ತೊ ಏಕ್ ಕಾಳ್:
ಚಿರಿ-ಪಿರಿ ಪಾವ್ಸಾಂ ಮಧೆಂ ಲಾಂಕ್ಡಾ ದಾಂಡ್ಯಾಚಾ ಸತ್ರೆ ಪೊಂದಾ ಪೊತೆಂ, ಭುತಿ ಆನಿ ಫುಲಾಂಚಿ ಬೊಶಿ, ಚಲೊನ್ ವೆಚಿ ಪಾಂಯ್ ವಾಟ್ ಅಶಿರ್ ಮೇರ್ ಆನಿ ಮಧೆಂ, ಮಧೆಂ ಉದ್ಕಾ ವಾಟೊ, ಹ್ಯಾ ಮಧೆಂ ಇಸ್ಕೊಲಾಕ್ ವೆಚೆಂ ಏಕ್ ಕರಂದಾಯ್. ಪುಣ್ ಏಕ್ ವರ್ತಿ ಆಶಾ ತ್ಯಾ ಅಶೀರ್ ಮೆರೆರ್ ಚಲ್ತಾನಾಂ, ಫುಲಾಂಚಿ ಬೊಶಿ ಆನಿ ಫುಲಾಂಚೊ ಪರ್ಮಳ್ ಇಗರ್ಜೆಕ್ ಪಾವೊನ್ ಬಾಳೊಕ್ ಮರಿಯೆಕ್ ಬೊಶಿಯೆ ಮಧೆಂಚ್ ಸರ್ವ್ ಫುಲಾಂ ಪ್ರಾಸ್ ಸೊಭಿತ್ ಫುಲ್ ಭೆಟಂವ್ಚೆ ಆನಿ ಉರ‍್ಲಲೆಂ ಫುಲಾಂ ಮರಿಯೆಕ್ ಹೊಗಳ್ಸಿಂಯಾ ಕಂತಾರಾ ಸವೆಂ ವಯ್ರ್ ಉಡಂವ್ಚೆ ತಿ ಏಕ್‍ಚ್ಚ್ ಆಶಾ, ವಾಟೆರ್ ಆಡ್ಕಳಿಂ ಆನಿ ಕರಂದಾಯೆಚಿ ಚಿಂತ್ನಾ ಮಾಯಾಗ್ ಜಾವ್ನ್ ನೋವ್ ದಿಸಾಂಚಾ ನೊವೆನಾಂತ್ ಖಂಯ್ ನಾತ್‍ಲ್ಲೊ ಹುರುಪ್ ಉಪ್ರಾಂತ್ ಫೆಸ್ತಾ ದಿಸಾ ಫುಲಾಂಚಿ ಬೊಶಿ ಭಾರಿಚ್ಚ್ ವ್ಹಡ್ಲ್ಯಾ ಗಾತ್ರಾರ್ ಸೊಭಾಜಾಯ್ ಮ್ಹಣ್ ವ್ಹಡ್ ಆಶಾ.
ತ್ಯಾ ವೆಳಾಂ ಪ್ರಕೃತಿ ಸೊಭಾಯ್:
ಗಡ್ಗಡೊ-ಝಗ್ಲಣ್ಯಾಂನಿ ಮೇ ಅಖೇರಿಕ್ ಸುರು ಜಾಲ್ಲೊ ಪಾವ್ಸಾಳೊ, ಖಳನಾಸ್ತಾನಾ ಶಿರಾಂದಾರಿನಿ ವೊತುನ್ ಸಪ್ತೆಬ್ರಾಂತ್ ಸಗ್ಳಿಂ ಸೃಷ್ಟಿ ಸಂತೊಸಾನ್ ಭರೊನ್ ಪಾಚ್ವ್ಯಾ ರಂಗಾಂತ್ ಫುಲಾಂಚಾ ತೊಟಾಂತ್, ವೊಂಯ್ಚ್ಯಾ ಬೊಲ್ಯಾಂಚಾ ಇಡ್ಯಾಂತ್ ಫುಲಾಂ ಫುಲ್ತಾಲಿಂ. ಗಾಂವಾಂತ್ಲೆ ಸುಮನಾ ನ್ಹಂಯ್ (ಬೈಂದೂರ್ಚಿ ವ್ಹಡ್ಲಿ ನ್ಹಂಯ್) ನಾಡಾಂತ್ ವ್ಹಾಳೊನ್ ಆಯಿಲ್ಲ್ಯಾ ಪಾವ್ಸಾಚೆ ಉದಾಕ್ ತಾಂಬ್ಡ್ಯಾ ಮಾತ್ಯೆನ್ ಭರ್ಸೊನ್ ತಾಂಬ್ಡ್ಯಾ ರಂಗಾನ್ ವ್ಹಾಳ್ತಾಲಿ. ಘರ್ಚ್ಯಾ ಅಂಗ್ಣಾಂತ್ ಉಬಾರ್ ಉಬಾರ್ ಬೆಂಡ್ಯಾಚಿ ಝಡಾಂ, ಗೊಟ್ಯಾಚಾ ಪಾಕ್ಯಾರ್, ಹಿತ್ಲಾಂತ್ ವಿವಿಧ್ ರಾಂದ್ವಯೆಚಿ ವಾಲ್ ಪಾತ್ಳಾವ್ಣಿ ಕರುನ್ ಹಾಂತುಳ್ನ್ ಆಸ್ತಾಲಿ. ಏಕ್‍ಚ್ಚ್ ಏಕ್ ಘರ್ ನಾತ್‍ಲ್ಲೆಂ ವಿಶಾಲ್ ಗಾದ್ಯಾಂಚಿ ರಾಸ್ ಪಾಚ್ವ್ಯಾ ರಂಗಾಳಾಂತ್ ಮಧೆಂ ಮಧೆಂ ಭಾಂಗ್ರಾಳ್ಯಾ ರಂಗಾನ್ ಭಾತಾಂಚಿ ಕಣ್ಶ್ಯೊ ದಿಸ್ತಾಲ್ಯೊ.
ಆದಿಂ ಫೆಸ್ತಾಚೊ ಆದ್ಲೊ ದೀಸ್:
ಗುರ್ಕಾರ್ ದಡ್ಬಡ್ತಾ ಶೆತಾಂತ್ಲೆ ಪಿಕ್‍ಲ್ಲ್ಯೊ ಕಣ್ಶ್ಯೊ ಸೊಧುನ್ ಇಗರ್ಜೆಕ್ ಪಾವೊಂವ್ಕ್, ಭುರ್ಗಿಂ ಆಜ್ ಸಾಂಜೆರ್ ಕಶೆಂ ಪುಣಿಂ ಬ್ರಾಹ್ಮಣಾಂತ್ಲ್ಯಾ, ದಿವ್ರ್ಯಾಂಚ್ಯಾ ಘರಾಂ ವೊಸೊನ್ ಬೊಂಗೆ ಎಕ್ಟಾಂಯ್ ಕರುನ್ ಫಾಲ್ಯಾಂಚಿ ಫುಲಾಂಚಿ ಬೊಶಿ ಸೊಭಾಜಾಯ್ ಆನಿ ಘರ್ಚ್ಯಾ ಯೆಜ್ಮಾನ್ಯಾಕ್ ಪರ್ಗಾಂವಾಂತ್ ಆಸ್‍ಲ್ಲ್ಯಾ ಪುತಾ/ಧುವೆಕ್ ಆಜ್ ಕಾಗಾತ್ ಬರವ್ನ್ ಭಾವಾನಾತ್ಮಾಕ್ ಭೊಗ್ಣಾಂಚಾ ಕಾಗ್ದಾಂ ಸಾಂಗಾತಾ ಬೆಂಜಾರ್ ಕೆಲ್ಲೆಂ ನವೆಂ ಫಾಲ್ಯಾಂಚ್ ದನ್ಪರಾಂ ಪೋಸ್ಟ್ ಕರುಂಕ್ ತಾಚೆ ಯೋಜನ್ ಆನಿ ಯೇಜ್ಮಾನ್ ಕಿತ್ಲ್ಯಾ ನಮೂನ್ಯಾಚೊ ರಾಂದ್ವಯ್ ರಾಂದುಕ್, ವೊರ್ನ್ ಖಂಚಾ ರುಚಿಚೊ ಜಾಯ್ ಮ್ಹಣ್ ತಯಾರಾಯ್ ಚಲ್ತಾಲಿಂ.
ಆನಿ ಪ್ರಸ್ತುತ್: ಮೊಂತಿ ಫೆಸ್ತ್ ಮ್ಹಳ್ಯಾರ್ ಖಾಲಿ ಉಗ್ಡಾಸ್ ಮ್ಹಣ್ ಆಮ್ಚ್ಯಾಚ್ ಬರಯ್ಣಾರಾಂಚಿ ಅಶಿ ಅಭಿಪ್ರಾಯ್: ಮೊಂತಿ ಫೆಸ್ತಾಚಾ ಸಂದರ್ಭಿ ವಿಗಾರಾಕ್, ಸರ್ವ್ ಫಿರ್ಗಜ್ ಲೊಕಾಂಕ್, ಸರ್ವ್ ವಾಚ್ಪ್ಯಾಂಕ್, ಬರಯ್ಣಾರಾಂಕ್, ಪೋಷಕಾಂಕ್, ಹಿತಯ್ಶಿಂಕ್ ಆನಿ ಇಸ್ತಿಹಾರ್‌ದಾರಾಂಕ್ ಮೊಂತಿ ಫೆಸ್ತಾಚೆ ಶುಭಾಶಯ್ ಆನಿ ಬಾಳೊಕ್ ಮರಿಯೆಚಿಂ ಧಾರಾಳ್ ಆಶೀರ್ವಾದಾಂ ಮಾಗ್ತಾಂವ್. – Dolphie & Team byndoorchizalak.com
ಗಾದ್ಯಾಚಾ ಅಶೀರ್ ಮೆರೇರ್ ಚಲೊನ್ ವೆಚಿ ಗರ್ಜ್ ನಾ ವಿಶಾಲ್ ರಸ್ತೆ ಆನಿ ಬೈಕ್, ಕಾರ್ ಆಸಾತ್ ಯಾ ಭಾಡ್ಯಾಚಾ ರಿಕ್ಷಾಕ್ ಸಾಂಗ್ಲ್ಯಾರ್ ಜಾಲೆಂ , ಫುಲಾಂಚಿ ಬೊಶಿ ನಾ ಫುಲಾಂಚಿ ದಾಲಿಯೊ, ಫುಲಾಂ ತಲಾಸ್ ಕರ್ಚಿ ಗರ್ಜ್ ನಾ ಫುಲಾಂ ತಿಂ ಶಿವ್ತಿಂ, ಗುಲೊಬಾಚಿ ಆಂಗ್ಡಿ ಆಸಾತ್.
ಮೇ ಅಖೇರಿಕ್ ಸುರು ಜಾಲ್ಲ್ಯಾ ಗಡ್ಗಡೊ-ಝಗ್ಲಣೆಂ ಖಂಯ್ ಆನಾಹುತ್ ಕರಿತ್ ಮ್ಹಣ್ ಜೀವ್ ಹಾತಾಂತ್ ಧರುನ್ ರಾವಾಜಾಯ್, ಅಶೆಂ ತಶೆಂ ಸುರು ಜಾಲ್ಲೊ ಪಾವ್ಸ್ ದೋನ್ ದಿಸಾಂನಿ ಪರತ್ ಧರ್ಣ್ ತಾಪೊನ್ ಖಂಚೊ ಕಾಳ್ ಮ್ಹಣ್ ಪಾರ್ಕುಂಕ್ ಕಷ್ಟ್. ಮಧೆಂ ಆತಾಂ ಪುಣಿ ಪಾವ್ಸ್ ಆಯ್ಲೊ ಮ್ಹಣ್ ಖುಶಿ ಪಾವ್ತಾನಾ ಹೊ ಶಿರಾಂದರಿಚೊ ಪಾವ್ಸ್ ಆವ್ರ್ ಯೆತಾ ಮ್ಹಣಾಸರ್ ಆನಿ ಪುರೊ ಹಾಬಾ ಹೊ ಪಾವ್ಸ್ ಮ್ಹಣ್ ಪಾವ್ಸಾಕ್ ಆಮಿ ಗಾಳಿ ಯೆಟ್ತಾನಾ, ಪಾವ್ಸಾಕೀ ರಾಗ್ ಯೇವ್ನ್ ಅತಾಂ ಪಾವ್ಸಾಚಿ ಖಬರ್ ನಾ ಆನಿ ಮುಕಾರ್ ಕರೆಂಟ್ ನಾ ಮ್ಹಣ್ ಸರ್ಕಾರಾಚೆ ರುದಾನ್. ಪಾವ್ಸಾಳ್ಯಾಂತ್ ಉದ್ವೇಗ್ ಭರೊನ್ ರಭಸಾನ್ ವ್ಹಾಳ್ಚಿ ಸುಮನ ನ್ಹಂಯ್ ಆತಾಂ ಪಾವ್ಸ್ ನಾಸ್ತಾ ಶಾಂತ್ ಜಾಲ್ಯಾ. ಗಾದೆಂ-ಬಯ್ಲಾಂ ಘರಾಂನಿ ಕುಟ್ಮಾಂತ್ ವಿಭಜನ್ ಜಾವ್ನ್ ಟೆರೆಸಾಚಾ ಘರಾಂ ಭರ್ಲ್ಯಾತ್. ಘರ್ಚ್ಯಾ ಆಂಗಣ್ ರಿತೆಂ ಜಾಲ್ಯಾ, ಹಿತ್ಲಾಂತ್ ವಾಲ್ ನಾ ಬಿಪಿ, ಶುಗರ್, ಗ್ಯಾಸ್ಟ್ರಿಕ್, ತಕ್ಲೆ ಘುಂವಳ್ ಚಡ್ ಜಾಲ್ಯಾ, ಕೃಷಿ ಕರುಂಕ್ ವೇಳ್ ನಾ, ಮೊಂತಿ ಫೆಸ್ತಾಕ್ ಬೈಂದೂರ್ಚ್ಯಾ ಸುಕ್ರಾರ್ ಸಾಂತೆಂತ್ ಘಾಟಿ ರಾಂದ್ವಯೆನ್ ಕುಂಡ್ಲ್ಯಾಂತ್ ಚಡ್ ಮ್ಹಳ್ಯಾರ್ ತೀನ್ ನಮುನ್ಯಾಚೊ ರಾಂದ್ವಯ್ ಶಿಜ್ಲ್ಯಾ ಆಸೊಂಕ್ ಪುರೊ. ಚಡಾವತ್ ಘರಾಂತ್ ಆತಾಂ ಭುರ್ಗಿಂ ಪರ್ಗಾವಾಂತ್ ಆಸ್ತಾನಾ ಪ್ರಾಯೆಕ್ ಪಾವ್‍ಲ್ಲಿಂ ಮ್ಹಾತಾರಿ-ಮ್ಹಾತಾರೊ ಫ್ಯಾಲ್ಯಾಂಚಾ ಫೆಸ್ತಾಕ್ ಮೀಸಾಕ್ ಕಶೆಂ ವೆಚೆಂ ಖಂತ್ ತರ್ ನೀಸ್ ಆನಿ ಪೇಜ್ ಜೇವ್ನ್ ತಾಂಚೆ ಫೆಸ್ತ್ ಆಚರಣ್ ಜಾತಾ ಜಾಂವ್ಕ್ ಪುರೊ. ಪರ್ಗಾವಾಂತ್ ಮೊಂತಿ ಫೆಸ್ತ್ ಆಚರಣ್ ಆನಿ ನವೆಂ ಅತಾಂ ಮೆಳ್ತಾನಾ ಭಾವಾನಾತ್ಮಾಕ್ ಕಾಗ್ದಾಂ ನವೆಂ ಧಾಡುಂಕ್ ಅವ್ಕಾಸ್ ನಾ ಆನಿ ಜಾಯ್ ಮ್ಹಣ್ ಅತಾಂಚಾ ಪರ್ಗಾವಾಂತ್ ಘೊಳ್ಚ್ಯಾ ಪಿಳ್ಗೆಕ್ ತಿಂ ಭಾವಾನಾತ್ಮಕ್ ಆಶಾಯಿ ನಾ.
ಅಶೋಕ್ ಆಪ್ಲ್ಯಾ ಎಕಾ ಲೇಖನಾಂತ್ ಬರಯ್ತಾ: ಪರ್ಗಾಂವಾತ್ ಆಸ್‍ಲ್ಲ್ಯಾಂಕ್ ದಾಡ್ಚೆ ನವೆಂ ಬೆಳೆ ಮಾಯಾಗ್ ಜಾಲ್ಯಾ. ಮಾಲ್ಗಡ್ಯಾ ಘರಾಂತ್ ಸರ್ವ್ ಎಕ್ ಕುಟಾಮ್ ಜಾವ್ನ್ ಜೆಂವ್ಚೆ ನೊವೆ ಜೆವಾಣ್ ಜೆಂವ್ಚೆ ಆಜ್ ಆಪಾಪ್ಲ್ಯಾ ಘರಾಂತ್ ವಿವಿಂಗಡ್ ಜಾಲ್ಯಾ. ಹ್ಯಾ ಆತಾಂಚಾ ಆಧುನಿಕ್ ಸಂಸಾರಾಂತ್ ತಪ್ಪಾಲ್ ಖಾತೊ ಮುಲ್ಯಾಕ್ ವೊಸುನ್ ಇ-ಮೇಲ್, ವಾಟ್ಸಾಪಾರ್, ಫೆಸ್‌ಬುಕಾರ್ ಥಂಯ್ ಕಿತೆಂ ರಾಂದ್ಲಾ, ಕಿತೆಂ ಕರ್ತಾತ್, ಕಿತೆಂ ಚಲ್ತಾ ಮ್ಹಳ್ಳೆಂ ಖಬಾರ್ ಫೊಟ್ಯಾ ಸವೆಂ ಸೆಕುಂಡಾನ್ ಆದಲ್ ಬದಲ್ ಜಾತಾನಾ ತಿ ಆಮ್ಚಿಂ ಆದ್ಲಿ ರಿವಾಜ್ ತಿ ಅದ್ಲ್ಯಾ ಫೆಸ್ತಾಚಿ ಸೊಭಾಯ್ ಆತಾಂ "ತೆಂ ಏಕ್ ಚಿಂತಾಪ್ ಮಾತ್ರ್" ಜಾವ್ನ್ ಉರ್ಲಾ ಮ್ಹಳ್ಳೆಂ ಚಿಂತಾಪ್ ಮ್ಹಜ್ಯಾ ಮತಿಂತ್ ಯೆತಾ.
ಅನಿಲ್ ಆಪ್ಲ್ಯಾ ಲೇಖನಾಂತ್ ಬರಯ್ತಾ: ಆದಿಂ ಆಚರಣ್ ಜಾಂವ್ಚ್ಯಾ ಮೊಂತಿ ಫೆಸ್ತಾ ವಿಶ್ಯಾಂತ್ ನಿಯಾಳ್ಚಿ ಮೊತ್ ಮಾತ್ರ್ ಕ್ಶಣಾಕ್ ತರ್‌ಯೀ ಭಾವುಕ್ ಜಾವ್ನ್ ನೆಣ್ತಿ ಜಾವ್ನ್ ತೊ ಸಂಭ್ರಮ್ ಮಜೆನ್ ಸೆಂವ್ತಾ. ಪೂಣ್ ತ್ಯಾ ನೆಣ್ತ್ಯಾ ಕುಡಿಚೆ ವಿಶ್ವೆ ಆತಾಂ ವಾಡ್ಲ್ಯಾತ್ ರಾನಾಂತ್ ಬಾಂದುನ್ ಸೊಡ್‍ಲ್ಲ್ಯಾ ಜೀವಾಬರಿ ಕಿತೆಂಯ್ ಮನಪೂರ್ವಕೀ ಕರುಂಕ್ ಸಕಾನಾಸ್ತಾ ಒದ್ದಾಡ್ತಾ ....
ನೇವಿಲ್ ಕವಿತೆಂತ್ ವಿಷಾದ್ ಜಾವ್ನ್ ಅಶೆಂ ಬರಯ್ತಾ: ತ್ಯಾ ದಿಸಾ ಬಾಪಯ್ ಸಾಂಗಾತಾ ಸುಕಿ-ದಾಡ್ ಪಡ್‍ಲ್ಲ್ಯಾ ಗಾದ್ಯಾಂತ್ ಉಬೆ ರಾವೊನ್ ಖಾಲಿ ಆಕಾಸಾರ್ ದೀಷ್ಟ್ ಲಾವ್ನ್ ಮೊಡಾಂಕ್ ಹಾಂವೆ ಉಲೊ ಕೆಲೊ ವಾರ‍್ಯಾಂ ಸಂಗೀ ಖೆಳೊನ್ ಪಾವ್ಸ್ ಜಾವ್ನ್ ವೊತಾಂ ಮ್ಹಣ್ ಮಾಗ್ಲೆ, ಆಜ್ ಹಾಂವ್ ಪರ್ಗಾವಾಂತ್ ಭಾಯ್ರ್ ವಚೊಂಕ್ ತಯಾರ್ ಜಾಲಾ ಪುಣ್ ಮೊಡಾಂಚಾ ಆಡ್ಚಣೆನ್ ವಿಮಾನ್ ಸುಟೊಂಕ್ ಘಳಾಯ್ ಜಾತನಾ ತ್ಯಾಚ್ಚ್ ಮೊಡಾಂಕ್ ಶಿರಾಪ್ಲೊ.
ವ್ಹಯ್ ಆಜ್ ವೇಳ್ ಬದಲ್ಲಾ-ಕಾಳ್ ಬದಲ್ಲ್ಯಾ ಕಿತೆಂಗೀ ಗೊಂದೊಳ್-ಗುಸ್ಪಡ್ ಜಿಣ್ಯೆಂತ್ ಪ್ರಕೃತೆ ಸಂಗಿ ಆಮ್ಚೊ ಸಂಬಂಧ್ ತುಟೊನ್ ಗೆಲ್ಯಾ ಮ್ಹಣ್ ದಿಸ್ತಾ. ಆಜ್ ಆಮಿ ಗಾಂವಾಂತ್ ವಾ ಪರ್ಗಾವಾಂತ್ ಅಸಾಂವ್ ತರೀ ಫೆಸ್ತಾಚೊ ಸ್ವಾಧ್ ಪಯ್ಲೆಂಚಾ ಪರಿಂ ನಾ. ಚಡಾವತ್ ಜಣಾಂಚಿ ಅಭಿಪ್ರಾಯ್ ಅಶೆಂಚ್ ಪಯ್ಲೆಂಚೆ ಪರಿಂ ಪಾವ್ಸ್ ನಾ, ಬೆಳೆಂ ನಾ, ಬೆಳೆಂ ಕರುಂಕ್ ಜಣ್ ನಾ. ಫೆಸ್ತ್ ಮ್ಹಳ್ಯಾರ್ ಏಕ್ ತಾತ್ಕಾಲಿಕ್ ಥರಾನ್ ಬಳಾನ್ ಆಚರಣ್ ಶಿವಾಯ್ ಖರ‍್ಯಾ ಭಕ್ತಿಪಣಾಚೆ ಆನಿ ಸಂತೊಸಾಚೆ ವಾತವರಣ್ ಆತಾಂ ಫೆಸ್ತಾಂತ್ ನಾ. ಬಹುಷ್ಯ ತ್ಯಾ ವೆಳಾರ್ ಆಮ್ಚೆಂ ಥಂಯ್ ಸೊಂಪೆಪಣ್ ಆಸ್‍ಲ್ಲೆಂ, ದುಬ್ಳಿಕಾಯ್ ಅಸ್‍ಲ್ಲೆಂ, ಭುಕ್ ಆಸ್‍ಲ್ಲೆಂ ಆನಿ ಖರೆಂ ಭಕ್ತ್ ಆಸ್‍ಲ್ಲೆಂ. ಪುಣ್ ಆತಾಂ ಸೊಂಪೆಪಣ್, ದುಬ್ಳಿಕಾಯ್, ಭುಕ್, ಭಕ್ತ್ ಉಣೆಂ ಜಾಲಾ. ಅಶೆಂ ಜಾವ್ನ್ ಬಾಳೊಕ್ ಮರಿಯೆಚೆ ಜಲ್ಮಾಂ ಫೆಸ್ತ್ ಮೊಂತಿ ಫೆಸ್ತ್ ಆದ್ಲಿಂ ಉಗ್ಡಾಸಾಂ ಮಾತ್ರ್ ಸ್ವಾಧಿಕ್ ಜಾವ್ನಾಸೊನ್ ಆತಾಂ ತಸಲೊ ಸ್ವಾಧ್ ನಾ ಮ್ಹಣ್ ಬೆಜಾರಾಯ್ ಭೊಗ್ತಾಂ.