[ವೇಳ್-ಕಾಳ್ ಬದಲ್ಲಾ, ತ್ಯಾ ತೆಕಿದ್ ಮನ್ಶ್ಯಾ ಜಿಣ್ಯೆ ರೀತ್ ಬದಲ್ಲ್ಯಾ, ಆದಿಂ ಗಿಮೆ ದಿಸಾಂತ್ ಪಾವ್ಸಾಳ್ ಫುಡ್ ಕರುಂಕ್ ಜಾಯ್ತೆಂ ತಯಾರಿ ಆಸ್ಲ್ಲಿಂ. ಸಾದೆ ಜಿಣ್ಯೆಂತ್ ಕಷ್ಟಾಂ-ಸಂಕಷ್ಟಾಂಚೆ ಭೊರ್ ತರೀ ಶಿರಾಂಧರಿಚಾ ಪಾವ್ಸಾಂತ್ ಭುರ್ಗ್ಯಾಂಚಾ ಭುಕೆ ಆನಿ ರುಚಿಚಾ ವೊಡಿಂಕ್ ಖಾಣ್-ವಸ್ತು ತಯಾರ್ ದವ್ರುಂಕ್ ಆವಯ್ ಜಾಗ್ರುತ್ ತರ್, ಪಾವ್ಸಾಚೊ ಥೆಂಬೊಯಿ ಘರಾ ಭಿತರ್ ಯೆನಾಸ್ತಾ ಆಪ್ಲ್ಯಾ ಕುಟ್ಮಾಕ್ ಶಾಭಿತ್ ಸಾಂಬಾಳುಂಕ್ ಘರಾಕ್ ಮೊಡ್ಲಾಂನಿ ಸುರಕ್ಷಿತ್ ದವರುಂಕ್ ಪೆಚಾಡ್ತಲೊ ತೊ ಬಾಪುಯ್, ಅಸಲಿಂ ಭೊಗ್ಣಾಂ ಆತಾಂ ಉಡಾಸ್ ಮಾತ್ರ್. ಜೊನ್ಸನ್, ಬೈಂದೂರ್ ಆದಿಂ ಪಾವ್ಸಾಳ್ಯಾಕ್ ತಯಾರಿ ಜಾಂವ್ಚೆ ಅಶೆಂ ಏಕ್ ಉಗ್ಡಾಸ್ ಪರತ್ ಜಿವಾಳ್ ಕರ್ತಾ, ಫೆಸ್‍ಬುಕಾರ್ ತವಳ್, ತವಳ್ ಕವಿತಾ ಬರವ್ನ್ ಆಸ್ಚೊ ಜೊನ್ಸನ್ ತಾಚಾ ಕವಿತೆಂತ್ ಚಡಾವತ್ ಮನ್ಶ್ಯಾಪಣ್ ಆನಿ ಮನ್ಶ್ಯಾ ಹಕ್ಕಾಂ ವಿಶಿಂ ಆಟಾಪ್ಲ್ಯಾತ್. ಆದಿಂ ಘರಾಂತ್ ಬಾಪುಯ್ ಪಾವ್ಸಾಳ್ ಫುಡ್ ಕರುಂಕ್ ತಾಚಾ ತಯಾರಾಯೆಚಿ ಭೊಗ್ಣಾಂಚಿ ವೊಡ್ ಹ್ಯಾ ಕವಿತೆಂತ್ ಸೊಭಿತ್ ರೀತಿನ್ ಆಟಾಪ್ಲ್ಯಾ.]
– ಡೊಲ್ಫಿ ನಜ್ರೆತ್
ಬಾಬಾನ್ ಶಿಂವ್‌ಲ್ಲಿಂ ಮೊಡ್ಲಾಂ
ಪಾವ್ಸಾಳ್ಯಾಚೊ ಮ್ಹಯ್ನೊ ಲಾಗಿಂ ಆಯ್ಲೊ
ಬಾಬ್ ಆಸ್ಲೊ ತರ್ ಮೊಡ್ಲಾಂ ಶಿಂವೊನ್
ಸಗ್ಳೆಂ ತಯಾರ್ ದವರ್ತೊ ಕೊಣ್ಣಾಂ..
ಪೆಟೊ ಬಾಂದ್ಚ್ಯಾ ಜಾಗ್ಯಾರ್
ಚಾರ್ ಮೊಡ್ಲಾಂಚೊ ಆಡೊಸ್
ತಯಾರ್ ಕೆಲ್ಲೊ ಬಾಬಾನ್
ಗೊಟ್ಯಾ ಪಾಕ್ಯಾಕ್ ಮೊಡ್ಲಾಂ ಶಿವೊಂನ್
ರಾವ್ಳೆರ್‌ಚ್ಚ್ ಬಾಂದ್‌ಲ್ಲೆಂ ಬಾಬಾನ್.
ಕುಂಕ್ಡಾಂ ಘುಡ್ ಮಾತ್ಯೆನ್ ಬಾಂದುನ್,
ಶೆಣಾನ್ ರಂಗವ್ನ್
ಕೊಸ್ಳೊನ್ ಪಡಾತ್ ಮ್ಹಳ್ಳ್ಯಾ ಭಿಯಾನ್
ದೊನ್‌ಯೀ ಕುಶಿಂನಿ ಮೊಡ್ಲಾಂ ಶಿಂವೊನ್
ಭದ್ರತಿ ಕೆಲ್ಲಿಂ ಬಾಬಾನ್
ಘರ್ಚ್ಯಾ ಪಾಟ್ಲ್ಯಾ ರುಕಾಡಾಚ್ಯಾ ಜನೆಲಾಕ್
ಝಡ್ ವಾರೆಂ ಮಾರ್ತಲೆಂ ಜಾಲ್ಲ್ಯಾನ್
ಆಸ್ಲ್ಲಿಂ ಮೊಡ್ಲಾಂಯ್ ಕಾಬಾರ್ ದೆಕುನ್
ದುಲ್ಸಿನ್ ಬಾಯೆಗೆಲಿಂ ಥೊಡಿಂ ಹಾಡ್ನ್
ಶಿಂವ್‌ಲ್ಲಿಂ ಬಾಬಾನ್.
ಘರ್ಚೆಂ ಪಾಕೆಟಿಯೀ ಕಾಜಾರಾಚ್ಯಾ
ಮಾಟ್ವಾಬರಿ ಸಜಯಿಲ್ಲ್ಯಾ ಬಾಬಾನ್
ಪಾವ್ಸಾ ಪಯ್ಲೆ
ಮೊಡ್ಲಾಂ ಶಿಂವ್ಚೆಂ ಕಾಮ್
ಸಂಪಂವ್ಚೆಂ ಆಸ್‌ಲ್ಲೆಂ...
ಕಾಂಯಿಚ್ ಬಾಕಿ ದವರಿನಾಸ್ತಾನಾ
ಪೂಣ್...
ಅಂವ್ದು ಪಾವ್ಸಾಳ್ ಸುರು ಜಾಲ್ಯಾ, ಶಿರಾಂಧಾರಿಚ್ಯಾ ಪಾವ್ಸಾಂತ್
ಸತ್ರಿ ಫುಲವ್ನ್ ಘರ್ಚ್ಯಾ ಹೆಣೆಂ ತೆಣೆಂ ತಿಳ್ಳ್ಯಾರ್‌ಯೀ...
ಮೊಡ್ಲಾಂ ದಿಸ್ಲಿನಾಂತ್...
ಮೊಡ್ಲಾಂ ಶಿಂವ್ಚೊ ಬಾಬ್‌ಯೀ ದಿಸ್ಲೊನಾ...!
ದೊಳ್ಯಾ ಇಡ್ಯಾಂ ಥಾವ್ನ್ ಹಾತಾರ್ ಗಳ್‌ಲ್ಲಿ
ದುಕಾಂ ದಿಸ್ಲಿಂ ಶಿವಾಯ್..
ಹ್ಯಾ ಪಾವ್ಟಿಚ್ಯಾ ಪಾವ್ಸಾಳ್ಯಾಂತ್ ಬಾಬಾಚೊ ಉಡಾಸ್ ಮಾತ್ರ್ ಆಸ್‌ಲ್ಲೊ,
ತೊ ನಾತ್‌ಲ್ಲೊ.