿ ಸಂಚಾಲಕಿ ಅನಿತಾ ನಜ್ರೆತ್, ಸಚೇತಕ್ ಪ್ರದೀಪ್ ಫೆರ್ನಾಂಡಿಸ್ ವೆದಿಚೆರ್ ಹಾಜರ್ ಆಸ್‍ಲ್ಲಿಂ. ವಿಗಾರಾಂನಿ ರಾಷ್ಟ್ರೀಯ್ ಯುವಜಣಾಂಚೊ ದೀಸ್ ಆಚರಣ್ ಕರ್ಚ್ಯಾ ಸಂದರ್ಭಿ ಸರ್ವ್ ಯುವಜಣಾಂಕ್ ಸಂದೇಶ್ ಪಾಟಯ್ಲೆಂ. ಬ್ರ| ಜೊಸ್ವಿನ್ ಪಿರೇರಾನ್ ಚಾಲ್ತ್ಯಾ ಕಂಪ್ಯೂಟರ್ ತಾಂತ್ರಿಕ್ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಚಾಲ್ತ್ಯಾ ಜಿವಿತಾಂತ್ ವಾಪಾರ್ ಹ್ಯಾ ವಿಶ್ಯಾಂತ್ ಮಾಹೆತ್ ಆನಿ ವಿವಿಧ್ ಖೆಳ್ ಚಲವ್ನ್ ವ್ಹೆಲೆಂ.
ಕಾರ್ಯಕ್ರಮಾಕ್ ಹಾಜರ್ ಜಾಲ್ಲ್ಯಾಂಕ್ ಆನಿ ಆಧಾರ್ ದಿಲ್ಲ್ಯಾ ಸರ್ವಾಂಕ್ YCS ಅಧ್ಯಕ್ಷ್ ಶನಲ್ ಫೆರ್ನಾಂಡಿಸಾನ್ ಧನ್ಯವಾದ್ ಪಾಟಯ್ಲೆಂ ಆನಿ ನಿಕೋಲಾ ಡಾಯಸಾನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
