By ByndoorchiZalak, Pics: Lawrence Fernandes, 19 Feb 2023
ಬೈಂದೂರ್: ಫಿರ್ಗಜ್ ಪೆಸ್ತಾ ಉಪ್ರಾಂತ್ ಭಾಗೆವಂತ್ ಖುರ್ಸಾಕ್ ಅರ್ಗಾಂ ಜಾವ್ನ್ ಚಾರಿತ್ರಿಕ್ ಪವಿತ್ರ್ ಖುರ್ಸಾ ಗುಡ್ಯಾರ್ ಅರ್ಗಾಂ ಮೀಸ್ (ಖುರ್ಸಾ ಗುಡ್ಯಾಚೆ ಫೆಸ್ತ್) ಆನಿ ಖುರ್ಸಾ ಗುಡ್ಯಾರ್ ಆಸಾ ಕೆಲ್ಲೆಂ ನವ್ಯಾ ಯೋಜನಾಚೆ ಉಗ್ತಾವಣ್ ಕಾರ್ಯಕ್ರಮ್ ಆಯ್ತಾರಾ ಸಾಂಜೆರ್ ಚಲ್ಲೆಂ. ಖುರ್ಸಾ ಗುಡ್ಯಾರ್ ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊಚಾ ಮುಕೆಲ್ಪಣಾರ್, ದಾನಿಂಚಾ ಆರ್ಥಿಕ್ ಕುಮ್ಕೆನ್ ಸಂಪೂರ್ಣ್ ಜಾಲ್ಲೆಂ ಯೋಜನ್ ಖುರ್ಸಾ ಗುಡ್ಯಾ ಫೆಸ್ತಾಚಾ ಸಂಭ್ರಮೀಕ್ ಬಲಿದಾನಾಕ್ ಪ್ರಧಾನ್ ಯಾಜಕ್ ಜಾವ್ನ್ ಹಾಜರ್ ಜಾಲ್ಲ್ಯಾ ಮಾ| ಬಾ| ರಿಚರ್ಡ್ ಕುವೆಲ್ಲೊನ್ (Director, Father Muller Hospital, Mangalore) ಉಗ್ತಾವಣ್ ಕೆಲೆಂ ಆನಿ ಪವಿತ್ರ್ ಉದ್ಕಾನ್ ಅಶೀರ್ವಚನ್ ಕರುನ್ ಪವಿತ್ರ್ ಕೆಲೆಂ. ಬಾ| ರಿಚರ್ಡ್ ಕುವೆಲ್ಲೊ ಆನಿ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ ಸಾಂಗಾತಾ ಸರ್ವ್ ಲೊಕಾಂನಿ ಭಾಗೆವಂತ್ ಖುರ್ಸಾ ಅರ್ಗಾಂ ಪಾಟವ್ನ್ ಭಕ್ತಿಪಣಿಂ ಸಂಭ್ರಮೀಕ್ ಮೀಸಾಚೆ ಬಲಿದಾನ್ ಭೆಟಯ್ಲೆಂ. ರಾಗ್, ದ್ವೇಷ್, ಫಾರಿಕ್ಪಣಾ ಬದ್ಲಾಕ್ ಮೋಗ್ ಆನಿ ಭೊಗ್ಸಣೆಂ ದಿಂವ್ಕ್ ಖುರ್ಸಾರ್ ಜೊಡ್‍ಲ್ಲ್ಯಾ ಜೆಜುನ್ ಸಗ್ಳ್ಯಾ ಮನ್ಶ್ಯಾಕುಳಾಚಾ ಮೊಗಾನ್ ದಿಲ್ಲೊ ಸಂದೇಶ್ ಜಾವ್ನಾಸಾ ಮ್ಹಣ್ ಬಾ| ರಿಚರ್ಡ್ ಕುವೆಲ್ಲೊನ್ ಆಪ್ಲ್ಯಾ ಸೆರ್ಮಾವಾಂತ್ ಸಂದೇಶ್ ದಿಲೆಂ.
ಖುರ್ಸಾ ಗುಡ್ಯಾಚಾ ನವ್ಯಾ ಯೋಜನಾಕ್ ಆರ್ಥಿಕ್ ದಾನ್ ದಿಲ್ಲ್ಯಾ ಪ್ರಮುಕ್ ಪೋಷಕ್ ಫಾವೊಸ್ತಿನ್ ಫೆರ್ನಾಂಡಿಸ್, ರೀಟಾ ಒಲಿವೆರಾ ಕುಟ್ಮಾಕ್, ವಿಲ್ಸನ್ ನಜ್ರೆತ್ ಆನಿ ಹೇರ್ ದಾನಿಂಕ್ ಮಾನಾಚಿ ವಾತ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ವಿಗಾರಾನ್ ಮಾನ್ ಪಾಟಯ್ಲೆಂ. ನವ್ಯಾ ಯೋಜನಾಚೆ ವಿನ್ಯಾಸ್ ನಿರ್ಮಾಣ್ ಕೆಲ್ಲ್ಯಾ ಲೊರೆನ್ಸ್ ಪಿಂಟೊಕ್ ಮಾನಾಚಿ ವಾತ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ.
ಅರ್ಗಾಂ ಮೀಸಾ ಉಪ್ರಾಂತ್ ಭಾಗೆವಂತ್ ಖುರ್ಸಾಕ್ ಆರಾಧಾನ್ ಕರುನ್ ಸಮೇಸ್ತ್ ಭಕ್ತಿಕಾಂನಿ ಖುರ್ಸಾಚಾ ರೆಲಿಕೆಚಿ ಆಶೀರ್ವಾದ್ ಜೊಡುನ್ ಘೆತ್ಲೆಂ.
