ಬೈಂದೂರ್ಚಿಝಳಕ್... ದಿಂವ್ಚ್ಯಾಕ್ ಬೈಂದೂರ‍್ಚಿ ವಳೊಕ್... ಪಾಂಚ್ ವರ್ಸಾಂ ಆದಿಂ ನವೆಂಬರ್ 25, 2012 ತಾರೀಕೆರ್ ತವಳ್ಚೊ ವಿಗಾರ್ ಮಾ| ಬಾ| ಫ್ರಾನ್ಸಿಸ್ ಕರ್ನೆಲಿಯೊನ್ ಫಿರ್ಗಜ್ ಅಂತಾರ್ಜಾಳ್ ಬೈಂದೂರ್ಚಿಝಳಕ್ ಲೊಕಾರ್ಪಣ್ ಕೆಲ್ಲೊ ದೀಸ್ ಜಾವ್ನ್ ಬೈಂದೂರ್ಚಿಝಳಕ್ ಫಿರ್ಗಜ್ ಅಂತರ್ಜಾಳಿಕ್ ಆಜ್ ಪಾಂಚ್ವ್ಯಾ ವರ್ಸಾಚೊ ಸಂಭ್ರಮ್.
ಬೈಂದೂರ್ಚಿಝಳಕ್ ಅಂತರ್ಜಾಳ್ ಜಲ್ಮ್ ಘೆತ್‍ಲ್ಲೊ ದೀಸ್ ತೊ ಖುಶೆಚೊ, ಪಾಂಚ್ ವರ್ಸಾಚೊ ಸಂಭ್ರಮ್ ವಿಶೇಸ್ ರಿತಿನ್ ಆಚರಣ್ ಕರುಂಕ್ ಜಾಯ್ ಮ್ಹಳ್ಳೊ ಇರಾದೊ ಘಟ್ ಜಾಲ್ಲೊ, ಪುಣ್ ಬೈಂದೂರ್ಚಿಝಳಕ್ ಅಂತರ್ಜಾಳಿಚಾ ಘರಾಂತ್ ಏಕ್ ಪರ್ಜಳಿಕ್ ದಿವ್ಯಾಚೊ ಮೊಲಾದಿಕ್ ಉಜ್ವಾಡ್ ನಾಸ್ತಾನಾ ಬೈಂದೂರ್ಚಿಝಳಕ್ ಹೊ ಸಬ್ದ್ ಕಾನಾಂನಿ ಆಯ್ಕಾತಾನಾ, ದೊಳ್ಯಾಂನಿ ವಾಚ್ತಾನಾ ಹರ‍್ಯೇಕ್ ಘಡಿ ನೇವಿಲಾಚೊ ಉಗ್ಡಾಸ್ ಕಾಳ್ಜಾಂ-ಮನಾಂತ್ ಪರತ್, ಪರತ್ ಧೊಸ್ತಾ. ನೇವಿಲಾಚೆ ಆಚಾನಕ್ ಮರಣ್ ಆಮ್ಕಾಂ ಸೊಸುಂಕ್ ಜಾಯಾತ್‍ಲ್ಲೆಂ ಅಘಾತ್ ಜಾವ್ನ್, ಎಕಾ ರಿತೀಚೊ ಮೌನ್‍ಪಣ್ ಆನಿ ಬೆಜಾರಾಯ್ ಭೊಗ್ತಾ. ಬೈಂದೂರ್ಚಿಝಳಕ್ ಅಂತರ್ಜಾಳ್ ಜಲ್ಮಾಂ ದಿಸಾ ಪರತ್ ಏಕ್ ಪಾವ್ಟಿಂ ತಾಚೊ ಉಗ್ಡಾಸ್ ಕಾಡುನ್ ಬೈಂದೂರ್ಚಿಝಳಕ್ ನೇವಿಲಾಚಾ ಅತ್ಮಾಕ್ ಶಾಂತಿ ಮಾಗೊನ್ ಶೃದ್ಧಾಂಜಲಿ ಪಾಟಯ್ತಾ.
ಏಕ್ ಬರೊ ಉದ್ದೇಶ್ ಆನಿ ಆಶಾ ಮನಾಂತ್ ದವ್ರುನ್ ಬೈಂದೂರ್ಚಿಝಳಕ್ ಆರಂಭ್ ಜಾವ್ನ್ ಸಂಪೂರ್ಣ್ ನ್ಹಯ್ ತರೀ ಚಡಿತ್ ಮಾಪಾಚಿ ಯಶಸ್ವಿ ಜೊಡ್‍ಲ್ಲಿಂ ತೃಪ್ತಿ ಜಾಲ್ಯಾ. ಸುರ್ವಾತ್ ಜಾಲ್ಲ್ಯಾ ದಿಸಾಂ ಥಾವ್ನ್ ಆನಿ ಪ್ರಸ್ತುತ್ ವಿಗಾರ್ ಮಾ| ಬಾ| ರೊನಾಲ್ಡ್ ಮಿರಾಂದ, ಫಿರ್ಗಜ್ ಗೊವ್ಳಿಕ್ ಮಂಡಳಿ, ಪಿರ್ಗಜ್ ಸಂಘ್-ಸಂಸ್ಥೆ, ಗಾಂವಾಂತ್ ತಶೆಂ ಪರ್ಗಾವಾಂತ್ ಆಸ್‍ಲ್ಲ್ಯಾ ಫಿರ್ಗಜ್ ಲೊಕಾನ್ ಆನಿ ಹಿತಚಿಂತಕ್ ಜಾವ್ನ್ ಸರ್ವಾಂಚೊ ಸಹಕಾರ್ ಬರ್ಪೂರ್ ಮೆಳ್ಳ್ಯಾ. ಆರ್ಥಿಕ್ ಸಹಕಾರ್ ದಿಲ್ಲಾ ಪೋಷಕಾಂಕ್, ಬೈಂದೂರ್ಚಿಝಳಕ್ ಬರಯ್ಣಾರಾಂಕ್ ಆನಿ ವಾಚ್ಪ್ಯಾಂಕ್ ಬೈಂದೂರ್ಚಿಝಳಕ್ ಆಜ್ ಪಾಂಚ್ವ್ಯಾ ವರ್ಸಾಚಾ ಸುವಾಳ್ಯಾರ್ ಆಸ್ತಾನಾ ಸರ್ವಾಂಚೊ ಉಪ್ಕಾರ್ ಆಟವ್ನ್ ಅಭಾರಿ ಜಾವ್ನಾಸಾಂವ್.
ಪ್ರಮುಖ್ ಜಾವ್ನ್ ಹಾಂವ್ ಉಪ್ಕಾರ್ ಬಾವುಡ್ತಾ ಹ್ಯಾ ಅಂತರ್ಜಾಳಿಕ್ ಆಪ್ಲ್ಯಾ ಕಾಮಾಚಾ ರಾಟವಳಿಂ ಮಧೆಂ ಫಿರ್ಗಜೆಂತ್ ಜಾಂವ್ಚ್ಯಾ ಹರ್ಯೆಕಾ ಕಾರ್ಯಕ್ರಮಾಚೆ ತಸ್ವೀರ್ ಸಂಗ್ರಹ್ ಕರುನ್ ಬೈಂದೂರ್ ಫಿರ್ಗಜ್ ಮಂಡಳಿ ತಶೆಂಚ್ ಬೈಂದೂರ್ಚಿಝಳಕ್ ಅಂತರ್ಜಾಳ್ ಮಾಧ್ಯಮ್ ಪ್ರತಿನಿಧಿ ಲೊರೆನ್ಸ್ ಫೆರ್ನಾಂಡಿಸಾಕ್ ಹಾಂವ್ ಕಾಳ್ಜಾಂ ಥಾವ್ನ್ ಹಾಂವ್ ಉಪ್ಕಾರ್ ಆಟಯ್ತಾ. ಹ್ಯಾ ಪಾಂಚ್ ವರ್ಸಾಂನಿ ಬೈಂದೂರ್ಚಿಝಳಕ್ ಅಂತರ್ಜಾಳ್ ತಾಂತ್ರಿಕ್ ದುರಸ್ತಿ ಆನಿ ಹರ‍್ಯೇಕಾ ವರ್ಸಾಂ ವೆಳಾರ್ ರಿನಿವಲ್ ಕರುನ್ ದಿಂವ್ಚ್ಯಾ ಕ್ಲಿಂಟನಾಕ್ ಹಾಂವ್ ಅಭಾರಿ ಜಾವ್ನಾಸಾ.
ಆಮ್ಚ್ಯಾ ವಾವ್ರಾಂ ಮಧೆಂ ಪುರ್ಸತ್ ಕರುನ್ ಬೈಂದೂರ್ಚಿಝಳಕ್ ಅಂತರ್ಜಾಳಿಕ್ ಸೆವಾ ದಿತಾನಾ ವರ್ದಿ ವಾ ಸಾಹಿತ್ಯ್ ಉತ್ರಾಂ ಥೊಡಿಂ ಚೂಕ್ ಘಡ್ಲ್ಯಾತ್, ತಾಂತ್ರಿಕ್ ಕಾರಣಾಂನಿ ಏಕ್ ದೋನ್ ವರ್ದಿ ಫಾಯ್ಸ್ ಕರುಂಕ್ ಸಾಧ್ಯ್ ಜಾಂವ್ಕ್ ನಾಂತ್, ತರೀ ತುಮಿ ಸುಧಾರ್ಸುನ್ ಆಮ್ಕಾಂ ದಿಲ್ಲ್ಯಾ ಸಹಕಾರಾಕ್ ಉಪ್ಕಾರ್ ಆಟಯ್ತಾಂವ್.
ಆಜ್ ಬೈಂದೂರ್ಚಿಝಳಕ್ ಪಾಂಚ್ವ್ಯಾ ವರ್ಸಾಚಾ ಜಲ್ಮಾಂ ದಿಸಾ ಪರತ್ ಏಕ್ ಪಾವ್ಟಿಂ ತುಮಿ ದಿಲ್ಲ್ಯಾ ಪ್ರೊತ್ಸಾಹಾಕ್ ಆನಿ ಸಹಕಾರಾಕ್ ಭಾಗೆವಂತ್ ಖುರ್ಸಾಚಿ ಅಶೀರ್ವಾದಾಂ ಆಮಾ ಸರ್ವಾಂಚೆರ್ ಮಾಗೊನ್ ಖುರ್ಸಾ ಸಾವ್ಳೆಂತ್ ಬೈಂದೂರ್ಚಿಝಳಕ್ ನಿರಂತರ್ ಉಜ್ವಾಡ್ ಜಾವ್ನ್ ಉರೊಂಕ್ ತುಮ್ಚೆಂ ಮಾಗ್ಣೆಂ ಜಾಂವ್ ಮ್ಹಣ್ ಆಶೆತಾಂವ್.
- ಡೊಲ್ಫಿ ನಜ್ರೆತ್