[ಬದ್ಲಾವಣ್ ಸಂಸಾರಾಚೆ ನಿಯಮ್, ಮನ್ಶ್ಯಾಚೆ ಚಾಲ್ತೆಂ ಜೀವನ್ ದಿಸಾನ್ ದೀಸ್ ವೇಗಾನ್ ಬದ್ಲೊನ್ ಆಸಾ, ಆದಿಂ ಆನಿ ಆತಾಂ ಫರಕ್ ಜಾಯ್ತೊ ಆಸಾ. ಸರಿ ಸುಮಾರ್ ಚಾರ್ ದಶಕಾಂ ಆದಿಂ ಆಮ್ಚೆಂ ಜೀವನ್ ಏಕ್ ಸಾದ್ಯಾ ಮಟ್ಟಾರ್ ಚಲ್ತಾಲೆಂ ಆನಿ ತ್ಯಾ ಜಿಣಿಯೆಂತ್ ಸಹಜ್ ವಾ ಸ್ವಾಭಾವಿಕ್ ಸುಖ್-ಸಂತೊಸ್ ಆಸ್‍ಲ್ಲೆಂ, ಪುಣ್ ಆತಾಂ ತಸಲೆಂ ಸಹಜ್ ಸುಖ್-ಸಂತೊಸ್ ಪಯ್ಶೆಂ ದಿಲ್ಯಾರಿ ಮೆಳಾನಾ ವಾ ಪಯ್ಶೆಂ ದಿಲ್ಯಾರಿ ತಾತ್ಕಾಲಿಕ್ ಜಾವ್ನ್ ಮನಿಸ್ ನಿರಾಸ್ಪಣಾಚಾ ಜೀವನಾಂತ್ ಕರ್ಗೊನ್ಂಚ್ ಆಸ್ತಾ. ಕೀತ್ಯಾಕ್ ಅಶೆಂ ಮ್ಹಣ್ ಚಿಂತಾನಾ ಮನಿಸ್ ಆಜ್ ಸಾದೊ ಜಾವ್ನ್ ಜಿಯೆಂವ್ಕ್ ತಯಾರ್ ನಾ, ಹೆಂಚ್ ಫರಕ್ ಅಶೋಕ್, ಬೈಂದೂರ್ ಮನ್ಶ್ಯಾ ಜಿಣ್ಯೆಚೆ ಬದ್ಲಾವಣ್ ಆದಿಂ ಆನಿ ಆತಾಂ ಫರಕ್ ಸೊಧುನ್ ಚಿಂತ್ನಾಕ್ ಅವ್ಕಾಸ್ ಕರ‍್ನ್ ದಿತಾ.]
ಆದಿಂ ಸಕಾಳಿಂ ಮಿಟಾ ಖೊಲ್ಯಾರ್ ಬೊಟಾಂನಿ ದಾಂತ್ ಘಾಸ್ತಲೊಯ್
ಆತಾಂ ಉಟೊನ್ ಬ್ರಶ್ ಆನಿ ಪೇಸ್ಟ್ ಪಯ್ಲೆಂ ಸೊದ್ತಾಯ್
ಆದಿಂ ಉಟ್ಲ್ಯಾ ಮಾಂದ್ರೆರ್ ಮಾಗ್ಣ್ಯಾಂದ್ವಾರಿಂ ದೆವಾಕ್ ಧಿನ್ವಾಸ್ತಲೊಯ್
ಆತಾಂ ಫ್ರಿಡ್ಜ್ಯಾಂತ್ಲ್ಯಾ ಜೂಸಾ ಸವೆಂ ಟಿ.ವಿ. ಸಮೊರ್ ಬೊಸ್ತಾಯ್
ಆದಿಂ ಘರಾಂತ್ಲೆ ಬಾಯ್ರ್ ಸರ‍್ನ್ ವೆತಾನಾ ಸಗ್ಳಿಂ ಜಾತಲಿಂ ಜಮೊ
ವೆಚ್ಯಾ ಫುಡೆಂ ಘೆತಾಲೊಯ್ ಆಲ್ತಾರಿಚ್ಯಾ ಇಮಾಜಿಚೊ ಉಮೊ
ಜಳ್ತ್ಯಾಲ್ಯೊ ಆಂಗ್ಣಾಂತ್ಲ್ಯಾ ಖುರ್ಸಾರ್ ಫುಲಾಂ ಸವೆಂ ದಿವೊ
ಆತಾಂ ಮಾತ್ರ್ ಮೇಟ್ ದೆಂವ್ತಾನಾ ಬಾಯ್ಲೆಚಾ ವೊಂಟಾಚೊ ಚಿವೊ
ಆದಿಂ ಹಾತ್ ಜೊಡ್ನ್ ಮಾಗ್ಚೆಂ ಬೆಸಾಂವ್ ಗೆಲಾಂ ವಿಸ್ರೊನ್
ಮಾಲ್ಗಡ್ಯಾಂಕ್ ಘಾಲಾಂ ಆತಾಂ ಕೊನ್ಶ್ಯಾರ್ ಲೊಟುನ್
ತರ್ನ್ಯಾ-ದಾಕ್ಟ್ಯಾಂಚಿ ಮರ್ಜಿ ದಿಸ್ತಾಂ ಆತಾಂ ಉಟೊನ್
ಹಾಯ್-ಹಲೋ ಮ್ಹಣೊನ್ ಹಾತಾಕ್-ಹಾತ್ ಮೆಳೊವ್ನ್
ಆದಿಂ ಸ್ಟೀಲಾಂಚ್ಯಾ ಬೊಶಿಯೆಂತ್ ಜೆಂವ್ಕ್ ಬೊಸೊನ್ ಧರ್ನಿರ್
ಜೆವಾಣ್ ಜಾತಚ್ ಧುಂವ್ಕ್ ಉದಕ್ ಸದಾಂಯ್ ಬಾಂಯ್ ಕಾಟ್ಯಾರ್
ಆತಾಂ ಮಾತ್ರ್ ಸೊಭ್ತಾ ಜೆವಣ್ ಸಗ್ಳೆಂ ಮೆಜಾರ್
ಪೇಪರ್ ಪ್ಲೇಟ್ ಸವೆಂ ಚುಕಾನಾ ಕಾಂಟೊ-ಕುಲೆರ್
ಆದಿಂ ಶೆತಾಂ ಭಾಟಾಂತ್ ರಾತ್-ದೀಸ್ ಭರ್ ಘೊಳೊನ್
ಕಪಲಾರ್ ದೆಂವ್ಚೊ ಘಾಮ್ ಹಾತ್ ಬೊಟಾಂನಿ ಪಿಳೊನ್
ಆತಾಂ ಸಗ್ಳೆಂ ಭಾಯ್ಲೆಂಚ್ ಮೊಲಾಕ್ ಕಾಣ್ಘೆವ್ನ್
ಎ.ಸಿ. ರೂಮಾಂತ್ ಬಸೊನ್ ಬಾವ್ಲೆಂ ತೊಂಡ್ ಟಿಸ್ಯೂಂತ್ ಪುಸೊನ್
ಆದಿಂ ಸರ್ವಾಂಕಿ ಚಲ್ತಾಲೆಂ ಜಾಂವ್ ತೆಂ ಕಿತ್ಲೆಂಯೀ ದಿಸಾಂಚೆ
ರಾತಿ ಉರುಲ್ಲೆಂ ಶೀತ್ ಗಟ್ಟ್ ಪೇಜೆ ಜೆವಾಣ್ ಸಕಾಳಿಂಚೆ
ಅತಾಂ ಜಾಯ್ ಸಗ್ಳೆಂಚ್ ಫ್ರೇಶ್ ಜಾಂವ್ ತೆಂ ಹೊಟೆಲಾಚೆಂ
ಸರ್ವಾಂಕ್ ಜಾಯ್ ಆಪಾಪ್ಲ್ಯಾ ಮನಾಂ ಪಸಂದೆಚೆಂ
ಆದಿಂ ರಾಂದ್ವಯೆಚೆ ಜೆವಣ್ ಜೇವ್ನ್ ಸದಾಂಯ್
ಮತಿಂತ್ ಚುರುಕ್ ಜಿವಾಂತ್ ಬರೆಂ ಘಟಾಯ್
ಆತಾಂ ಖಾವ್ನ್ ಪಿಜ್ಜಾ-ಬರ್ಗರ್ ಜಿವಾಂತ್ ಗರ್ಜೆ ಭಾಯ್ರ್ ಮೊಟಾಯ್
ನಾನಾಂತಿ ಪಿಡಾ ಕೊಲೆಸ್ಟ್ರೊಲ್, ಸಾಕರ್ ಆನಿ ವಾಯ್
ಆದಿಂ ಶೆಳೆಂ ಶಿತಾನ್ ಆಸ್ತಾಲೆಂ ಘಟ್-ಮೂಟ್ ಉತರ‍್ಲ್ಯಾರಿ ಸತ್ತರ್
ಜಿಯೆತಾಲಿಂ ಗರ್ಜೆ ವಿಣೆಂ ನಾಸ್ತಾನಾ ಕೊಣಾಚೊಯೊ ಆಧಾರ್
ಆತಾಂ ಬರೆಂ ಬರೆಂ ರುಚಿಕ್ ಗಿಳುಂಕ್ ಸದಾಂಚ್ ಇರ‍್ಯಾರ್
ತೀಸ್ ಚಾಳಿಸಾರ್‌‍ಚ್ ದೀಸಾನ್ ದೀಸ್ ಹೊಸ್ಪಿಟ್ಲಾಚಾ ದಾರಾರ್
ಸಂಸಾರ್ ಫುಡೆಂ ಫುಡೆಂ ಸರ‍್ತಾನಾಂ ಆಮಿಂ ಚಮ್ಕಲ್ಯಾಂವ್
ಪಳೇವ್ನ್ ಶಿಕ್ಚೆಂ ಆನಿ ಹಾಂಗಾ ಸಭಾರ್ ಲಿಸಾಂವ್
ಜಿಣ್ಯೆ ಪಯ್ಣ್ ಜಾವ್ನಾಸಾ ಎಕ್ ಮಿಸಾಂವ್
ತ್ಯಾ ಪಯ್ಣಾರ್ ಜಾಲ್ಯಾ ಪ್ರಾಯ್ ಮಟ್ವೆಂ ತರೀ ನವೆಂಸಾಂವ್.
– ಅಶೋಕ್, ಬೈಂದೂರ್