ಪ್ರೈಮರಿಚೊ ಉಗ್ಡಾಸ್ – By Anthon Byndoor

[ಲ್ಹಾನ್ಪಣಾಚೊ ಯಾದ್ ಅಶೆಂಚ್ ವ್ಹಡ್ ಜಾವ್ನ್ ಜಿವಿತಾಂತ್ಲ್ಯಾ ಜವಾಬ್ದಾರೆಕ್ ಖಾಂದ್ ಮಾರ್ತಾನಾ, ಸಭಾರ್ ರಾಟವಳಿಂತ್ ಸಭಾರ್ ಭೊಗ್ಣಾಂ ವಿಸರ್ನ್ ಸೊಡ್ತಾಂವ್, ಪುಣ್ ಜಲ್ಮೊನ್ ವಾಡ್‍ಲ್ಲೆಂ ಘರ್ ಆನಿ ಪ್ರೈಮರಿ ಇಸ್ಕೊಲ್ ಹಿಂ ದೋನ್ ಮಾತ್ರ್ ಭಾವಾನಾತ್ಮಕ್ ಸಂಬಂಧಾಚಾ ಭಂಡಾರಾಂತ್ಲೆ ಮೊತಿಂಯಾ ಜಾವ್ನ್ ಮತಿಂತ್ ಚಿಡ್ಕೊನ್ಂಚ್ ಆಸ್ತಾ. ಆಂತೋನ್ ಬೈಂದೂರ್ (ಆಂತೋನ್ ರೊಡ್ರಿಗಸ್) ತರ್ನೊ ಲೇಖಕ್ ಆಯ್ಲೆವಾರ್ ಆಪ್ಲ್ಯಾ ಫೆಸ್‍ಬುಕಾಚಾ ಪಾನಾರ್ ಸಭಾರ್ ಕೊಂಕ್ಣಿ ಕವಿತಾ ಬರವ್ನ್ ಆಸಾ. ಬೈಂದೂರ‍್ಚಿಝಳಕ್ ಅಂತರ್ಜಾಳಿಕ್ ಆಪ್ಲೆಂ ಲೇಖನ್ ಧಾಡ್ತಾನಾ ಕಾವ್ಜೆವ್ನ್ ಮ್ಹಳ್ಳ್ಯಾಬರಿಂ ತಾಣೆಂ ಸಾಂಗ್‍ಲ್ಲೆಂ ಬಾಬಾ (ದಾಟ್ಟು) ಹಾಂವ್ ಕಾಂಯ್ ಹೆ‍ಳ್‍ಲ್ಲೊ ಲೇಖಕ್ ನಂಯ್ ಮ್ಹಜ್ಯಾ ಲೇಖನಾಂತ್ ಸಾದಿಂ ಉತ್ರಾಂ ಆಸಾತ್, ಸಾಧ್ಯ್ ಆಸಾ ತರ್ ಫಾಯ್ಸ್ ಕರ್. ಪುಣ್ ಹಾಂವೆ ತಾಕಾ ಜಾಪ್ ದಿಲ್ಲಿಂ ಸುರ್ವಾತ್ ಅಶೆಂಚ್ ಆಸ್ತಾ, ಸಾಹಿತ್ಯ್ ಚಡ್ ಆನಿ ಚಡ್ ವಾಚ್, ಲಿಖ್ಣಿಂ ತುಜಿ ಝರವ್ನ್ಂಚ್ ರಾವ್ ಉತ್ರಾಂಕ್ ಧಾರ್ ಮೆಳೊನ್ ಯಶಸ್ವಿ ಜೊಡ್ತಲೊಯ್.]

– ಡೊಲ್ಫಿ ನಜ್ರೆತ್

ಬೈಂದೂರ‍್ಚ್ಯಾ ವಿಶಾಲ್ ಆನಿ ಸೊಭಿತ್ ಪ್ರಕೃತಿಚ್ಯಾ ಸೊಭಾಯೆನ್ ಸೊಭ್ಚ್ಯಾ ಖುರ್ಸಾ ಗುಡ್ಯಾಚಾ ಪಾಂಯಾಥಳಾ ಆಸ್ಚ್ಯಾ ಇಗರ್ಜೆ ಇಸ್ಕೊಲಾಂತ್ ಶಿಕ್ಷಣ್ ಜೊಡ್‍ಲ್ಲ್ಯಾ ಹಜಾರೊ ವಿಧ್ಯಾರ್ಥಿ ಸಾಂಗಾತಾ ಹಾಂವಿ ಏಕ್ಲೊ ಮ್ಹಣ್ ಸಾಂಗೊಂಕ್ ಭೊವ್ ವರ್ತೊ ಸಂತೊಸ್ ಭೊಗ್ತಾಂ. ಶತಮಾನ್ ಸೊಂಪಯ್ಲಲೆಂ ಹ್ಯಾ ಇಸ್ಕೊಲಾಂತ್ ಉಗ್ಡಾಸಾಚಿ ಪಾನಾಂ ಉಸ್ತುನ್ ಪಳೆಲ್ಯಾರ್ ಇಗರ್ಜೆ ಇಸ್ಕೊಲಾಚೆ ಉಗ್ಡಾಸ್ ಮ್ಹಣ್ಚೆಂ ಮತಿಂತ್ ಜಿವಾಳ್ ಜಾವ್ನಾಸಾ.
ಉಪ್ಪುಂದ, ಆಂಗ್ಡಿಭಾಟ್, ದುರ್ಮಿ, ಕಳಿಯೆಭಾಟ್, ಹೊಳ್ಳಾಭಾಟ್, ಕಲ್ಲಾರ್ ಭಾಟ್, ಚಂದ್ರಕಳಿ, ನಜ್ರೆ ವಾಡೊ, ಬಂಕೇಶ್ವರ್, ಚರ್ಚ್‍ರೋಡ್ ಅಶೆಂ ಇಸ್ಕೊಲಾಚ್ಯಾ ಚಾರಿಂ ಕೊನ್ಶಾಂ ಥಾವ್ನ್ ಯೆಂವ್ಚೊ ಭುರ್ಗ್ಯಾಂಚೊ ಪಂಗಡ್ ಪಳೆಯ್ಲ್ಯಾರ್ ತ್ಯಾ ದಿಸಾಂನಿ ಜಾಯ್ತಿಂ ಜಣ್ ಯೆತಾಲಿಂ. ದೀಸ್ ಉದೆಲೊ ತರ್ ಖಾಂದ್ಯಾರ್ ಪೊತೆಂ, ಹಾತಾಂತ್ ಭುತಿಂ ಘೆವ್ನ್ ಇಸ್ಕೊಲಾಕ್ ಮೆಟಾಂ ಘಾಲ್ತನಾ ಮಾಂಯ್ ಆನಿ ಪಪ್ಪಾ ಆಮ್ಚ್ಯಾ ಫುಡಾರಾಚಿಂ ಸೊಪ್ಣಾಂ ಚಿಂತ್ತಾಲಿ. ಇಸ್ಕೊಲಾಕ್ ವೆಚೆ ದೋನ್-ತೀನ್ ಮೈಲಾ ಪಯ್ಸ್ ಚಲೊನ್‍ಂಚ್ ಇಸ್ಕೊಲಾಕ್ ವೆಚೆಂ ಆಸ್ಲೆಂ.
ಇಸ್ಕೊಲಾಚೆಂ ನಾಯಕ್-ನಾಯಕಿ ನಾಡಗೀತೆ ಸವೆಂ ಅಸೆಂಬ್ಲಿ ಚಲವ್ನ್ ವ್ಹರ್ತಲೆಂ. ಸದಾಂ ಸಕಾಳಿಂಚೆ ಆಸೆಂಬ್ಲಿರ್ ಕ್ಲಾಸಿಂತ್ ಗಲಾಟೊ ಕೆಲ್ಲ್ಯಾಂಚೆ ನಾಂವಾ ವಿದ್ಯಾಮಂತ್ರಿ ಯೇವ್ನ್ ವಾಚುನ್ ಸಾಂಗ್ತಾಲೊ. ಉಪ್ರಾಂತ್ ದಿಸಾಳ್ಯಾರ್ ಛಾಪುನ್ ಆಯಿಲ್ಲೆಂ ಥೊಡಿಂ ಪ್ರಮುಕ್ ಖಬ್ರ್ಯೊ ಎಕ್ಲ್ಯಾನ್ ಮುಕಾರ್ ಯೇವ್ನ್ ವಾಚುನ್ ಜಾತಚ್, ಹೆಡ್ ಮಾಸ್ತೆರ್ ಥೊಡಿಂ ಸೂಚನಾ ದಿತಲೊ. ಅಸೆಂಬ್ಲಿ ಸಂಪೊವ್ನ್ ಕ್ಲಾಸಿಕ್ ಯೆತಚ್ ಟೀಚರ್-ಮಾಸ್ತೆರ್ ಸಗ್ಳ್ಯಾಂಚೆ ಹಾಜರಿ ಆಪಯ್ತಾಲಿಂ, ಉಪ್ರಾಂತ್ ತೆಂ ದೀಸ್ ದಿಲ್ಲೆಂ ಹೋಮ್ ವರ್ಕ್ ದಾಕೊಂವ್ಕ್ ಆಮಿಂ ತಯಾರ್ ಕರ್ತಲ್ಯಾಂವ್, ಹೋಮ್ ವರ್ಕ್ ಕರಿನಾತ್ಲೊ ಮಾತ್ರ್ ಟೀಚರಿನ್ ಮಾರ್ಚ್ಯಾ ಚಿಂಚೆ ಬೊಡಿಯೆಚಾ ಮಾರಾಕ್ ಹಾತ್ ತಾಂಬ್ಡೊ ಜಾಲ್ಯಾರಿ ಕುಲ್ಯಾಕ್ ಪುಸೊನ್ ಥಂಡ್ ಬೊಸ್ತಲೊ.
ಕ್ಲಾಸಿಂತ್ ಟೀಚರ್ ಲಿಸಾಂವಾ ಸವೆಂ, ಸಾಂಸ್ಕೃತಿಕ್ ಚಟುವಟಿಕೊಯಿ ಶಿಕಯ್ತಲಿಂ. ಆಮ್ಚೆಂ ಜಲ್ಮಾಂ ದಿವಸ್ ಆಚರಣ್ ಕರುಂಕ್ ಮಾಯ್ನ್ ದಿಲ್ಲೆಂ ಧಾ ರುಪ್ಯಾಂತ್ "ಆಸೆ" ಚೊಕ್ಲೆಟಾ ಘೆವ್ನ್ ಕ್ಲಾಸಿಂತ್ ವಾಂಟುನ್ ಖೆಲ್ಲೆಂ ದೀಸ್ ಭೋವ್ ಅಪುರ್ಬಾಯೆಚೆಂ, ಸಾಂಜೆರ್ ಘರಾಂ ಪಾವ್ತಾನ ಮಾಂಯ್ ಚಣೆಂ ದಾಳಿಚೊ ಪಾಯ್ಸ್ ರಾಂದುನ್ ಕುಟ್ಮಾಂ ಸಾಂಗಾತಾ ಆಮಿ ದೊಡ್ತೊ ಸಂತೊಸ್ ವಾಂಟುನ್ ಘೆತಲಿಂ. ಇಸ್ಕೊಲಾಂತ್ ಆಮಿ ಖಂಚೆಯ್ ಕಾರಣಾಕ್ ರಜಾ ಘಾಲ್ಯಾರ್ ’ಜ್ವರ’ ಮ್ಹಣ್ ನೀಬ್ ದೀವ್ನ್ ಚುಕಾರಿ ಮಾರ‍್ಚೆ ಸಾಮಾನ್ಯ್ ಜಾವ್ನಾಸ್‍ಲ್ಲೆಂ.
ದೊನ್ಪಾರ ಜೆವ್ಣಾಕ್ ಆಮ್ಚ್ಯಾ ಆಮ್ಚ್ಯಾ ಈಷ್ಟಾಂ ಸಾಂಗಾತಾ ಬೊಸೊನ್ ಮಾಯ್ನ್ ಬಾಂದುನ್ ದಿಲ್ಲೆಂ ಭುತಿಂ ರುಚೆನ್ ಜೆವ್ತಲ್ಯಾಂವ್. ಪಾವ್ಸಾಳ್ಯಾ ದಿಸಾಂನಿ ಜೇವ್ನ್ ಜಾತೆರ್ ಭುತಿಂ ಧುಂವ್ಕ್ ಏಕಾ ಸತ್ರೆಂತ್ ಚಾರ್ ಜಣಾನಿಂ ಬೊರ್ವೆಲಾ ಸರ್ಶಿಂ ವೆಚೆಂ ಆಸ್ಲೆಂ. ದೊನ್ಪಾರಾ ಜೆವ್ಲೆಂಚ್ ಇಲ್ಲೆಂ ವಿರಾಮ್ ಆಸ್ಲೆಂ ನಿಮ್ತಿಂ ಚುಕಾರಿ ಮಾರುನ್ ವಯ್ಲೆಂ ಇಸ್ಕೊಲಾ ಪಾಟಿಂ ಆಸ್ಲ್ಯಾ ಗುಡ್ಯಾರ್ ವಸೊನ್ ಬಿಕ್ಕಿ, ಪಿಡ್ಕುಳಾ, ಕಣ್ಯಾರಾ ಮ್ಹುಣ್ ಬೊಲ್ಸಾಂತ್ ಭರುನ್ ಹಾಡ್ತೆಲ್ಯಾಂವ್. ಕ್ಲಾಸಿಂತ್ ಆನಂದ ಅಶೋಕಾ ಸಾಂಗಾತಾ ಪೊಕ್ರಿ ಕರುನ್ ಮಾಸ್ತೆರಾ ಲಾಗಿಂ ಸಾಂಪ್ಡಲ್ಯಾರ್ ಆಫೀಸ್ ರುಮಾ ಲಾಗಿಂ ಬಸ್ಕಿ ಕಾಡುಂಕ್, ದಿಂಬಿ ಘಾಲುಂಕ್ ನಾ ತರ್ ನಾಳಿಗ್ ಆಪ್ಪಯಿನಿಗ್ ಕರ್ಕೊಂಡ್ ಬಾ ಮ್ಹಣ್ ಮಾಸ್ತೆರ್ ಶಿಕ್ಷಾ ದಿತಲೊ.
ಆರ್ಧವಾರ್ಷಿಕ ಆನಿ ವಾರ್ಷಿಕ ಪರೀಕ್ಷಾ ಮ್ಹಳ್ಯಾರ್ ಕುಡಿಂತ್ ಆಮ್ಚೆಂ ಕುಲ್ಕುಲೊ ಯೆತಾಲೊ. ಪರೀಕ್ಷೆಂತ್ ಭಾರತಾಚಾ ಭೂಪಟ ರಚ್ತನಾ ಕಾಶ್ಮೀರ-ಕನ್ಯಕುಮಾರಿ ನಪಂಯ್ಚ್ ಆಸ್ತಲೆಂ, ಮಳೆಗಾಲಾಚೆಂ ವಿಶೇಷ್ ಪ್ರಬಂಧ ಬರಯ್ತಾನ ಸಗ್ಳ್ಯಾಂಚೆ ಪೇಪರಾರ್ ಕಪ್ಪೆಗಳು ಗೊಟರ್ ಗೊಟರ್ ಎಂದು ಶಬ್ಧ ಮಾಡುತ್ತಿರುತ್ತದೆ ಮ್ಹಳ್ಳೊಂ ಸಬ್ಧ್ ಸಾಮಾನ್ಯ್ ಜಾವ್ನ್ ಆಸ್ತಲೆಂ. ಪ್ರಗತಿ ಪತ್ರಾಚೆಂ ಫಲಿತಾಂಶ್ ದಾಕೊಂವ್ಕ್ ಪಪ್ಪಾ ಮಾಯ್ಚೆಂ ಮುಕಾರ್ ವೆತಾನಾ ತಾಂಬ್ಡೆ ಗೀಟ್ ಪಳೆತಚ್ ತುಕಾ ಇಸ್ಕೊಲಾ ಥಾವ್ನ್ ಸುಟೊವ್ನ್ ಗೊರ್ವಾಂಕ್ ಚರೊಂವ್ಕ್ ಧಾಡ್ತಾ ಮ್ಹಣ್ ಪಪ್ಪಾ ಧಮ್ಕಿ ದಿತಲೊಂ. ದೆಕುನ್ ಆಮ್ಚ್ಯಾಕಿ ಬುದ್ವಂತ್ ಆನಂದ ಆನಿ ಅಶೋಕ ಘರಾಂ ಪಾಂವ್ಚೆ ಪಯ್ಲೆಂತ್ ಪ್ರಗತಿ ಪತ್ರಾರ್ ಆಸ್ಲೆಂ ’ತಾಂಬ್ಡೆ ಗೀಟ್’ ನಪಂಯ್ಚ್ ಕರ್ನ್ ವ್ಹರ್ತಲೆಂ.
ಹಪ್ತ್ಯಾಂತ್ ಏಕ್ ಪಾವ್ಟಿ ಎಕೆಕಾ ಬಾಂಕಾಚಾನಿ ಝಾಡ್ನ್ ನಿತಳ್ ಕರುಂಕ್ ಆನಿ ಸಾರ್ಣಿಚೊ ಹೀರ್ ಘರಾಂ ಥಾವ್ನ್ ವರ್ಸಾಕ್ ಏಕ್- ದೋನ್ ಪಾವ್ಟಿ ವ್ಹರ್ತೆಲ್ಯಾಂವ್. ಸನ್ವಾರಾಚೆಂ ಬಾಲಸಭೆಂತ್ ವಿವಿಧ್ ಸಾಂಸ್ಕೃತಿಕ್ ಕಾರ್ಯಕ್ರಮ್ ಚಲೊವ್ನ್ ಮೊನ್ ಆಮ್ಚೆಂ ದಾಧೊಸಿ ಜಾತಲೆಂ. ಇಸ್ಕೊಲಾಚಾ ವಾರ್ಷಿಕೋತ್ಸವಾಕ್ ಏಕಾ ಮಹಿನ್ಯಾಚೆಂ ಪಯ್ಲೆಂಚ್ ಕೋಲಾಟ, ಡಾನ್ಸ್, ನಾಟ್ಕುಳೊ ತಯಾರಾಯ್ ಕರುನ್ ಟೀಚರಿನ್ ಶಿಕಯ್ಲ್ಯಾ ಗ್ರೂಪ್ ಡ್ಯಾನ್ಸಾಕ್, ಸಗ್ಳ್ಯಾಂಕ್ ಎಕ್‍ಚ್ ರಂಗಾಚೊ ಬುಸ್ಕೊಟ್ ಜಾಯ್ ಆಸ್ಲ್ಯಾನ್ ಪೆಂಟೆಂತ್ಲ್ಯಾ ಹೆಬ್ಬಾರಾ ಆಂಗ್ಡಿಂತ್ ವಸೊನ್ ಪಯ್ಲೆಂತ್ ಸೊದ್ನಾ ಕರ್ತೆಲ್ಯಾಂವ್. ವಾರ್ಷಿಕೋತ್ಸವಾಚೆ ಸಕಾಳಿಂ ’ಉಪಹಾರ’ ಖಾಂವ್ಕ್ ಕೆಸರಿಬಾತ್, ಉಪ್ಪಿಟ್ಟು ಸಾಂಗಾತಾ ಪಿಯೆಂವ್ಕ್ ಖೀರ್ ದಿತಾಲೆಂ. ಇಸ್ಕೊಲಾಚೆಂ ಪಿಕ್ನಿಕ್ ಮ್ಹಣ್ ಸೋಮೇಶ್ವರ್ ಬೀಚ್, ಥಂಯ್ಚ್ ನಾವ್ನ್ ದಿವ್ಳಾಂತ್ ಜೆವ್ನ್ ಗಮ್ಮತ್ ಕೆಲ್ಲೊ ದೀಸ್ ವಿಸ್ರೊಂಕ್ ಜಾಯ್ನಾ.
ಇಸ್ಕೊಲಾಂತ್ ಸದಾಂ ಸಾಂಜೆರ್ ಖೆಳಾಚೆ ಅವ್ದೆರ್ ಕ್ರಿಕೆಟ್, ಕಬಡ್ಡಿ ವಿವಿಧ್ ಖೆಳ್ ಖೆಳ್ನ್ ಘರಾಂ ಪಾಟಿಂ ವೆತನಾ ನ್ಹೆಸ್‍ಲ್ಲೆಂ ಧವೊ ಜಿಬ್ಬೊ ತಾಂಬ್ಡ್ಯಾ ರಂಗಾಕ್ ಬದಲ್ಯಾರಿ ಮಾಂಯ್ ಉಜಾಲ ಘಾಲ್ನ್ ಧುವ್ನ್ ನಿತಳ್ ಕರ್ತಾಲಿ. ಸಾಂಜೆರ್ ರಾಷ್ಟ್ರಗೀತೆ ಗಾವ್ನ್ ಇಸ್ಕೊಲಾಚೊ ದೀಸ್ ಅಖೇರ್ ಜಾತಲೆಂ. ಇಸ್ಕೊಲಾ ಥಾವ್ನ್ ಗೇಟಿಚಾ ಭಾಯ್ರ್ ಚಿಕ್ಕಮ್ಮ ಘರಾಂ ಲಾಗಿಂ ಐಸ್‍ಕ್ಯಾಂಡಿ ಶೀನಣ್ಣ ಆಮ್ಚೆಂ ಖಾತಿರ್ ರಾಕೊನ್ ರಾವ್ತಲೊ. ಐಸ್‍ಕ್ಯಾಂಡಿ ಘೆಂವ್ಕ್ ಬೊಲ್ಸಾಂತ್ ಏಕ್ ರುಪಯ್ ಮೆಳಾತ್ ಮ್ಹುಣ್ ಹಾತ್ ಗಾಲ್ಯಾರ್ ಸಕಾಳಿಂಚ್ ’ಮೊಟಾ ಆಂಗ್ಡಿಂತ್’ ಚಿಕ್ಕಿ ಖಾವ್ನ್ ಖಾಲಿ ಜಾವ್ನ್ ಆಸ್ತಾ ಚಿಕ್ಕಮ್ಮ ಹಾಡಿಂತ್ಲೆ ವಿಂಚುನ್ ಹಾಡ್‍ಲ್ಲೆಂ ಧಾ ಕಾಜುಚೆಂ ಬಿಂಯೊ ಪುಣಿಂ ಶೀನಣ್ಣಾಕ್ ದೀವ್ನ್ ಐಸ್ ಕ್ಯಾಂಡಿ ಖಾಂವ್ಕ್ ಜಾತಲೆಂ, ಅಶೆಂ ಘರಾಂ ವೆತಾನಾ ವೆಗಿಂಚ್ ಪಾವಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಏಕಾ ಇಲೆಕ್ಟ್ರಿಕ್ ಖಾಂಬ್ಯಾ ಥಾವ್ನ್ ಚಲ್ಚೆಂ, ಅನ್ಯೇಕಾ ಖಾಂಬ್ಯಾ ಥಾವ್ನ್ ದಾಂವ್ಚೆ ಅಸ್ಲೆಂ. ಅಶೆಂ ಲ್ಹಾನ್ಪಣಾಚೆಂ ಇಗರ್ಜೆ ಇಸ್ಕೊಲಾಚೆಂ ಮಧುರ್ ಯಾದಿ ಜಿಣ್ಯೆಂತ್ ವಿಸ್ರೊಂಕ್ ಜಾಯ್ನಾ ತಸಲೆಂ ಮ್ಹಣ್ಯೆತ್...