By ByndoorchiZalak, Pics: Lawrence Fernandes, 08 September 2023
ಬೈಂದೂರ್: ಮರಿಯೆ ಮಾಯೆಚೆ ಜಲ್ಮಾಂ ಪರಬ್ ಆನಿ ಕುಟ್ಮಾಚೆ ಫೆಸ್ತ್ ಮೊಂತಿ ಫೆಸ್ತಾಚೊ ಸಂಭ್ರಮ್ ಆಜ್ ಸಕಾಳಿಂ ಸರ್ವ್ ಫಿರ್ಗಜ್ ಲೊಕಾನ್ ವ್ಹಡಾ ಸಂಭ್ರಮಾನ್ ಆಚರಣ್ ಕೆಲೆಂ. ಸಕಾಳಿಂ ಇಗರ್ಜೆ ಇಸ್ಕೊಲಾಂತ್ ಸರ್ವ್ ಫಿರ್ಗಜ್ಗಾರಾಂ ಸಾಂಗಾತಾ ಮೆಳೊನ್ ಶೆತಾಂತ್ ಜಾಲ್ಲೆಂ ನವೆಂ ಬೆಳೆಂ ಭಾತಾಚೆಂ ಕಣ್ಶ್ಯೊಂ ವಿಗಾರಾನ್ ಬೆಂಜಾರ್ ಕರುನ್ ದೆವಾಕ್ ಅರ್ಗಾಂ ಪಾಟಯ್ಲೆಂ. ಬಾಳೊಕ್ ಮರಿಯೆಕ್ ಹೊಗಳ್ಸುನ್ ಲ್ಹಾನಾ ಭುರ್ಗ್ಯಾಂನಿ ಫುಲಾಂ ಅರ್ಪಣ್ ಕೆಲೆಂ. ಉಪ್ರಾಂತ್ ಇಗರ್ಜೆ ಇಸ್ಕೊಲಾಂ ಥಾವ್ನ್ ಇಗರ್ಜೆಕ್ ಪುರ್ಶ್ಯಾಂವ್ ಕರುನ್ ದೇವ್ ಮಂದಿರಾಂತ್ ಸಂಭ್ರಮೀಕ್ ಮೀಸಾಚೆ ಬಲಿದಾನ್ ಭೆಟಯ್ಲೆಂ. ಸಂಭ್ರಮೀಕ್ ಬಲಿದಾನಾಂತ್ ಪ್ರಧಾನ್ ಯಾಜಕ್ ಜಾವ್ನ್ ಕಾರ್ಮೆಲಿತ್ ಯಾಜಕ್ ಬಾ| ಜೊಸ್ಸಿ ಡಿ’ಸೋಜಾ ಆನಿ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ ಸಾಂಗಾತಾ ಸರ್ವ್ ಫಿರ್ಗಜ್ ಲೊಕಾನ್ ಮೀಸಾಚೆ ಬಲಿದಾನ್ ಭೆಟಯ್ಲೆಂ. ಬಾ| ಜೊಸ್ಸಿ ಡಿ’ಸೋಜಾನ್ ಕೆನಾರಾ ಕ್ರೀಸ್ತಾವಾಂಚಾ ಬಂಧಡೆ ಉಪ್ರಾಂತ್ ವಿವಿಧ್ ಜಾಗ್ಯಾಂನಿ ಶಿಂಪ್ಡೊನ್ ಗೆಲ್ಲ್ಯಾ ಆಮ್ಚ್ಯಾ ಪುರ್ವಜಾಂನಿ ಆಪ್ಲೊ ಭಾವಾರ್ಥ್ ಘಟ್ಟ್ ಸಾಂಬಾಳ್ಳೊ ಆನಿ ಪರತ್ ಸಾಂಗಾತಾ ಮೆಳೊನ್ ಪಯ್ಲೆಂ ಫೆಸ್ತ್ ಜಾವ್ನ್ ಶೆತಾಂತ್ ಜಾಲ್ಲ್ಯಾ ನವ್ಯಾ ಬೆಳ್ಯಾಕ್ ದೆವಾಕ್ ಅರ್ಗಾಂ ದೀವ್ನ್ ಮೊಂತಿ ಫೆಸ್ತ್ ಆಚರಣ್ ಕೆಲೆಂ. ಹ್ಯಾ ವೆಳಾಂ ತೆರ್ಸಾ ಮುಕಾಂತ್ರ್ ಮರಿಯೆ ಮಾಯೆಚಾ ಭಕ್ತಿಪಣಾನ್ ತಾಂಚೊ ಭಾವಾರ್ಥ್ ಆನಿ ಸಾಂಗಾತ್ ಸಾಂಬಾಳ್ಳೆ. ತಾಂಚಾ ಭಾವಾರ್ಥಾನ್ ಆಜ್ ಆಮಿ ಆಮ್ಚ್ಯಾ ಕುಟ್ಮಾಂತ್ ಮರಿಯೆ ಮಾಯೆಕ್ ಮಾನ್ ದೀವ್ನ್ ಕುಟ್ಮಾಚೆಂ ಫೆಸ್ತ್ ಆಚರಣ್ ಕರ್ತಾಂವ್ ತರ್ ಆಮ್ಚ್ಯಾ ಕುಟ್ಮಾಂತ್ ಆನಿ ಪರ್ಗಾವಾಂತ್ ವಾವ್ರ್ ಕರುನ್ ಎಕ್ಸುರ್ಪಣಾಚಾ ಚಿಂತ್ನಾಂನಿ ಜಿಯೆತೆಲ್ಯಾ ಆಮ್ಚ್ಯಾ ಸಾಂದ್ಯಾಂಕ್ ಆನಿ ವ್ಹಡಿಲಾಂಕ್ ಸಾಂಗಾತ್ ದಿಂವ್ಯಾ, ಧಯ್ರಾಧಿಕ್ ಸ್ತ್ರೀ ಮರಿಯೆ ಮಾಯೆಚೊ ಆದರ್ಶ್ ಘೆವ್ನ್ ಕುಟ್ಮಾಂತ್ ಎಕ್ವಟ್ ಸಾಂಬಾಳ್ಯಾ ಮ್ಹಣ್ ಆಪುರ್ಬಾಯೆಚೊ ಪ್ರಸಂಗ್ ದಿಲೊ.
ಮೀಸಾ ಉಪ್ರಾಂತ್ ಮೊಂತಿ ಫೆಸ್ತಾಕ್ ಆಧಾರ್ ದಿಲ್ಲ್ಯಾ ಸರ್ವಾಂಚೊ ವಿಗಾರಾನ್ ಉಪ್ಕಾರ್ ಬಾವುಡ್ಲೊ.
