(ಹಾಂವ್ ಜಲ್ಮೊಂಚಾ ಪಯ್ಲೆಂ ಘಡಲ್ಲೆಂ ಹೆಂ ನೀಜ್ ಘಡಿತ್ ತೀನ್ ವರ್ಸಾಂ ಪಯ್ಲೆಂ ಹಾಂವ್ ಗಾಂವಾಕ್ ಗೆಲ್ಲ್ಯಾವೆಳಿಂ ಮ್ಹಜಾ ಮಾಲ್ಘಡ್ಯಾ ಭಾವಾನ್ ಸಾಂಗ್ತಾನಾ ಆಮಿ ದಾಧೊಶಿ ಹಾಸಲ್ಲ್ಯಾಂವ್ ಆತಾಂಯಿ ತಸಲೆ ಉಡಾಸ್ ಕಾಡ್ನ್ ಆಮಿ ಎಕಾಮೆಕಾಕ್ ಹಾಸಯ್ತಾಂವ್)
ತ್ಯಾ ಎಕಾ ಸನ್ವಾರಾ ಅರ್ಧ್ಯಾ ದಿಸಾಚೆಂ ಇಸ್ಕೊಲ್ ಜಾತಚ್ ಘರಾ ಯೇವ್ನ್ ಜೆವಣ್ ಜಾತಚ್, ಮಜ್ಯಾ ಮಾತ್ಯಾಚೆ ಕೇಸ್ ವಿಪರೀತ್ ವ್ಹಡ್ ವಾಡಲ್ಲೆಂ ದೆಕುನ್ ಆಮ್ಚೊ ಫೈನಾನ್ಸ್ ಮಿನಿಸ್ಟರ್ ಆನಿಂ ಹೆಡ್ ಒಫ಼್ ದ ಡಿಪಾರ್ಟ್ಮೆಂಟ್ ಜಾವ್ನಾಸ್ಚಾ ಆಬಾನ್ ಪೆಂಟೆಕ್ ವಚೊನ್ ಲೆ. ಅಣ್ಣಪ್ಪ ಭಂಡಾರಿಲಾಗಿ ಕೇಸ್ ಕಾಡ್ನ್ ಯೇ ಮ್ಹುಣ್ ಧಾಡ್ಲೆ. ನ್ಹಂಯ್ ಉತ್ರೊನ್ ಗೆಲ್ಯಾರ್ ಸಾಧಾರ್ಣ್ ಪಂದ್ರಾ ಮಿನುಟಾಚಿ ವಾಟ್ ದೆಕುನ್ ಹ್ಯಾಚ್ ವಾಟೆನ್ ಹಾಂವ್ ಚಮ್ಕಾಲೊ.
ಹಿತ್ಲಾಂತ್ ಥಾವ್ನ್ ಭಾಯ್ರ್ ವೆತಾನಾ, ಥಂಯ್ಸರ್ ಗಾದ್ಯಾಂತ್ಲೆ ಉದಾಕ್ ನ್ಹಂಯ್ತ್ ದೆಂವೊನ್ ವಚೊಂಕ್ ಏಕ್ ವಾಟ್ ಆಸಲ್ಲಿ. ತಿ ಆಬಾನ್ ಪರ್ನ್ಯಾ ಫಾತ್ರಾನಿಂ ಬಾಂದುನ್ ಹಾಡಲ್ಲಿ. ತಾಚಾ ವಯ್ಲ್ಯಾನ್ ಧಾಂವೊನ್ ಏಕ್ ಬಾಕ್ಕಾರಾಚಿ ಉಡಿ ಮಾರ್ಲ್ಯಾರ್ ತಿ ಉತ್ರೊವ್ಯೆತ್ . ಹಾಂವೆ ಧಾಂವೊನ್ ತಾಚಾ ವಯ್ಲ್ಯಾನ್ ಉಡಿ ಮಾರ್ತಾನಾ ಮಾಕಾ ’ಲೊಂಗ್ ಜಂಪ್ ’ ಕರ್ಚಿ ಮಜಾ ಆಯ್ಲಿ. ಅಶೆಂಚ್ ಪಾಂಚ್ ಸ ಪಾವ್ಟಿಂ ಪಾಟಿ ಆನಿ ಮುಖಾರ್ ಉಡಿ ಮಾರ್ಲಿ. ಅಶೆಂ ಅಖ್ರೇಚಾ ಪಾವ್ಟಿ ಉಡಿ ಮಾರ್ತಾನಾ ಏಕ್ ಜಳ್ಜಳ್ಚಿ ಚಾರ್ ಆಣ್ಯಾಂಚಿ ಪಾವ್ಲಿ ಮಾಕಾ ಥಂಯ್ಚ್ ಉದ್ಕಾ ದೆಗೆಚಾ ರೆಂವೆರ್ ದಿಸ್ಲಿ. ಹಾಂವೆಂ ಖುಶೆನ್ ತಿ ವಿಂಚ್ಲಿ , ವ್ಹಡ್ಲೆಂ ದಿರ್ವೆಂ ಮೆಳ್ಳೆಂ ತಶೆಂ ಮ್ಹಾಕಾ ಭೊಗ್ಲೆಂ ಆನಿ ಚಡ್ ವೇಳ್ ವಿಭಾಡಿನಾಸ್ತಾಂ ಹಾಂವೆಂ ಪೆಂಟೆಕ್ ಧಾಂವ್ ಮಾರ್ಲಿ.
ತ್ಯಾ ವೆಳಿಂ ಘರಾಂತ್ ಘರಾಂತ್ ತಯಾರ್ ಕೆಲ್ಲಿಂ ತಾಂದ್ಳಾಚಿ ಖಾಣಾಂ ಸೊಡ್ನ್ ಆಂಗ್ಡಿ-ಖಾಣಾಂ ಹಾಡಿನಾತಲ್ಲೆಂ , ಸವಾಯೆಚೊ ಕಾಳ್ ತೊ ಜಾಲ್ಲ್ಯಾವರ್ವಿ ಹಾಂವೆಂ ಆಂಗ್ಡಿಕ್ ವಚೊನ್ ಮ್ಹಜಾ ಪಸಂದೆಚಿ ಸುಮಾರ್ ಖಾಣಾಂ ಘೆವ್ನ್ ಬೊಕಾಯ್ಲಿ ಆನಿಂ ಬೊಕುಲಾಪರಿ ತೊಂಡ್ ಪುಸಿತ್ತ್ ಕೆಲ್ಶಾಚಾ ದುಖಾನಾಂತ್ ರಿಗೊನ್ ಮ್ಹಜೊ ಮಾಂಡೊ ತಾಸುಂಕ್ ತಾಚಾ ರುಕಾಡಾಚಾ ಸ್ಟೂಲಾರ್ ಚಡೊನ್ ಗತ್ತಾರ್ ಬಸ್ಲೊ (ಪಯ್ಶೆಂ ಚಡ್ ಖರ್ಚಾತಾತ್ ದೆಕುನ್ ತೆದಾಳಾ ಹೇರ್ ಕಟ್ಟಿಂಗ್ ಮ್ಹುಳ್ಯಾರ್ ಬೋರ್ ಮಂಡೆ ಕರ್ನ್ ಯೆಂವ್ಚಿ ಆಬಾಚಿ ಖಡಕ್ಕ್ ತಾಕಿದ್ ಆಸ್ತಾಲಿಂ ತಿ ಕಡ್ಡಾಯೆನ್ ಪಾಳುಂಕ್ ಆಸಲ್ಲಿ)
ಆಮ್ಚಾ ಲೆ.ಭಂಡಾರಿನ್ (ಮಿಲಿಟ್ರಿ ಚೊ ಲೆಫ಼್ಟಿನೆಂಟ್ ನೈಂ ಲೆಫ಼್ಟ್ ಹ್ಯಾಂಡೆಡ್ ಯಾ ದಾವೊ ಹಾತ್ ಕಾಮಾಕ್ ಮ್ಹುಖಾರ್ ಆಸ್ಚೊ) ತೀನ್ ಮಿನುಟಾಭಿತರ್ ಮಾತ್ಯಾಕ್ ಉದಾಕ್ ಮಾರ್ನ್ ಆಪ್ಲೊ ವಾಕೊರ್ ಪ್ಯಾಡಾರ್ ಘಸ್ಟುನ್ ಮ್ಹಜೆಂ ಕೇಸ್ ತಾಸುನ್ ಸೊಡ್ಲೆಂ. ಮೊಡ್ಕೊರ್ ಕದೆಲಾ ಥಾವ್ನ್ ಸಕ್ಲಾ ಉಡಿ ಮಾರ್ನ್ ತಾಕಾ ಪಯ್ಶೆಂ ಫಾರಿಕ್ ಕರುಂಕ್ ಚಡ್ಡೆಚಾ ಬೊಲ್ಸಾಂತ್ ಹಾತ್ ಚೆಪ್ತಾನಾ ಆಬಾನ್ ದಿಲ್ಲಿ ಚಾರ್ ಆಣ್ಯಾಚಿ ಪಾವ್ಲಿ ಲಾಗಾನಾತಲ್ಲಿ. ಎಂತಾ ಆಯ್ತಾ.... ದುಡ್ಡ್ ತರ್ಲಿಲ್ಲ್ಯಾ ? ಮ್ಹಣ್ ಭಂಡಾರಿನ್ ವಿಚಾರ್ತಾನಾ “ದುಡ್ಡ್ ಬಿದ್ದ್ ಹೋಯ್ತ್ , ಅಜ್ಜಯ್ಯನತ್ರ ಸಾಂಯಕಾಲ ಕೊಡ್ಲಿಕ್ಕೆ ಹೇಳ್ತೆ....” ಮ್ಹುಣ್ತಾನಾ ತಾಣೆಂ “ಅಕ್ಕ್....ಹೋಗ್ ” ಮ್ಹುಣ್ತಾನಾ ಆಬಾಚೆ ಆನಿ ತಾಚೆಂ ಫ್ರೆಂಡ್ ಶಿಪ್ ಉಪ್ಕಾರಾಕ್ ಪಡ್ಲೆಂ. ಹೆಡ್ಡಾಬರಿ ಮ್ಹಜಾಚ್ ಬೊಲ್ಸಾಂತ್ಲೆ ಪಯ್ಶೆಂ ಗಳವ್ನ್, ತೆಂ ಪಾಟಿ ಮೆಳ್ತಚ್ ತ್ಯಾ ಪಯ್ಶಾನ್ ಖಾಣಾಂ ಬೊಕಾವ್ನ್ ಆತಾಂ ಘರಾ ವೆತಚ್ “ಪಯ್ಶೆಂ ಸಾಂಡುನ್ ಗೆಲೆ” ಮ್ಹುಣ್ ಆಬಾಕ್ ಪರತ್ ಫಟಿ ಸಾಂಗುಂಕ್ ಆನಿಂ ತಾಚಾ ಝಡ್ತೆಕ್ ತಯಾರ್ ಜಾಂವ್ಕ್ ಆಸಲ್ಲೆಂ......
’ದಿನು’-ಬಿಯಾರ್