By ByndoorchiZalak, 07 July 2024
ಬೈಂದೂರ್: ಕುಟ್ಮಾಂ ಆಯೋಗಾ ತರ್ಫೆನ್ ಆಯ್ತಾರಾ, ಜುಲಾಯ್ 7 ತಾರೀಕೆರ್ ಕಾಜಾರಿ ಜೊಡ್ಯಾಂಚೊ ದೀಸ್ ಆಚರಣ್ ಕೆಲೆಂ. ಸಕಾಳಿಂ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ ಸಾಂಗಾತಾ ಸರ್ವ್ ಕಾಜಾರಿ ಜೊಡ್ಯಾಂನಿ ಆನಿ ಫಿರ್ಗಜ್ ಲೊಕಾನ್ ಸಂಭ್ರಮೀಕ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ.
ಉಪ್ರಾಂತ್ ಫಿರ್ಗಜೆಚಾ ಮಿನಿ ಹೊಲಾಂತ್ ಚಲ್‍ಲ್ಲ್ಯಾ ಕಾರ್ಯಕ್ರಮಾಂತ್ ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಹಾಜಾರ್ ಜಾಲ್ಲ್ಯಾ ಉಡುಪಿ ದಿಯೆಸೆಜ್ ಕುಟ್ಮಾಂ ಆಯೋಗ್ ದಿರೆಕ್ತೊರ್ ಲೆಸ್ಲಿ ಆರೋಜಾನ್ ಕಾಜಾರಿ ಜಿವಿತಾಂತ್ ಉಬ್ಜೊಂಚೆ ವಿವಿಧ್ ಸಮಸ್ಸ್ಯೆಂ ಆನಿ ಪರಿಹಾರ್ ಹ್ಯಾ ವಿಷಯಾಚೆರ್ ಮಾಹೆತ್ ದಿಲೆಂ ಆನಿ ಕಾಜಾರಿ ಜಿವಿತಾಂತ್ ಆಸ್ಚೆಂ ಶ್ಹೆಳೆಂಪಣ್ ಆನಿ ದುಬಾವ್ ಪಯ್ಸ್ ಕರುನ್ ಕಾಜಾರಿ ಜಿವಿತ್ ನವೀಕೃತ್ ಕರ್ನ್ ಮೋಗ್ ದಿಂವ್ಕ್-ಮೋಗ್ ಘೆಂವ್ಕ್ ಎಕಾಮೆಕಾ ಸೊಸ್ಣಿಕಾಯೆನ್ ಆಯ್ಕೊಂಕ್, ಸೊಡ್ದೊಡ್ ಕರ್ನ್ ಜಿಯೆವ್ನ್ ಏಕ್ ಆದರ್ಶ್ ಕುಟಾಮ್ ಬಾಂದುನ್ ಹಾಡುಂಕ್ ಸರ್ವ್ ಕಾಜಾರಿ ಜೊಡ್ಯಾಂಕ್ ಉಲೊ ದಿಲೊ.
ಕಾರ್ಯಕ್ರಮಾಂತ್ ವಿಗಾರ್ ವಿನ್ಸೆಂಟ್ ಕುವೆಲ್ಲೊ, ಫಿರ್ಗಜ್ ಉಪಾಧ್ಯಕ್ಷ್ ಸ್ಟೀಫನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, ವೀಸ್ ಆಯೋಗಾಚಿ ಸಂಚಾಲಕಿ ಅನಿತಾ ನಜ್ರೆತ್ ಆನಿ ಕುಟ್ಮಾಂ ಆಯೋಗಾಚೊ ಸಂಚಾಲಕ್ ರೊಬರ್ಟ್ ರೆಬೆಲ್ಲೊ ವೆದಿಚೆರ್ ಹಾಜರ್ ಆಸ್‍ಲ್ಲಿಂ.
ಕಾರ್ಯಕ್ರಮಾಕ್ ಕುಟ್ಮಾಂ ಆಯೋಗಾಚೊ ಸಂಚಾಲಕ್ ರೊಬರ್ಟ್ ರೆಬೆಲ್ಲೊ ಸ್ವಾಗತ್ ಕೆಲೆಂ, ಜ್ಯೋತಿ ನಜ್ರೆತಾನ್ ಧನ್ಯಾವಾದ್ ಪಾಟಯ್ಲೆಂ ಆನಿ ವೀಣಾ ಫೆರ್ನಾಂಡಿಸಾನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
