ಮೊಗಾಂ ಬೈಂದೂರಾಂ

ವಿಶಾಲ್ ಕೊಂಕಣ್ ಕರಾವಳಿಚ್ಯಾ ಬಡ್ಗಾ ತೆವ್ಶಿನ್ ಪ್ರಾಕ್ರತಿಕ್ ಸೊಭಾಯೆಚೆ ಪಾಚ್ವೆ ಕಾಪಾಡ್ ನ್ಹೆಸುನ್ ಸೊಬ್ಚೊ ಎಕ್ ಗಾಂವ್. ಪಯ್ಶಿಲ್ಯಾನ್ ದಿಷ್ಟ್ ಲಾಯ್ಲ್ಯಾರ್ ಎಕಾ ಪ್ರಾಸ್ ಎಕ್ ಉಂಚ್, ಮಜ್ಬುತಾಯೆನ್ ಸೊಭ್ಚೆಂ ತೀನ್ ಉಬಾರ್ ಕೊಡಚಾದ್ರಿಚೆ ಗುಡೆಂ, ವಯ್ಲ್ಯಾ ಉತ್ತರಾಕ್ ವಾಟ್ ಧರುನ್ ಗೆಲ್ಯಾರ್ ವಿಸ್ತಾರುನ್ ಎಕಾಚ್ ದೀಷ್ಟಿಕ್ ಪಳೆಂವ್ಕ್ ಮೆಳ್ಚೊ ಜಾಗೊ ಒತ್ತಿನಣೊ, ಒತ್ತಿನಣೇಚ್ಯಾ ತ್ಯಾ ಉಬಾರ್ ಪ್ರದೇಶಾ ಥಾವ್ನ್ ಏಕ್ ಝಳಕ್ ಸಕ್ಲಾ ಘಾಲಿಂ ತರ್ ಮತಿಕ್ ಭೊಗ್ಚೆಂ ಸುಖ್ ದುಸ್ರೆಂ ನಾಂ, ಅಶೆ ಧರ್ತೆಚ್ಯಾ ವಿವಿಧ್ ರಚ್ನೆಚೆರ್ ಸುಕ್ಣ್ಯಾ ದೀಷ್ಟ್ ಯೆಟುನ್ ಕುಶಿನ್ ಘುಂವ್ತಾನಾ ಗಂಭೀರ್ ರಾಜ್ ಗಂಭೀರ್ ಆವಾಜ್ ಕರುನ್ ಓತ್ತಿನಣೆಚ್ಯಾ ಗುಡ್ಯಾಚ್ಯಾ ಗರ್ಭಾಂತ್ ಘುಸೊನ್ ಹೆವ್ಶಿನ್ ತೆವ್ಶಿನ್ ವೆಚೆಂ ಕೊಂಕಣ್ ರೈಲಾಚಿ ಗಾಡಿ ತ್ಯಾ ದೀರ್ಘ್ ಸುರಗಾಂತ್ಲ್ಯಾನ್ ಪಾಶಾರ್ ಜಾತಾನಾ ತಿ ಸೊಭಾಯ್ ಪಳೆಂವ್ಚ್ಯಾ ದೊಳ್ಯಾಂಕ್ ಅಪ್ರೂಪ್ ಫೆಸ್ತ್ ಚ್ ಸಯ್, ತೆನ್ಕಾಂ ಥಾವ್ನ್ ಯೆಂವ್ಚ್ಯಾ ಉದೆಂತಿ ಮಂಗ್ಳುರ್ಗಾರಾಂಕ್ ತಶೆಂ ಉಡುಪಿ ಥಾವ್ನ್ ಯೆತೆಲ್ಯಾಂಕ್ ಆಪ್ಲ್ಯಾ ಘರಾಂತ್ ಸ್ವಾಗತ್ ಕರುಂಕ್ ಉಬೆಂ ಆಸಾತ್ ತಶೆಂ ಲಾಂಬ್ ವಾಡೊನ್ ಮಡ್ಲಾಂ ಶಿವ್ಡಿ ಹಾಲೊನ್ ಆಪ್ಣಾ ಥಂಯ್ ಯೆತೇಲ್ಯಾ ಸೈಯ್ರಾಂಕ್ ತಕ್ಲಿ ಭಾಗಾವ್ನ್ ಮಾನಾನ್ ಯೆವ್ಕಾರ್ ಮಾಗ್ಚಿಂ ತಿಂ ನಾರ್ಲಾಂ ಮಾಡಾಂಚಿ ರಾಸ್ ಮ್ಹಜ್ಯಾ ಗಾಂವಾಕ್ ಪಾಂಯ್ ತೆಂಕ್ತಾನಾಂಚ್ ಸಾವ್ಳೆಚೆ ಸಾಂತೆ ಫುಲಯ್ತಾ. ತೆಂ ಬಡ್ಗಾಕ್ ವಿಸ್ತಾರುನ್ ಆಸ್ಚೆಂ ಭಾಂಗ್ರಾಳ್ಯಾ ರೆಂವೆ ಕಣಾಚೆ ಮ್ಹಜ್ಯಾ ಗಾಂವ್ಚೆ ವ್ಹಡ್ ಆಂಗಾಣ್ ದೀಸ್ ಭರ್ ವಯ್ಲ್ಯಾನ್ ಧರ್ತೆಚಿ ಭಂವ್ದಿ ಮಾರುನ್ ಸಾಂಜೆಚಾ ವೆಳಾ ತಾಂಬ್ಡೊ ಭಿರಾಂಡ್ ಜಾವುನ್ ಯೆಂವ್ಚ್ಯಾ ಸುರ್ಯಾಕ್ ಆಪ್ಣಾಶಿ ವೊಡುನ್ ಥಂಡಾಯ್ ದಿಂವ್ಚೊ ತೊ ಅರ್ಬಿ ದರ್ಯೊ ಆನಿ ಥಂಯ್ಚೆ ಪ್ರವಾಸಿಕ್ ದೀಷ್ಟ್ ಆಪ್ಣಾಂ ಥಂಯ್ ಯೆತೆಲ್ಯಾ ಹರ‍್ಯೇಕಾ ಸೈಯ್ರಾಕ್ ಹಾತ್ ವೊಡ್ಡಾವ್ನ್ ಆಪಯ್ತಾ ಆನಿ ಆಪ್ಣಾಚೆಂ ಸೊಭಾಯ್ ಚಾಕುಂಕ್ ಭುಲಯ್ತಾ. ಹ್ಯಾ ಸರ್ವಾಂ ಮಧೆಂ ನವ್ರ್ಯಾ ನ್ಹೆಸಾಣ್ ನ್ಹೆಸೊನ್ ಬೋವ್ ಗರ್ವಾನ್ ಸೊಬ್ಚೊ ತೊ ಗಾಂವ್ ಮ್ಹಜೊ ಬೈಂದೂರ್ ಎಕಾ ಕಾಳಾರ್ ಬಿಂದು ಋಷಿ ಸನ್ಯಾಸಿ ಹ್ಯಾ ಜಾಗ್ಯಾರ್ ಧ್ಯಾನ್ ಕರ್ನ್ ಆಸ್ತಾಲೊ ಜಾಲ್ಲ್ಯಾನ್ ಸುರ್ವೆರ್ ಹ್ಯಾ ಗಾಂವಾಕ್ ಬಿಂದುನಾಡು, ಬಿಂದುಪುರ ಉಪ್ರಾಂತ್ ಬಿಂದೋರ ಕ್ರಮೇಣ್ ಬೈಂದೂರ್ ಮ್ಹಣೊನ್ ನಾಂವ್ ಆಯ್ಲೆಂ ಮ್ಹಣ್ ಥೊಡೆಂ ಜಾಣಾರಿ ಅಭಿಪ್ರಾಯ್ ಉಚಾರ್ತಾತ್. ದೆವಾಚೆ ಭಕ್ತ್, ಮಾಗ್ಣೆಂ ರಜಾರ್ ತಶೆಂಚ್ ದಿಸ್ಪೊಡ್ತೆ ಕಷ್ಟಿ ವಾವ್ರಾಚಾ ಜೀವನಾಚೆರ್ ಹೊಂದೊನ್ ಆಸ್ಚ್ಯಾ ಹ್ಯಾ ಗಾಂವಾಂತ್ ಹಿಂದು, ಮುಸ್ಲಿಮ್ ಆನಿ ಕ್ರಿಸ್ತಾಂವ್ ಹ್ಯಾ ತೀನ್ ಜಾತಿಂಚಾ ಧರ್ಮಾ ಥಂಯ್ ಭಾವ್-ಭಾದಂವ್ಪಣ್ ವಿಶೇಸ್ ರಿತೀನ್ ಆಸೊನ್ ಶಾಂತ್ ರಿತೀಚೊ ಗಾಂವ್ ಮ್ಹಣ್ ನಾವಾಡ್ಲಾ. ಹಿಂದು ಆನಿ ಮುಸ್ಲಿಮ್ ಲೋಕ್ ಕ್ರಿಸ್ತಾಂವ್ ಲೊಕಾಕ್ ವರ್ತ್ಯಾ ಮಾನಾನ್ ಲೆಖ್ತಾತ್.
ಬೈಂದೂರ್ಚಾ ಸರ್ವ್ ಕ್ರಿಸ್ತಿ ಭಾವಾಡ್ತ್ಯಾಂಕ್ ಎಕಾ ಜಾಗ್ಯಾರ್ ಎಕಾ ಆಂಗ್ಣಾಂತ್ ಜಮೊ ಕರುನ್ ಆಪ್ಣಾಚಾ ಪಾತ್ರೊನಾಕ್ ಹೊಗಳ್ಸುಂಕ್, ತಾಚಿ ಸ್ತುತಿ ಗಾಂವ್ಕ್, ಆರಾಧಾನ್ ಕರುಂಕ್ ಎಕ್ವಟಾಂವ್ಚೊ ಪವಿತ್ರ್ ಜಾಗೊ ಭಾಗೆವಂತ್ ಖುರ್ಸಾಕ್ ಸಮರ್ಪಿಲ್ಲೆ ದೈವಿಕ್ ತೆಂಪ್ಲ್ ಸರಿ ಸುಮಾರ್ ೧೫೦ ವರ್ಸಾಂಚೆ ಲಾಂಬ್ ಕಾಳಾಚೆ ಇತಿಹಾಸ್ ಆಸ್ಚಿಂ ಹಿ ಫಿರ್ಗಜ್ ಸುರ್ವೆರ್ ಲಾಗ್ಶಿಲ್ಯಾ ಗಂಗೊಳ್ಳಿ ಫಿರ್ಗಜೆಚಾ ಅಶ್ರಯ ಖಾಲ್ ಆಸ್ ಲ್ಲಿಂ ಉಪ್ರಾಂತ್ ಎಕ್ ಸ್ವತಂತ್ರ್ ಫಿರ್ಗಜ್ ಜಾವ್ನ್ ರಚಿತ್ ಜಾಲಿಂ. ತೆರಾ ವರ್ಸಾಂ ಪಯ್ಲೆಂ ಪರ್ನಿಂ ಇಗರ್ಜ್ ಮೊಡುನ್ ಆತಾಂಚಿ ನವಿ ಇಗರ್ಜ್ ಫಕತ್ ನೋವ್ ಮಹಿನ್ಯಾನಿ ಬಾಂದಾಪ್ ಉಬಾರ್ ಲ್ಲೆಂ ಜಾವ್ನಾಸೊನ್, ವಿಶಿಷ್ಟ್ ಶೈಲೆಚೆ ಬಾಂದಾಪ್ ಜಾವ್ನಾಸಾ. ಕರಾವಳಿಚೆ ತಡಿರ್ ಸೊಭ್ಚ್ಯಾ ಇಗರ್ಜೆಚಾ ಭೊಂವಾರಿ ಕಿರಾಂಚೆ ಗಾಯನ್ ಆಯ್ಕೊಂಚೊ, ಮೊರಾಚೆ ನಾಚ್ ಪಳೆಂವ್ಚೊ ಸಾಂಗಾತಾ ಮೌನ್ ಆನಿ ಪ್ರಶಾಂತ್ ಜಾಗೊ. ಇಗರ್ಜೆಚಾ ದಾರ್ವಟ್ಯಾ ಮುಖಾರ್ ಉಬೊ ರಾವ್ಲ್ಯಾರ್ ಖಂಚೊಯ್ ನಾಸ್ತಿಕ್ ಇಗರ್ಜೆಕ್ ಭೆಟ್ ದಿನಾಸ್ತಾನಾ ಪಾಟಿ ಪರ್ತಸೊನಾ. ಇಗರ್ಜೆ ಭಿತರ್ ದಿಷ್ಟ್ ಲಾಯ್ಲ್ಯಾರ್ ಸೊಭಿತ್ ಆಲ್ತಾರ್, ಆಲ್ತಾರಿರ್ ಖುರ್ಸಾರ್ ಉಮ್ಕಾಳ್ಚ್ಯಾ ಜೆಜುಚೆ ರುಪ್ಣೆಂ, ಚಾರ್ ಯೀ ಕುಶಿನ್ ಸಾಂತಾ-ಭಕ್ತಾಂಚೆ ಇಮಾಜ್ಯೊ ತೆಂಪ್ಲಾಚೆ ಭಿತರ್ಲಿ ಸೊಭಾಯ್ ದೆವಾ ಥಂಯ್ ಅತ್ಮೀಕ್ ಸಂಭಾಷಣಾಕ್ ವೊಡುನ್ ಹಾಡ್ತಾ.