By ByndoorchiZalak, Pics: Lawrence Fernandes, 07 Jan 2024
ಬೈಂದೂರ್: ಕಥೊಲಿಕ್ ಸಭಾ ಉಡುಪಿ ಪ್ರದೇಶ್ (ರಿ). ಬೈಂದೂರ್ ಘಟಕಾ ಥಾವ್ನ್ ಫಿರ್ಗಜೆಚಾ ಪ್ರತಿಭಾವಂತ್ ಭುರ್ಗ್ಯಾಂಕ್ ಪ್ರತಿಭಾ ಪುರಸ್ಕಾರ್ ಆನಿ ಭಾಷಣ್ ಸ್ಪರ್ಧ್ಯಾಂತ್ ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟ್ಚೆ ಕಾರ್ಯಕ್ರಮ್ ಆಯ್ತಾರಾ, ಜನೆರ್ 7 ತಾರೀಕೆರ್ ಫಿರ್ಗಜೆಚಾ ಮಿನಿ ಹೊಲಾಂತ್ ಚಲ್ಲೆಂ.
ಕಾರ್ಯಕ್ರಮಾಚೆ ಅಧ್ಯಕ್ಷ್ ಜಾವ್ನ್ ಫಿರ್ಗಜ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ, ಮುಕೆಲ್ ಸಯ್ರೆಂ ಜಾವ್ನ್ ಕಥೊಲಿಕ್ ಸಭಾ ಕುಂದಾಪುರ್ ವಾರಾಡೊ ಅಧ್ಯಕ್ಷ್ ವಿಲ್ಸನ್ ಆಲ್ಮೇಡಾ, ಪ್ರತಿಭಾ ಪುರಸ್ಕಾರ್ ಕಾರ್ಯಕ್ರಮಾಚೆ ಪೋಷಕ್ ಸೆಲಿನ್ ಫೆರ್ನಾಂಡಿಸ್, ಕೊವೆಂತಾಚಿ ವ್ಹಡಿಲ್ನ್ ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ಟೀಫನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್ ಆನಿ 20 ಆಯೋಗಾಚಿ ಸಂಚಾಲಕಿ ಅನಿತಾ ನಜ್ರೆತ್ ವೆದಿಚೆರ್ ಹಾಜರ್ ಆಸ್‍ಲ್ಲಿಂ.
ಧಾವಿ, ಪಿ.ಯು.ಸಿ., ಡಿಗ್ರಿ ಆನಿ ಸ್ನಾತಕೋತ್ತರ್ ಪದ್ವಿ ಶಿಕ್ಷಣಾಂತ್ ಉತ್ತಮ್ ಅಂಕ್ ಜೊಡ್‍ಲ್ಲ್ಯಾ ವಿದ್ಯಾರ್ಥಿಂಕ್ ಪ್ರಶಸ್ತಿ ಪತ್ರ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಪುರಸ್ಕಾರ್ ಕೆಲೆಂ. ಕಥೊಲಿಕ್ ಸಭಾ ಬೈಂದೂರ್ ಘಟಕಾನ್ ಮಾಂಡುನ್ ಹಾಡ್‍ಲ್ಲ್ಯಾ ಭಾಷಣ್ ಸ್ಪರ್ಧ್ಯಾಂತ್ ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟ್ಲೆ.
ಜಿಲ್ಲಾ ಹಂತಾರ್ ಕಬಡ್ಡಿ ಖೆಳಾಂತ್ ವಿಶೇಸ್ ಸಾಧನ್ ಕರುನ್ ರಾಜ್ಯ್ ಹಂತಾಚಾ ಕಬಡ್ಡಿ ಪಂದ್ಯಾಟಕ್ ಭಾಗ್ ಘೆಂವ್ಚ್ಯಾ ನಿಹಾಲ್ ರೊಡ್ರಿಗಸ್ ಆನಿ ಜಿಲ್ಲಾ ಹಂತಾರ್ Mono Acting ಸ್ಪರ್ಧ್ಯಾಂತ್ ದುಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾ ಆಶಾ ಡಾಯಸಾಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಪಾಟಯ್ಲೆಂ.
ಕಾರ್ಯಕ್ರಮಾಕ್ ಅಧ್ಯಕ್ಷ್ ಜೊಸ್ಪಿನ್ ರೊಡ್ರಿಗಸಾನ್ ಸ್ವಾಗತ್ ಕೆಲೆಂ, ಕಾರ್ಯದರ್ಶಿ ಜ್ಯೋತಿ ಲೋಬೊನ್ ಧನ್ಯವಾದ್ ಪಾಟಯ್ಲೆಂ ಆನಿ ಆಶಾ ಲೋಬೊನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
