ಮನ್ಶ್ಯಾಚಿ ಚಾಲ್, ಮನ್ಶ್ಯಾಚಿ ಜಿಣ್ಯೆ ರೀತ್ ಬದಲ್ಲ್ಯಾ ಹರ‍್ಯೇಕ್ ಘಡಿಂ ಸಂತೊಸ್‍ಚ್ ಆಸಾಜಾಯ್ ಮ್ಹಣ್ ಚಿಂತೊನ್ ದೂಕ್ ವಾವೊಂವ್ಕ್ ತಯಾರ್ ನಾತ್‍ಲ್ಲೊ ಮನಿಸ್ ಹೆರಾಂಚಾ ಕುಮ್ಕೆಕ್ ಕಿತ್ಲೊ ಆಧಾರ್ ಜಾಯ್ತ್? ಸಾಮಾಜಿಕ್ ಆನಿ ಆರ್ಥಿಕ್ ಸಮಸ್ಸ್ಯಾಂನಿ ಆಜ್ ಜಾಯ್ತಿಂ ಭಾವ್-ಭಯ್ಣಿಂ ವೊದ್ದಾಡ್ತಾನಾ ತಾಂಚಿ ಚೂಕ್ ಸೊಧುನ್ ಕೊಂಕುನ್ ತಾಂಚಿ ಖೆಳ್ಕುಳಾ ಕರುನ್ ಸಂತೊಸ್ ಪಾಂವ್ಚಿ, ಆಪುಣ್ ಆಪ್ಣಾಕ್ ಮ್ಹಣೊನ್ ಫುಡೆಂ ಚಲ್ಚ್ಯಾ ಲೊಕಾಂಕ್ ಅವಿನ್ ಡಾಯಸ್ ಆಪ್ಲ್ಯಾ ಲೇಖನಾಂತ್ ದಿಲ್ಲ್ಯಾ ಲಾತೆನ್ ಭಾಶೆಚೆ ಶಿರೊನಾಂವಾಕ್ (ತಕ್ಲೆಂ ನಾಂವ್) ಸಮಾಸಮ್ ಜಾವ್ನಾಸಾತ್ ಮ್ಹಣ್ತಾ. ಅಸಲ್ಯಾ ಮನ್ಶ್ಯಾಕ್ ಜಾಗ್ವಣಿಂ ದೀವ್ನ್ ಚುಕೊನ್ ಪಡ್ಲೆಲ್ಯಾ ಆನಿ ಕಷ್ಟಾಂತ್ ಆಸ್‍ಲ್ಲ್ಯಾ ಲೊಕಾಂಚಾ ಗರ್ಜಾಂಕ್ ಪಾಂವ್ಚೆ ನೀಜ್ ಕ್ರಿಸ್ತಾಂವ್ಪಣಾಚೊ ಅರ್ಥ್ ಹ್ಯಾ ಲೇಖನಾಂತ್ ಆಟಾಪ್ಲ್ಯಾ.
ಅವಿನ್ ಡಾಯಸ್, ಮೀರಾ ರೋಡ್, ಕೊಂಕ್ಣಿ ಬರವ್ಪಿ ಅಶೋಕ್ ಡಾಯಸಾಚೊ ಪೂತ್ ಜಾವ್ನಾಸಾ. ಬೊಂಬಯಾಂತ್ ವಾಡೊನ್ ವ್ಹಡ್ ಜಾಲ್ಲೊ ತರ್ನಾಟೊ ಅವಿನಾಕ್ ಕೊಂಕ್ಣಿ ಭಾಶೆಚಿ ಅಭಿರೂಚ್ ಆನಿ ಹೆಂ ಲೇಖನ್ ಬರಂವ್ಚಿ ವೊಡ್ನಿ ಆಯಿಲ್ಲಿಂ ವ್ಹಡಾ ಅಭಿಮಾನಾಚಿ ಜಾವ್ನಾಸಾ.
Audi, Vide, Tace (ಆಯ್ಕ್, ಪಳೆಂ ಆನಿ ವೊಗೊಚ್ ರಾವ್)
ಎಕಾ ಗಾವಾಂತ್ 25 ವರ್ಸಾಚೊ ಎಕ್ ಯುವಕ್ ಆಸ್ಲೊ. ತೊ ಸಗ್ಳ್ಯಾಂಕ್ ಬೋವ್ ಮೊಗಾಳ್, ಆಪ್ಲ್ಯಾ ಸೆಜಾರ‍್ಯಾಂಕ್ ಜಾಂವ್ ವಾ ವಾಟ್ಸುರ‍್ಯಾಂಕ್ ಜಾಂವ್ ಗರ್ಜ್ ಆಸ್‍ಲ್ಲ್ಯಾ ಸಗ್ಳ್ಯಾಂಕ್ ಕುಮಕ್ ಕರ್ತಾಲೊ. ಥೊಡ್ಯಾ ತೆಂಪಾನ್ ತಾಚಿ ಆವಯ್ ಅಂತರ್ಲಿ. ಬಾಪಯ್ ತೊ ಲ್ಹಾನ್ ಆಸ್ತಾನಾಂಚ್ ದೆವಾಧಿನ್ ಜಾಲ್ಲೊ ಆನಿ ತಾಂಕಾ ದೊಗಾಂಯ್ಕಿ ತೊ ಏಕ್ಲೊಚ್ ಪೂತ್. ಆವಯ್ಚ್ಯಾ ಮರ್ಣಾ ಉಪ್ರಾಂತ್ ತೊ ಘರಾಂತ್ ಎಕ್ಸುರೊ ಜಾಲೊ. ಆಪ್ಲೆಂ ದೂಕ್ ಪಯ್ಸ್ ಕರುಂಕ್ ಮ್ಹಣ್ ತೊ ಆಪ್ಲ್ಯಾ ಇಷ್ಟಾಂಕ್ ಆಪ್ಲ್ಯಾ ಘರಾಂ ಆಪಯ್ತಾಲೊ. ತ್ಯಾ ಇಷ್ಟಾಂ ಸಾಂಗಾತಾ ತೊ ಮಸ್ತ್ ಸಂತೊಸ್‍ಭರಿತ್ ಜಾಲೊ. ತಾಚಾ ಇಷ್ಟ್ಯಾಂನಿ ತಾಕಾ ವಾಯ್ಟ್ ಸಂವೊಯಾಂಚಿ ವಳೊಕ್ ಕರುನ್ ವಾಯ್ಟ್ ವೊಡ್ನ್ಯಾಂಚಿ ಗುಲಾಮ್ ಕರ್ನ್ ದವರ್ಲೊ. ಎಕಾ ವರ್ಸಾಂ ಆದಿಂ ಸರ್ವಾಂಕ್ ಕುಮಕ್ ಕರ್ಚೊ, ಹಾಸೊನ್-ಖೆಳೊನ್ ಆಸ್‍ಲ್ಲೊ ಯುವಕ್ ಅತಾಂ ಅಮಾಲ್-ಪಿವೊಣ್ಯಾಂಚೊ ಗುಲಾಮ್ ಜಾವ್ನ್ ಸರ್ವಾಂ ಥಾವ್ನ್ ಪಯ್ಸ್ ಗೆಲೊ. ಸೊರ‍್ಯಾಚಾ ಆಂಗ್ಡಿಂತ್ ಬಸೊನ್ ಮಾಗ್ಣೆಂ-ರಜಾರ್ ಸೊಡುನ್, ಇಗರ್ಜೆಕ್ ಮೀಸಾಕ್ ವಚಾನಾತ್‍ಲ್ಲ್ಯಾ ತಾಕಾ ಲೋಕ್ ದುರ್ಸೊನ್ ಹಾಸೊಂಕ್ ಲಾಗ್ಲೊ. ಪುಣ್ ಎಕ್ಸುರಿಂ ಜಿಣಿಂ ಜಿಯೆತೆಲ್ಯಾ ತಾಕಾ ಸಮ್ಜೊಂಕ್ ಜಾಂವ್, ಉಲಂವ್ಕ್ ಜಾಂವ್ ಖಂಚಾಯ್ ಎಕಾ ಮನ್ಶ್ಯಾನ್ ಬರೆಂ ಮನ್ ದಾಕಂವ್ಕ್ ನಾ, ಬದ್ಲಾಕ್ ತಾಚಿ ಖೆಳ್ಕುಳಾಂ ಕರುನ್ ಆಮ್ಕಾಂ ಕೀತ್ಯಾಕ್ ತಾಚಿ ಖಬರ್, ತಿ ತಾಚಿ ವಯುಕ್ತಿಕ್ ಜಿಣಿಂ ಆಮಿ ಕೋಣ್ ತಾಚಿ ವಾಟ್ ದಾಕಂವ್ಕ್ ತಾಚೆ ಲಾಗಿಂ ಉಲಂವ್ಚೆ ವ್ಯರ್ಥ್ ಮ್ಹಣ್ ಲೋಕ್ ಚಿಂತುಂಕ್ ಲಾಗ್ಲೊ.
ಆಯ್ಚ್ಜ್ಯಾ ಸಂಸಾರಾಂತ್ ಅಶೆಂಚ್ ಘಡ್ತೆ ಆಸಾ. ಲಾತೆನ್ ಭಾಶೆಂತ್ ಏಕ್ ವಾಕ್ಯ್ ಆಸಾ “Audi, Vide, Tace” ತಶೆಂ ಮ್ಹಳ್ಯಾರ್ ’ಆಯ್ಕ್, ಪಳೆಂ ಆನಿ ವೊಗೊಚ್ ರಾವ್” ಆಜ್ ಆಮಿ ಹ್ಯಾಚ್ ಚಿಂತ್ಪಾಂ ಥಂಯ್ ಭಾಗಿಧಾರ್ ಜಾತೆಂ ಆಸಾಂವ್. ಆಮ್ಚ್ಯಾ ಸಮಾಜೆಂತ್, ಶ್ಹೆರಾಂತ್, ಗಾಂವಾಂತ್ ಕಿತ್ಲೊಸೊ ಲೋಕ್ ಆಜ್ ಆಪ್ಲ್ಯಾ ಜಿಣ್ಯೆಂತ್ ಕಷ್ಟಾತಾತ್. ಅಮಾಲ್ ಪಿಯೊಣ್ಯಾಂಕ್ ಲಬ್ದೊನ್ ಘೊವ್-ಬಾಯ್ಲಾಂ ಮಧೆಂ ಝಗ್ಡೆಂ, ಪ್ರಾಯೆಸ್ತ್-ಪಿಡೆಸ್ತ್ ಆವಯ್ ಬಾಪಯ್ಕ್ ಪಯ್ಸ್ ಕೆಲ್ಲಿಂ ಭುರ್ಗಿಂ ಅಶೆಂ ಜಾಯ್ತ್ಯಾ ಸಮಸ್ಯಾಂನಿ ಭರೊನ್ ಆಸ್ಚೆಂ ಆಮ್ಚ್ಯಾ ಭೊವಾಂರಿ ಜಾಯ್ತೆಂ ಆಸಾತ್ ಪುಣ್ ತಾಂಕಾ ಕುಮಕ್ ಕರ್ತಾಲೊ ಕೊಣ್ಂಚ್ ನಾ. ಜೆಜುನ್‍ಂಚ್ ಸಾಂಗ್ಲಾ ಆಪ್ಣಾಚೊ ಕಸೊ ಮೋಗ್ ಕರ್ತಾಯ್ ತಸೊಚ್ ಪೆಲ್ಯಾಚೊ ಮೋಗ್ ಕರ್. ಆಮಿ ಆಮ್ಚೊ ಅನಿ ಆಮ್ಚ್ಯಾ ಕುಟ್ಮಾಚೊ ಮೋಗ್ ಆಮಿ ಬರ್ಪೂರ್ ಕರ್ತಾಂವ್. ಪುಣ್ ಆಪ್ಲ್ಯಾ-ಪೆಲ್ಯಾ ಸೆಜಾರ‍್ಯಾಚೊ ಕಿತ್ಲೊ ಮೋಗ್ ಕರ್ತಾಂವ್? ಸೆಜಾರ‍್ಯಾಂಚೊ ಫಕತ್ ನತಾಲಾಂಚಾ ಪರ್ಬೆ ವೆಳಾರ್ ಕುಸ್ವಾರ್ ವಾಂಟುನ್ ನ್ಹಂಯ್, ಬಗಾರ್ ವರ್ಸಾಚಾ 365 ದಿಸಾಂ ಕಷ್ಟಾಂತ್ ಆಸ್‍ಲ್ಲ್ಯಾಂಕ್ ಕುಮಕ್ ಕರುನ್ ತಾಂಚಾ ಸುಖಾಂತ್ ತಶೆಂ ದುಖಾಂತ್ ವಾಂಟೊ ಘೆಂವ್ಚೆ. ಲ್ಹಾನ್, ಲ್ಹಾನ್ ಬರ‍್ಯಾ ಕರ್ನ್ಯಾಂನಿ ತಾಂಕಾ ಸಾಂಗಾತ್ ದಿಲ್ಯಾರ್ ಆಮಿ ಖಂಡಿತ್ ಏಕ್ ನೀಜ್ ಕ್ರೀಸ್ತಾಂವ್ ಜಾತಲ್ಯಾತ್. ಆಪ್ಲ್ಯಾ ಪೆಲ್ಯಾಂಚೊ ಮೋಗ್ ಕರಿನಾತ್ ತರ್ ಆಮಿ ಕರ್ಚಿಂ ತಿಂ ಮಾಗ್ಣಿಂ, ಭೆಟಂವ್ಚೆ ಮೀಸ್, ಕರ್ಚಿಂ ನೊವೆನಾಂ, ಭಾಗ್ ಘೆಂವ್ಚೆ ರೆತಿರ‍್ಯೊ ವ್ಹರ್ಥ್. ಕೊಲ್ಕೊತ್ತಾಚಿ ಜಿವಿ ಸಾಂತಿಣ್ ಮದರ್ ತೆರೆಸಾ ಮ್ಹಣ್ತಾಂ ’ಮಾಗ್ಣ್ಯಾಂಚಾ ವೊಂಟಾ ಪ್ರಾಸ್ ಕುಮಕ್ ಕರ್ಚೆಂ ಹಾತ್ ಭಾಗಿ ಜಾವ್ನಾಸಾ’. ಆಮ್ಚ್ಯಾ ಸರ್ವಾಂಚಾ ಖಾಂದ್ಯಾರ್ ಜಿಣ್ಯೆಂತ್ಲ್ಯಾ ಸಮಸ್ಸ್ಯಾಂಚೊ ಖುರಿಸ್ ಆಸಾ. ಆಪಾಪ್ಲೊ ಖುರಿಸ್ ಘೆವ್ನ್ ಜಿಣ್ಯೆಚಿ ವಾಟ್ ಚಲ್ತನಾ ಜಾಯ್ತ್ಯೊ ಆಡ್ಕಳ್ಯೊ ಆಮ್ಕಾಂ ಯೆತಾನಾ ಖುರಿಸ್ ವಾವೊಂವ್ಕ್ ಹೆರಾಂಕ್ ಉಲೊ ಮಾರ್ತಾಂವ್ ತೆಂಚ್ ಪರಿಂ ಹೆರಾಂಚೊ ಖುರಿಸ್ ವಾವೊಂವ್ಕ್ ಆಮಿ ಕುಮಕ್ ಕೆಲೆಂ ತರ್ ಆಮಿ ಕ್ರೀಸ್ತಾಚೆ ಖರೆಂ ಪಾಟ್ಲಾವ್ದಾರ್ ಜಾಂವ್ಕ್ ಪಾವ್ತೆಲ್ಯಾತ್. ಆಮಿ ಕ್ರೀಸ್ತಾಚೆ ಪಾಟ್ಲಾವ್ದಾರ್ ಮ್ಹಣೊನ್ ಖಾಲಿ ಮಿಸಾಕ್ ವೆಚೆಂ, ದಿಸ್ಪೊಡ್ತಿಂ ಮಾಗ್ಣೆಂ ಕೆಲ್ಯಾರ್ ಪಾವಾನಾಂ, ಕ್ರೀಸ್ತಾಂವ್ ಸಮುದಾಯೆಚೊ ಮುಖ್ಯ ಉದ್ದೇಶ್ ಮೋಗ್ ಆಪ್ಲಾಂವ್ಚೊ ನ್ಹಂಯ್ ಬದ್ಲಾಕ್ ಪೆಲ್ಯಾಂಕ್ ಮೋಗ್ ದಿಂವ್ಚೊ. ಪೆಲ್ಯಾಂಚೊ ಮೋಗ್ ಕರಿಜಾಯ್ ಮ್ಹಣ್ ಯಾಜಕ್ ಸೆರ್ಮಾಂವಾ ವೆಳಾರ್ ಸಾಂಗ್ತಾನಾ ಥೊಡಿಂ ಉರ್ಬೆನ್ ಪೆಟ್ತಾತ್ , ಪೆಲ್ಯಾಂಕ್ ಕುಮಕ್ ಕರ್ಚೆಂ ಥಿರ್ ನಿರ್ಧಾರ್ ಕರ್ತಾತ್, ಪುಣ್ ಘರಾಂ ಪಾಂವ್ಚೆ ಆದಿಂಚ್ ಸಗ್ಳಿಂ ಉರ್ಬಾ ನಿಂವೊನ್ ವೆತಾ. ಹೆರಾಂನಿ ಪೆಲ್ಯಾಂಚೊ ಸೆವಾ ಕರ್ತಾನಾ ವಾ ತ್ಯಾ ವಿಶಿಂ ಆಯ್ಕತಾನಾ ತಿಂ ಕರ್ನಿಂ ಸುಲಭ್ ಮ್ಹಣ್ ದಿಸ್ತಾ, ಜರ್ ಆಮಿ ಹೆರಾಂಚಿ ಸೆವಾ ಕರುಂಕ್ ಲಾಗ್ಲ್ಯಾಂವ್ ತರ್ ವೆವೆಗ್ಳೆಂ ಕಷ್ಟ್ ಆಮ್ಕಾಂ ಯೆತಾತ್. ನಿರ್ಗತಿಕಾಂಚಾ ಸೆವೆಂತ್ ಜರ್ ಮದರ್ ತೆರೆಸಾ ಆಡ್ಕಳಿ ಆಸಾತ್ ಮ್ಹಣ್ ಭಿಯೆಂವ್ಕ್ ನಾ, ಪಾಟಿಂ ಸರೊಂಕ್ ನಾ ಕ್ರೀಸ್ತಾಚೆ ಖರೆಂ ಪಾಟ್ವಾವ್ದಾರ್ ಜಾವ್ನ್ ಜಿಯೇವ್ನ್ ಸೆವಾ ಕರುಂಕ್ ಲಾಗ್ಲಿಂ. ಪೆಲ್ಯಾಂಚೊ ಮೋಗ್ ಕರುಂಕ್, ಸೆವಾ ಕರುಂಕ್ ನತಾಲಾಂಚೊ ಕಾಳ್ ವಾ ಪ್ರಾಚಿತಾಚೊ ಕಾಳ್ ಮಾತ್ರ್ ಆಮಿ ಜಾಗೆ ಜಾಂವ್ಚೆನಾಕಾ, ಜರ್ ಆಮಿ ಥಿರ್ ನಿರ್ಧಾರ್ ಕೆಲ್ಯಾರ್ ಸರ್ವ್ ಸಂದರ್ಭಾನಿ ಗರ್ಜೆವಂತ್ ಕುಮಕ್ ಸದಾಂಚ್ ಕರ‍್ಯೆತ್. ಜೆಜು ಮ್ಹಣ್ತಾ ಸತ್‍ಚ್ ಹಾಂವ್ ತುಮ್ಕಾಂ ಸತ್ ಸಾಂಗ್ತಾ ; ’ಜೆಂ ಕಿತೆಂ ತುಮಿ ಹ್ಯಾ ಮ್ಹಜ್ಯಾ ಅತೀ ಲ್ಹಾನಾ ಭಾವಾಂ ಮಧ್ಲ್ಯಾ ಎಕ್ಲ್ಯಾಕ್ ಕಿತೆಂ ತುಮಿ ಕುಮಕ್ ಕೆಲೆಂ, ತೆಂ ಮ್ಹಾಕಾಚ್ ತುಮಿ ಕೆಲೆಂ’. ಆಮ್ಚೆಂಚ್ ಲ್ಹಾನ್-ಲ್ಹಾನ್ ಕಷ್ಟ್ ವ್ಹಡ್ ಮ್ಹಣೊನ್ ಆಮ್ಚ್ಯಾಚ್ ರಾಟವಳಿರ್ ಬುಡೊನ್ ಆಸ್ತಾನಾ ಇಲ್ಲೆಂ ಭೊವಾಂರಿ ಪಳೆಯಾತ್ ಆಮ್ಚ್ಯಾಕೀ ಚಡ್ ಕಷ್ಟಾಂನಿ ವಳ್ವಳ್ಚೆಂ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಜರ್ ಆಮಿ ತಾಂಕಾ ಕುಮ್ಕೆಚೊ ಹಾತ್ ದಿಲೊ ತರ್ ಬರ‍್ಯಾ ಸಾಮಾರಿಯಾಗಾರಾಂ ಬರಿಂ ಆಮಿ ಜಾಂವ್ಕ್ ಪಾವ್ತೆಲ್ಯಾಂವ್.