ಪರತ್ ಏಕ್ ಪಾವ್ಟಿ ಮೊಂತಿ ಫೆಸ್ತಾಚಾ ಸಂಭ್ರಮಾಕ್ ಆಮಿ ತಯಾರ್ ಜಾಲ್ಯಾಂವ್, ವಿವಿಧ್ ವಿಚಾರಾಂತ್ ಆಸ್ಪಾವ್ ಘೆಂವ್ಕ್ ಮೊಂತಿ ಫೆಸ್ತಾಚೆ ಆಚರಣ್ ಮಹತ್ವ್ ಘೆತಾ. ಪುಣ್ ಏಕ್ ವಿಷಯ್ ಅಶೆಂ ಆಸಾ ಆಜ್‍ಕಾಲ್ ಆಮ್ಚಿಂ ಫೆಸ್ತಾಂ, ಆಮ್ಚಿಂ ಸಂಸ್ಕೃತಿಚೆ ಆಚರಣ್ ನಿರಾಸ್ಪಣ್ ಆಚರಣ್ ಜಾಲ್ಯಾತ್ ಮ್ಹಣ್ ಸಭಾರಾಂಕ್ ಕಾವ್ಜೆಣಿ ಭೊಗ್ತಾ. ಮೊಂತಿ ಫೆಸ್ತ್ ಆಯ್ಲೆಂ ಮ್ಹಣ್ತಾನಾ ಪಾಟ್ಲ್ಯಾ ವರ್ಸಾಂನಿ ಆನಿ ಆಜ್ ಹಾಂವ್ ಆಯ್ಕೊನ್ಂಚ್ ಆಸಾ, ವಾಚುನ್ಂಚ್ ಆಸಾ ಪಯ್ಲೆಂಚಾ ಪರಿಂ ಆಮ್ಚಿಂ ಫೆಸ್ತಾಂ, ಆಮ್ಚಿಂ ಸಂಸ್ಕೃತಿ ಆಚರಣ್ ಜಾಯ್ನಾಂತ್ ಮ್ಹಣ್ ಬೆಜಾರಾಯ್ ಉಚಾರ‍್ನ್ ಕಾರಣ್ ಸಭಾರ್ ದಿಲ್ಯಾಂತ್ ಆನಿ ಸೊಧುಂಕ್ ಗೆಲ್ಯಾರ್ ಆನಿಕೀ ಸಭಾರ್ ಕಾರಣ್ ಆಸಾತ್ ಕೊಣ್ಣಾ. ಕಾಂಯ್ ಪಾಟ್ಲ್ಯಾ ಧಾ-ಬಾರಾಂ ವರ್ಸಾಂ ಥಾವ್ನ್ ಎಕಾಚ್ಫಾಣೆಂ ಬದ್ಲಾವಣ್ ಜಾಲ್ಲಿಂ ಆಮ್ಚಿ ಜಿಣ್ಯೆ ರೀತ್, ಆಮ್ಚ್ಯಾ ಕಷ್ಟಿ ಆನಿ ಮಿನ್ಹತೆಚಿ ಜಿಣಿಯೆ ಥಾವ್ನ್ ಸುಲಭಾಯೆಚಾ ಜಿಣ್ಯೆಕ್ ಅನಿವಾರ್ಯ್‍ಗೀ ವಾ ಜಾಯ್ಜಯ್ ಮ್ಹಣ್‍ಗೀ ವೆಂಗ್ ಮಾರ್ನ್ ಆಮ್ಚೆಂ ಸೊಂಪೆಪಣ್ ದವ್ಲತೆಕ್ ಪರ್ತೊನ್ ಆಮ್ಚಿ ಫೆಸ್ತಾಂ ಆನಿ ಸಂಸ್ಕೃತಿಚೆ ಆಚರಣಾಂ ನಿರಾಸ್ ಜಾವ್ನ್ಂಚ್ ಆಚರಣ್ ಜಾತಾತ್.
ಮೊಂತಿ ಫೆಸ್ತ್ ಮರಿಯೆ ಮಾಯೆಕ್ ಮಾನ್ ಭೆಟಂವ್ಚ್ಯಾ ಸಾಂಗಾತಾ ಕುಟ್ಮಾಚೆ ಫೆಸ್ತ್ ಜಾವ್ನಾಸ್ತಾ ಆದ್ಲ್ಯಾ ರೀತಿ-ರಿವಾಜೆ ಪ್ರಕಾರ್ ಫೆಸ್ತ್ ಆಚರಣ್ ಕರ್ಚ್ಯಾ ಪರಿಸ್ಥಿತೆರ್ ಆಜ್ ಆಮ್ಚಿಂ ಕುಟ್ಮಾಂ ನಾಂತ್. ಕುಟ್ಮಾಂ ಆಜ್ ಲ್ಹಾನ್-ಲ್ಹಾನ್ ಜಾವ್ನ್ ಜಣ್ಂ‍ಚ್ ನಾಂತ್, ವ್ಹಡಿಲ್ ಪರ್ಗಾವಾಂತ್, ಭುರ್ಗಿಂ ಉಂಚ್ಲ್ಯಾ ಶಿಕ್ಪಾಕ್ ಶಹರಾಂತ್ ತರ್ ತಾಂಕಾ ಯೆಂವ್ಕ್ ಪುರ್ಸತ್ ನಾ ಆನಿ ತಾಚಾ ಪಯ್ಲೆಂ ಆಸಕ್ತ್ ನಾ ಅಶೆಂ ಆಸ್ತಾ ಆಮ್ಚ್ಯಾ ಫೆಸ್ತಾಂಕ್ ಮಹತ್ವ್ ಯೆಂವ್ಚೆ ತರೀ ಕಶೆಂ? ಆಜ್‍ಕಾಲ್ ಇಲೆಕ್ಟ್ರ‍ೊನಿಕ್ ಸಾಧನಾಂ, ಸೊಶಿಯಲ್ ನೆಟ್‍ವರ್ಕ್ ಆನಿ ಮಾಧ್ಯಮಾಂಚಿ ಖಾತಡ್ ಆಮ್ಚ್ಯಾ ತರ್ನ್ಯಾ ಪಿಳ್ಗೆಕ್ ಖಂಯ್ಗೀ ವೊಡುನ್ ತಾಚಾಂಚ್ ಸಂಸಾರಾಂತ್ ವ್ಯಸ್ತ್ ಜಾವ್ನ್ ಘರಾಂತ್ ಫೆಸ್ತ್ ಕಿತೆಂ ಆನಿ ಎಕ್ವಟ್ ಕಿತೆಂ ಮ್ಹಣ್ ಭುರ್ಗ್ಯಾಂಕ್ ತ್ಯಾ ವಿಶಿಂ ಪರ್ವಾಯೀ ನಾ. ತರೀ ಆಜ್ ಥೊಡಿಂ ಕುಟ್ಮಾಂ ಪಯ್ಲೆಂಚಾ ಪರಿಂ ರೀತಿ ರಿವಾಜ್ಯೊ ಸಾಂಬಾಳುನ್ ಆಪ್ಲ್ಯಾ ಭುರ್ಗ್ಯಾಂಕ್ ಮೊಂತಿ ಫೆಸ್ತಾಚೆ ರೂಚ್ ಭೊಗುಂಕ್ ಮೆಳಾಜಾಯ್ ಮ್ಹಣ್ ಕುಟ್ಮಾಂತ್ ಅತ್ಮೀಕ್ ವಿಚಾರ್ ಆನಿ ಪುರ್ವಜಾಂಚೊ ಆಚರಣಾಂ ಉಗ್ಡಾಸಾಕ್ ಹಾಡುನ್ ಪ್ರಾಯೋಗಿಕ್ ರಿತೀನ್ ಆಪ್ಲ್ಯಾ ಪಿಳ್ಗೆಕ್ ಝಳಕ್ ದಿಂವ್ಚೆ ಪ್ರಯತನ್ ಕರುನ್ ಆಸಾತ್ ತರ್, ಪರ್ಗಾವಾಂತ್ ಸಯ್ತ್ ಕುಟ್ಮಾಂ ಆನಿ ಥೊಡಿಂ ಸಂಘಟನಾ ಸಾಂಗಾತಾ ಮೆಳೊನ್ ಮೊಂತಿ ಫೆಸ್ತಾಚೊ ಸಂತೊಸ್ ಪಾಚಾರುನ್ ಆಸಾತ್. ತರ್ನ್ಯಾ ಪಿಳ್ಗೆಕ್ ಸಾಂಗ್ಚೆ ತರ್ ತುಮ್ಚಿಂ ಮೊಬಾಯ್ಲಾಂ, ಸೊಶಿಯಲ್ ನೆಟ್‍ವರ್ಕ್ ಆನಿ ಕಿತೆಂ ಮನೋರಂಜನಾ ಮಾಧ್ಯಮಾಂ ಫೆಸ್ತಾಚಾ ದಿಸಾ ಪುಣೀ ಪಯ್ಸ್ ದವರ‍್ನ್ ಕುಟ್ಮಾಂ ಸಂಗಿ ವಾಂಟೆಲಿ ಜಾಯಾ, ಅತ್ಮೀಕ್ ವಿಚಾರಾಂ ಆನಿ ಮಾಲ್ಗಡ್ಯಾಂಚೆ ರೀತ್-ರಿವಾಜ್ಯೊ ಜಾಣಾ ಜಾಯಾ, ಹಾಂಗಾಸರ್ ಮೆಳ್ತಲೊ ತುಮ್ಕಾಂ ಖರೊ ಸಂತೊಸ್ ಆನಿ ಕುಟ್ಮಾಚೊ ಎಕ್ವಟಾಚೊ ಮೋಗ್. ಜರ್ ಆಮಿ ವ್ಹಡಿಲಾಂ ಇಲ್ಲೆಂ ಬಳಾನ್ ಆಸಕ್ತ್ ಘೆವ್ನ್ ಪುಣೀ ಫೆಸ್ತ್ ಆಚರಣ್ ಕೆಲೆಂ ತರ್ ಆಮ್ಚಿಂ ಫೆಸ್ತಾಂ ಆನಿ ಸಂಸ್ಕೃತಿ ಆಯ್ಚ್ಯಾ ಪಿಳ್ಗೆಕ್ ಆನಿ ಮುಕ್ಲ್ಯಾ ಪಿಳ್ಗೆಕ್ ರೂಚ್ ಆನಿ ಮಹತ್ವ್ ಜಾಣಾ ಜಾಂವ್ಕ್ ಖಂಡಿತ್ ಸಾಧ್ಯ್ ಆಸಾ.
ಆಮ್ಚ್ಯಾ ಫಿರ್ಗಜೆಂತ್ ಹ್ಯಾ ವೆಳಾಂ ದೊಡ್ತ್ಯಾ ಸಂಭ್ರಮಾಕ್ ತಯಾರಾಯ್ ಚಲೊನ್ ಫಾಲ್ಯಾ ಮೊಂತಿ ಫೆಸ್ತಾಚೆ ಸಂಭ್ರಮ್ ತರ್ ಯೆಂವ್ಚ್ಯಾ ಆಯ್ತಾರಾ ಚಾರಿತ್ರಿಕ್ ಪವಿತ್ರ್ ಖುರ್ಸಾ ಗುಡ್ಯಾರ್ ನವ್ಯಾ ಕೊಪೆಲಾಚೆ ಉಗ್ತಾವಣ್ ಕಾರ್ಯಕ್ರಮಾಚೆ ಸಂಭ್ರಮ್. ಹ್ಯಾ ಸಂಭ್ರಮಾಕ್ ವಿಗಾರ್ ಮಾ| ಬಾ| ರೊನಾಲ್ಡ್ ಮಿರಾಂದಾ ಆನಿ ಫಿರ್ಗಜ್ ಲೋಕ್ ಖಳಾನಾಸ್ತಾನಾ ವಾವ್ರ್ ಭೆಟೊವ್ನ್ ಆಸಾತ್ ತಾಂಚಾ ವಾವ್ರಾಕ್ ಆಮಿ ಸರ್ವ್ ಬರೆಂ ಮಾಗ್ತಾಂವ್ ಆನಿ ನವ್ಯಾ ಕೊಪೆಲಾಚೆ ಉಗ್ತಾವಣೆಚೆ ಸಂಭ್ರಮ್ ಯಶಸ್ವಿ ಜಾಂವ್ ಮ್ಹಣ್ ಆಶೆತಾಂವ್. ಖುರ್ಸಾ ಗುಡ್ಯಾಚಿ ಮಹಿಮಾ ಆನಿ ಸಸಾಯ್ ಹೆರ್ ಫಿರ್ಗಜ್ಗಾರಾಂಕ್ ಕಳಂವ್ಕ್ ತುಮ್ಚೆಂ ಆನಿ ಆಮ್ಚೆಂ ಪ್ರಯತನ್ ಚಡಿತ್ ಮಾಪಾನ್ ಜಾಂವ್.
ಮೊಂತಿ ಫೆಸ್ತಾಚಾ ಸಂದರ್ಭಿ ವಿಗಾರಾಕ್, ಸರ್ವ್ ಫಿರ್ಗಜ್ ಲೊಕಾಂಕ್, ಸರ್ವ್ ವಾಚ್ಪ್ಯಾಂಕ್, ಬರಯ್ಣಾರಾಂಕ್, ಪೋಷಕಾಂಕ್, ಹಿತಯ್ಶಿಂಕ್ ಆನಿ ಇಸ್ತಿಹಾರ್‌ದಾರಾಂಕ್ ಮೊಂತಿ ಫೆಸ್ತಾಚೆ ಶುಭಾಶಯ್ ಆನಿ ಬಾಳೊಕ್ ಮರಿಯೆಚಿಂ ಧಾರಾಳ್ ಆಶೀರ್ವಾದಾಂ ಮಾಗ್ತಾಂವ್.
– Dolphie & Team byndoorchizalak.com