ಬೈಂದೂರ‍್ಚಿಝಳಕ್ ಅಂತರ್ಜಾಳಿಕ್ ಧಾವ್ಯಾ ವರ್ಸಾಚೊ ಸಂಭ್ರಮ್

ಬೈಂದೂರ‍್ಚಿಝಳಕ್... ದಿಂವ್ಚ್ಯಾಕ್ ಬೈಂದೂರ‍್ಚಿ ವೊಳೊಕ್... ಧಾ ವರ್ಸಾಂ ಆದಿಂ ನವೆಂಬರ್ 25, 2012 ತಾರೀಕೆರ್ ತವಳ್ಚೊ ವಿಗಾರ್ ಮಾ| ಬಾ| ಫ್ರಾನ್ಸಿಸ್ ಕರ್ನೆಲಿಯೊನ್ ಫಿರ್ಗಜ್ ಆಂತರ್ಜಾಳ್ ಬೈಂದೂರ‍್ಚಿಝಳಕ್ ಲೋಕಾರ್ಪಣ್ ಕೆಲ್ಲೊ ದೀಸ್ ಜಾವ್ನ್ ಬೈಂದೂರ‍್ಚಿಝಳಕ್ ಆಂತರ್ಜಾಳಿಕ್ ಆಜ್ ಧಾವ್ಯಾ ವರ್ಸಾಚೊ ಸಂಭ್ರಮ್.

ನಿರಂತರ್ ಧಾ ವರ್ಸಾಂ ಥಾವ್ನ್ ಬೈಂದೂರ‍್ಚಿಝಳಕ್ ಚಲೊನ್ ತೃಪ್ತಿ ಲಾಭ್‍ಲ್ಲಿಂ ಖುಶಿ ಜಾವ್ನ್ ಆಜ್ 10 ವರ್ಸಾಂ ಸಂಪವ್ನ್ 11ವ್ಯಾ ವರ್ಸಾಕ್ ಮೇಟ್ ದವರ್ತನಾ ಇಲ್ಲೆಶೆಂ ಭೊಗ್ಣಾಂ ತುಮ್ಚೆಂ ಮಧೆಂ ವಾಂಟುನ್ ಘೆವ್ಯಾಂ ಮ್ಹಣ್ ಭೊಗ್ಲೆಂ.
ಬೈಂದೂರ‍್ಚಿಝಳಕ್... ದಿಂವ್ಚ್ಯಾಕ್ ಬೈಂದೂರ‍್ಚಿ ವೊಳೊಕ್... ಫಿರ್ಗಜ್ ಅಂತರ್ಜಾಳಿಚಾ ಘೋಷಣಾಕ್ ಸರಿ ಜಾವ್ನ್ ಬೈಂದೂರ್ ಫಿರ್ಗಜ್ ಆನಿ ಸೊಭಿತ್ ಸುಂದರ್ ಬೈಂದೂರಾಚಿ ಪರಿಚಯ್ ಬೈಂದೂರ‍್ಚಿಝಳಕ್ ಅಂತರ್ಜಾಳಿ ಥಾವ್ನ್ ದಿಲ್ಲಿಂ ಸಂತೃಪ್ತಿ ಜಾಲ್ಯಾ. ಸುರ್ವಾತ್ ಜಾಲ್ಲ್ಯಾ ದಿಸಾಂ ಥಾವ್ನ್ ತವಳ್ಚೊ ವಿಗಾರ್ ಮಾ| ಬಾ| ಫ್ರಾನ್ಸಿಸ್ ಕರ್ನೆಲಿಯೊ, ಉಪ್ರಾಂತ್ಲೆ ವಿಗಾರ್ ಮಾ| ಬಾ| ರೊನಾಲ್ಡ್ ಮಿರಾಂದ ಆನಿ ಪ್ರಸ್ತುತ್ ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊ, ಫಿರ್ಗಜ್ ಗೊವ್ಳಿಕ್ ಮಂಡಳಿ, ಪಿರ್ಗಜ್ ಸಂಘ್-ಸಂಸ್ಥೆ, ಗಾಂವಾಂತ್ ತಶೆಂ ಪರ್ಗಾವಾಂತ್ ಆಸ್‍ಲ್ಲ್ಯಾ ಫಿರ್ಗಜ್ ಲೊಕಾನ್ ಆನಿ ಹಿತಚಿಂತಕ್ ಜಾವ್ನ್ ಸಹಕಾರ್ ಬರ್ಪೂರ್ ಮೆಳ್ಳ್ಯಾ ಆನಿ ಅಂತರ್ಜಾಳಿಕ್ ಪೋಷಕ್ ಜಾವ್ನ್ ಸಹಕಾರ್ ದಿಲ್ಲ್ಯಾ ಪೋಷಕಾಂಕ್ ಬೈಂದೂರ್ಚಿಝಳಕ್ ಧಾವ್ಯಾ ವರ್ಸಾಚಾ ಸಂದರ್ಭಾರ್ ಸರ್ವಾಂಚೊ ಉಪ್ಕಾರ್ ಆಟವ್ನ್ ಅಭಾರಿ ಜಾವ್ನ್ ಮಾನ್ ಪಾಟಯ್ತಾ.
30-32 ವರ್ಸಾಂ ಆದಿಂ ಮ್ಹಾಕಾ ಇಲ್ಲೆಂ ಕೊಂಕ್ಣಿ ಸಾಹಿತ್ಯ್ ಆನಿ ಇಲ್ಲೆಂ ಸೊಭಿತ್ ಅಕ್ಷರಾಂನಿ ಬರಂವ್ಚೆ ಹವ್ಯಾಸ್ ಆಸೊನ್ ಫಿರ್ಗಜೆಚಾ ಯುವ ಸಂಘಟನಾಂತ್ ಆಸ್ತಾನಾ ಸಂಘಟನಾಚಾ ಯುವಜಣಾಂನಿ ಬರಯಿಲ್ಲೆಂ Notice Boardರ್ ಚಿಡ್ಕಾಂವ್ಚೆ ಆನಿ ತಾಕಾ ಏಕ್ ಬರೆಂ ಸೊಭಿತ್ Title ದಿಂವ್ಚೆ ಹವ್ಯಾಸ್ ಆಸ್‍ಲ್ಲೆಂ. ಮಾಗಿರ್ ಫುಡಾರಾಚಾ ರಾಟವಳಿಂತ್ ತಿಂ ಸಗ್ಳಿಂ ಮಾಯಾಗ್ ಜಾವ್ನ್, ಉಪ್ರಾಂತ್ BCA Facebook Groupರ್ ಬೈಂದೂರ್ ಫಿರ್ಗಜ್ಗಾರಾಂಕ್ ಸಾಂಗಾತಾ ಜಮವ್ನ್ ಗಾವಾಂತ್ ಆನಿ ಪರ್ಗಾವಾಂತ್ ಆಸ್‍ಲ್ಲ್ಯಾ ಫಿರ್ಗಜ್ಗಾರಾಂಕ್ ಏಕಾಮೆಕಾಚಿ ವೊಳೊಕ್-ಝಳಕ್ ದಿಂವ್ಚಿ ಆಶಾ ಉದೆತಾನಾ ಚಡಿತ್ ಜಾವ್ನ್ ಗಾಂವ್ಚೆ ವಿಷಯ್ ಆಶಾರ್-ಪಾಶಾರ್ ಜಾತಲೆಂ ಆನಿ ತವಳ್ಚೊ ವಿಗಾರ್ ಮಾ| ಬಾ| ಫ್ರಾನಿಸ್ ಕರ್ನೆಲಿಯೊನ್ ಫಿರ್ಗಜೆಂತ್ ಜಾಂವ್ಚ್ಯಾ ಘಡಿತಾಂಚಿ ತಸ್ವೀರ್ ಪರ್ಗಾವಂತ್ ಆಸ್‍ಲ್ಲ್ಯಾ ಫಿರ್ಗಜ್ಗಾರಾಂಕ್ ಪಳೆಂವ್ಕ್ ಅವ್ಕಾಸ್ ಜಾಯ್ಜಯ್ ಮ್ಹಣ್ ತಾಣಿಂ ಸಲಹಾ ದಿತಾನಾ, ಫಿರ್ಗಜೆಚಿ News ಪರ್ಗಟ್ ಕರುಂಕ್ ಫೆಸ್ಬುಕಾರ್ ಸುರು ಜಾಲ್ಲೆಂ ಎಕಾ ಥರಾಂಚಿ Craze ಮ್ಹಣ್ಯೆತ್, ಅಶೆಂ ಬೈಂದೂರ್ಗಾರಾಂಕ್ ಏಕ್ ಅಂತರ್ಜಾಳ್ ಆಸ್ಲ್ಯಾರ್ ಬರೆಂ ಮ್ಹಣ್ ಚಿಂತ್ತಾನಾ ಫಿರ್ಗಜ್ ಅಂತರ್ಜಾಳ್ ಆರಂಭ್ ಕರುಂಕ್ ಧಾ ವರ್ಸಾಂ ಪಯ್ಲೆಂ ತಾಲೆಂತಾಂನಿ ಭರ್‌ಲ್ಲೆಂ ಉರ್ಬೆವಂತ್ ತರ್ನಾಟೆಂ ಕ್ಲಿಂಟನ್ ಡಿ’ಸೋಜಾ ಆನಿ ದೆ| ನೆವಿಲ್ ಫೆರ್ನಾಂಡಿಸ್ ಹಾಂಚೆ ಥಾವ್ನ್ ಪ್ರಸ್ತಾವನ್ ಯೆತಾನಾ ಹಾಂವೆ ಖುಶೆನ್ ಹ್ಯಾ ಅಂತರ್ಜಾಳಿಚೆ ಸುಂಕಾಣ್ ಹಾತಿ ಧರುನ್ ಅಂತಾರ್ಜಾಳಿಕ್ ಜಾಯ್ ಆಸ್ಚೆ ಅವ್ಪಚಾರಿಕ್ ನಿಯಮಾಂ ಸವೆಂ ಆರಂಭ್ ಕರುನ್ ಬೈಂದೂರ‍್ಚಿಝಳಕ್ ಅಂತರ್ಜಾಳ್ ಡಿಸೈನರ್ ಕ್ಲಿಂಟನಾಚಾ ಆಕರ್ಷಕ್ ವಿನ್ಯಾಸಾನ್, ನೇವಿಲಾಚಿ ಸಲಹಾ ಸೂಚನಾಂ ಸವೆಂ ಆರಂಭ್ ಜಾಲ್ಲೆಂ ಹೆಂ ಅಂತರ್ಜಾಳ್ ಆಜ್ ಧಾ ವರ್ಸಾಂ ಸಂಪ್ತಾನಾ ಖುಶಿ ಜಾಂವ್ಚ್ಯಾ ಸಂಗೀ ಸುರ್ವಾತ್ ಕರುಂಕ್ ಸಾಂಗಾತ್ ದಿಲ್ಲೊ ನೇವಿಲ್ ಆಜ್ ಆಮ್ಚೆಂ ಮಧೆಂ ನಾ ಮ್ಹಳ್ಳೆಂ ಬೆಜಾರಾಯ್ ಭೊಗ್ತಾಂ ಹ್ಯಾ ಸಂದರ್ಭಿ ಪರತ್ ನೇವಿಲಾಚೊ ಉಗ್ಡಾಸ್ ಕಾಡುನ್ ಬೈಂದೂರ‍್ಚಿಝಳಕ್ ನೇವಿಲಾಚಾ ಆತ್ಮ್ಯಾಕ್ ಶಾಂತಿ ಮಾಗೊನ್ ಶೃದ್ಧಾಂಜಲಿ ಪಾಟಯ್ತಾ.
ಪ್ರಮುಕ್ ಜಾವ್ನ್ ಆಪ್ಲ್ಯಾ ಕಾಮಾಚಾ ರಾಟವಳಿಂ ಮಧೆಂ ಫಿರ್ಗಜೆಂತ್ ಜಾಂವ್ಚ್ಯಾ ಹರ‍್ಯೇಕಾ ಸಂಭ್ರಮಾಚೆ ತಸ್ವೀರ್ ಸಂಗ್ರಹ್ ಕರುನ್ ದಿಲ್ಲೊ ಫಿರ್ಗಜ್ ಮಾಧ್ಯಮ್ ಅಯೋಗಾಚೊ ಸಂಚಾಲಕ್ ಆನಿ ಬೈಂದೂರ‍್ಚಿಝಳಕ್ ಪ್ರತಿನಿಧಿ ಲೊರೆನ್ಸ್ ಫೆರ್ನಾಂಡಿಸಾಕ್ ಕಾಳ್ಜಾಂ ಥಾವ್ನ್ ಉಪ್ಕಾರ್ ಬಾವುಡ್ತಾ. ಪಾಟ್ಲ್ಯಾ ವರ್ಸಾಂನಿ ಅಂತಾರ್ಜಾಳಿಕ್ ತಾಂತ್ರಿಕ್ ಸಹಾಯ್ ಆನಿ ಹರ‍್ಯೇಕಾ ವರ್ಸಾಂ ವೆಳಾರ್ ರಿನಿವಲ್ ಕರುನ್ ಆಧಾರ್ ದಿಲ್ಲ್ಯಾ ಕ್ಲಿಂಟನ್ ಡಿ’ಸೋಜಾಕ್ ಆಭಾರ್ ಜಾವ್ನಾಸಾ.
ಹಾಂವೆ ಜಾಯ್ತ್ಯಾ ಜಾಗ್ಯಾಂನಿ ಅಶೆಂ ಬರಯ್ಲ್ಯಾ ಸುರು, ಸುರು ಕೊನ್ಶ್ಯಾಂಕ್ ಆಸ್‍ಲ್ಲೆಂ ಬೈಂದೂರಾಚೆ ನಾಂವ್... ಸಭಾರಾಂನಿ ಬರಯ್ಣಾರ್ ಜಾವ್ನ್, ಗಾವ್ಪಿ ಜಾವ್ನ್, ಖೆಳ್ಗಾಡಿ ಜಾವ್ನ್ ಬೈಂದೂರಾಚೆ ನಾಂವ್ ಗಾಜಯ್ಲ್ಯಾಂ. ಪಾಟ್ಲ್ಯಾ ಧಾ ವರ್ಸಾಂನಿ ಬೈಂದೂರ‍್ಚಿಝಳಕ್ ಫಿರ್ಗಜೆಚಿ ಸಭಾರ್ ಘಡಿತಾಂ ಖಳಾನಾಸ್ತಾನಾ ಪರ್ಗಟ್ ಜಾಲ್ಯಾತ್, ಆಮ್ಚಿಂ ಫಾಮಾದ್ ಬರಯ್ಣಾರಾಂ ಅಶೋಕ್ ಬೈಂದೂರ್, ಅನಿಲ್ ಬೈಂದೂರ್, ದಿನು ಬಿಯಾರ್ (ದಿನೇಶ್ ಗ್ರಾಸ್), ಕ್ಲಿಂಟನ್ ಡಿ’ಸೋಜಾ, ಜೊನ್ಸನ್ ಬೈಂದೂರ್, ಅಂತೋನ್ ರೊಡ್ರಿಗಸ್, ವಿಜಯ್ ಡಾಯಸ್, ರೊರೀಟಾ ಫೆರ್ನಾಂಡಿಸ್, ಪ್ರದೀಪ್ ಫೆರ್ನಾಂಡಿಸ್ ಹಾಂಚಾ ಲಿಖ್ಣೆಂ ಥಾವ್ನ್ ಸುಮಾರ್ 50ಚಾಕೀ ಚಡ್ Articles ಬೈಂದೂರ‍್ಚಿಝಳಕ್ ಅಂತರ್ಜಾಳಿಂತ್ ಪರ್ಗಟ್ ಜಾಲ್ಯಾತ್ ಸರ್ವ್ ಆಮ್ಚ್ಯಾ ಬರಯ್ಣಾರಾಂಕ್ ದೇವ್ ಬರೆಂ ಕರುಂ ಅಶೆಂಚ್ ತುಮ್ಚೊ ಸಹಕಾರ್ ನಿರಂತರ್ ಆಸೊಂ ಮ್ಹಣ್ ಅಶೆತಾ.
ಹ್ಯಾ ಧಾ ವರ್ಸಾಂತ್ ಬೈಂದೂರ‍್ಚಿಝಳಕ್ ಸುರ್ವಾತ್ ಕರ್ತಾನಾ ಆಸ್‍ಲ್ಲೆಂ ಹುಮೆದ್ ಆನಿ ಹುರುಪ್ ಉಣೆಂ ಜಾಲಾಂಗೀ ? ಆನಿ ಹಿ ವೆಬ್‍ಸಾಯ್ಟ್ ಪಳೆಂವ್ಚೆ ವಿಕ್ಷಕಾಂ ಆಸಾತ್‍ಗೀ ? ಹೆಂ ವೆಬ್‍ಸಾಯ್ಟ್ ಗರ್ಜ್ ಆಸಾಗೀ ? ಮ್ಹಳಿಂ ಅಸಲಿಂ ನಿರಾಸ್ಪಣಾಚಿಂ ಭೊಗ್ಣಾಂ ಮ್ಹಾಕಾ ಉದೆಲ್ಯಾತ್, ಹಾಕಾ ಕಾರಣ್ ಪ್ರಸ್ತುತ್ ಪರಿಸ್ಥಿತೆಂತ್ ಮೊಬಾಯ್ಲಾರ್ ಫೆಸ್ಬುಕ್ ಆನಿ ವಾಟ್ಸಾಪಾರ್ ಸುಲಭಾಯೆನ್ ಖಬರ್ ಖಿಣಾಂ ಭಿತರ್ ಪಾಶಾರ್ ಜಾತನಾ ವೆಬ್‍ಸಾಯ್ಟ್ ಪಳೆತಲೆಂ ಆನಿ ಪ್ರತ್ಯೇಕ್ ಜಾವ್ನ್ ಬರಯ್ಣಾರಾಂನಿ ಬರಯಿಲ್ಲೆಂ ಸಾಹಿತ್ಯ್ ವಾಚ್ತಲೆಂ, ಅಭಿಪ್ರಾಯ್ ದಿತಲೆಂ ಕೊಣೀ ನಾಂತ್ ಮ್ಹಳ್ಳೆಂ ಬೆಜಾರಾಯ್ ಭೊಗ್ತಾ. ಥೊಡೆ ಪಾವ್ಟಿಂ ಅಂತರ್ಜಾಳ್ ತಾಂತ್ರಿಕ್ ಕಾರಣಾಂಕ್ ಸ್ಥಗೀತ್ ಜಾತನಾ ಅಸಲ್ಯಾ ಸಭಾರ್ ಸಂದರ್ಭಾರ್ ರೊನಿ ಬೈಂದೂರ್ ಆನಿ ಅಶೋಕ್ ಬೈಂದೂರಾನ್ ಮ್ಹಾಕಾ ಜಾಗವ್ನ್ ಹುಮೆದ್ ಆನಿ ಪಾಟಿಂಬೊ ದಿಲ್ಲಾಕ್ ಅಭಾರಿ ಜಾವ್ನಾಸಾ. ಮಾನೇಸ್ತ್ ಪೀಟರ್ ರೊಡ್ರಿಗಸ್ (Rejoice) ಆಂಗ್ಡಿಭಾಟ್ ಹರ‍್ಯೇಕಾ ಬರಯ್ಣಾರಾಂಕ್ ಕಮೆಂಟ್ಸ್ ದೀವ್ನ್ ಉತ್ತೇಜನ್ ದಿಲ್ಲ್ಯಾಕ್ ಹ್ಯಾ ಸಂದರ್ಭಿ ತಾಚೊ ಉಪ್ಕಾರ್ ಬಾವುಡ್ತಾ.
ಹ್ಯಾ ಧಾವ್ಯಾ ವರ್ಸಾಂ ಕಿತೆಂ ತರೀ ನವೆಸಾಂವ್ ಆಸಾಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಹಿಂ ಅಂತರ್ಜಾಳ್ ಪರತ್ ವಿನ್ಯಾಸ್ ಕೆಲ್ಯಾ. ವೆಬ್‍ಸಾಯ್ಟಾಚೆ ಆಕರ್ಷಕ್ ವಿನ್ಯಾಸ್ ಆನಿ ತಾಂತ್ರಿಕ್ ಬದ್ಲಾವಣ್ ಆಮ್ಚೊಚ್ ಫಿರ್ಗಜ್ಗಾರ್ ಜಾಕ್ಸನ್ ಡಿ’ಸಿಲ್ವಾನ್ ಕೆಲ್ಯಾ, ಸಾಂಗಾತಾ ಹ್ಯಾ ವರ್ಸಾಕ್ ಬೈಂದೂರ‍್ಚಿಝಳಕ್ ಅಂತರ್ಜಾಳಿಕ್ ಪೋಷಕ್ ಜಾವ್ನ್ ಪ್ರೋತ್ಸಾಹ್ ದಿಲ್ಲ್ಯಾ ಜಾಕ್ಸನ್ ಡಿ’ಸಿಲ್ವಾಕ್ ದೇವ್ ಬರೆಂ ಕರುಂ ಮ್ಹಣ್ತಾಂ.
ಪಾಟ್ಲ್ಯಾ ಧಾ ವರ್ಸಾಂನಿ ಪಾಟಿಂಬೊ ದಿಲ್ಲ್ಯಾ ವಿಗಾರಾಂಕ್, ಬರಯ್ಣಾರಾಂಕ್, ಪೋಷಕಾಂಕ್, ವಾಚ್ಪ್ಯಾಂಕ್, ಹಿತಚಿಂತಕಾಂಕ್ ಆನಿ ಸರ್ವ್ ಫಿರ್ಗಜ್ ಮಂಡಳಿ, ಗುರ್ಕಾರ್, ಸಂಘ್-ಸಂಸ್ಥೆ ಆನಿ ಸರ್ವ್ ಫಿರ್ಗಜ್ಗಾರಾಂಚೊ ಉಪ್ಕಾರ್ ಬಾವುಡ್ತಾಂ ಆನಿ ಭಾಗೆವಂತ್ ಖುರ್ಸಾಚಿ ಆಶೀರ್ವಾದಾಂ ಆಮಾ ಸರ್ವಾಂಚೆರ್ ಮಾಗೊನ್ ಖುರ್ಸಾ ಸಾವ್ಳೆಂತ್ ಬೈಂದೂರ‍್ಚಿಝಳಕ್ ನಿರಂತರ್ ಉಜ್ವಾಡ್ ಜಾವ್ನ್ ಉರೊಂಕ್ ತುಮ್ಚೆಂ ಮಾಗ್ಣೆಂ ಜಾಂವ್ ಮ್ಹಣ್ ಆಶೆತಾಂ.

- ಡೊಲ್ಫಿ ನಜ್ರೆತ್