ಖುರ್ಸಾಚೆ ಭಕ್ತಿಪಣ್:
"ಜಶೆಂ ಮೊಯ್ಜೆನ್ ಅರಣ್ಯಾಂತ್ ಸರ್ಪಾಕ್ ಉಬಾರ್ಲೊ, ತಶೆಂ ಮ್ಹನ್ಶ್ಯಾಪುತಾಕ್ ಉಂಚ್ ಉಬಾರುಂಕ್ ಜಾಯ್. ತವಳ್ ತಾಕಾ ಸತ್ಮಾನ್ತಲ್ಯಾ ಹರ್ಯೆಕ್ಲ್ಯಾಕ್ ಸಾಸ್ಣಿಕ್ ಜಿವಿತ್ ಲಾಭ್ತಲೆಂ" (ಜುವಾಂವ್ 3:14-15)
ಖುರ್ಸಾಚೆ ಚಿಂತಾಪ್ ಪುರಾತನ್ ಕಾಳಾಚೆಂ ಜಾವ್ನಾಸಾ. ದೆವಾಚಾ ಯೋಜನಾ ಖಾಲ್ ಜೆಜು ಸಂಸಾರಾರ್ ಮನಿಸ್ ಜಾವ್ನ್ ಯೆಂವ್ಚ್ಯಾ ಪಯ್ಲೆಂಚ್ ಖುರ್ಸಾ ವಿಷ್ಯಾಂತ್ ಲೊಕಾಕ್ ಕಳಿತ್ ಆಸ್‍ಲ್ಲೆಂ. ಖುನಿಗಾರಾಂಕ್, ವ್ಹಡ್ ಚೊರಾಂಕ್, ಸಮಾಜೆಂತ್ಲ್ಯಾ ವ್ಹಡ್ ಪಾತ್ಕ್ಯಾಂಕ್, ದೇಶ್ ದ್ರೋಹಿಂಕ್ ಆನಿ ಧರ್ಮ್ ವಿರೋಧ್ ವೆಚಾ ವ್ಯಕ್ತಿಂಕ್ ಖುರ್ಸಾಚಾ ಮರ್ಣಾಚಿ ಶಿಕ್ಷಾ ದೀವ್ನ್ ಜಿವೆಶಿಂ ಮಾರ್ಚಿ ರಿವಾಜ್ ರೊಮಾಂತ್ ತಶೆಂ ಜೆರುಜಲೆಮಾಂತ್ ಚಾಲ್ತೆಂ ಆಸ್‍ಲ್ಲಿ. ಖುರ್ಸಾಚೆ ಮರಣ್ ಮೆಲ್ಲೊ ವ್ಯಕ್ತಿ ದೆವಾ ಥಾವ್ನ್ ಶಿರಾಪ್ ಜೊಡ್ಲಲೊ ಮ್ಹಳೆಂ ಚಿಂತಾಪ್ ಜೆಜುಚಾ ಕಾಳಾರ್ ಲೊಕಾಂಕ್ ಆಸ್‍ಲ್ಲೆಂ, ಅಶೆಂ ಖುರಿಸ್ ಜುದೆವಾಂಕ್ ಅಕ್ಮಾನಾಚೊ, ನಾಲಿಸಾಯೆಚೊ ಅನಿ ಲಜೆಚೊ ಪ್ರತೀಕ್ ಜಾವ್ನಾಸ್‍ಲ್ಲೊ. ಪುಣ್ ದೆವಾಚಿ ಮಾಂಡಾವಳ್ ವಿಚಿತ್ರ್! ಹೊಚ್ಚ್ ಖುರಿಸ್ ಆಪ್ಲ್ಯಾ ಪುತಾ ಜೆಜು ಕ್ರಿಸ್ತಾ ಮಾರಿಫಾತ್ ಮ್ಹನ್ಶ್ಯಾಕುಳಾಚೆ ಸೊಡ್ವಣೆಚೆ ಹಾತೆರ್ ಜಾವ್ನ್ ಬದ್ಲುನ್ ಕುರ್ಪೆಚಿ ಝರ್ ಹ್ಯಾ ಖುರ್ಸಾ ಥಾವ್ನ್ ಮ್ಹನ್ಶ್ಯಾಕುಳಾಕ್ ಮೆಳಾಶೆಂ ಕೆಲೆಂ. ಅಶೆಂ ಖುರಿಸ್ ಆಜ್ ಆಮ್ಕಾಂ ಮೊಗಾಚೊ, ಮಾನಾಚೊ, ಗೌರವಾಚೊ ಆನಿ ಅಭಿಮಾನಾಚೊ ಘುರ್ತ್ ಜಾಲಾ. ಸುಮಾರ್ ಕ್ರಿ.ಶ. 326 ಇಸ್ವೆಂತ್ ಸಾಂತ್ ಹೆಲೆನಾನ್ ಜೆಜುಚೊ ಖುರಿಸ್ ಸೊದುನ್ ಕಾಡ್ಲೊ ಆನಿ ತಾಚೆ ಉಪ್ರಾಂತ್ ಖುರ್ಸಾಚೆ ಭಕ್ತಿಪಣ್ ಆರಂಭ್ ಜಾಲೆಂ. ಖುರ್ಸಾಕ್ ನಮಾನ್, ಖುರ್ಸಾಚಿ ವಾಟ್, ಖುರ್ಸಾಚಾ ರೆಲಿಕಾಂಚೆ ಭಕ್ತಿಪಣ್ ಸುರು ಜಾಲೆ ಆಸೊನ್ ಖುರಿಸ್ ಭಕ್ತಿಪಣಾಚೊ, ಮಾಯಾಮೊಗಾಚೊ ಆನಿ ಶಾಂತಿ-ಸಮಾಧಾನೆಚೊ ಕ್ರಿಸ್ತಾವಾಂಕ್ ಭಾಯ್ಲೊ ಘುರ್ತ್ ಜಾವ್ನ್ ಆಜ್ ಸಂಸಾರಾರ್ ಖುರ್ಸಾಕ್ ಮಾನ್ ಕರುನ್ ಆರಾಧಾನಾಚೆ ಇಗರ್ಜೊ ಆನಿ ಪೂನ್ ಶೆತಾಂ ಆಸಾತ್. ಹಾಂಗಾಸರ್ ಲೋಕ್ ಖುರ್ಸಾಚಾ ಪಾಂಯಾ ಥಳಾಂ ಯೇವ್ನ್ ಖುರ್ಸಾಕ್ ಮಾನ್ ಕರುನ್, ಜೆಜು ಕ್ರಿಸ್ತಾಚೆ ಸೊಡ್ವಣ್ ನಿಯಾಳ್ನ್ ದೆವಾಚಾ ಮೊಗಾಚೊ ಅನ್ಭೊಗ್ ಜೊಡ್ತಾತ್. ಅಶೆಂ ದೈವಿಕ್ ಸಕ್ತೆಚೊ ಅನ್ಭೊಗ್ ಜೊಡುನ್ ಖುರ್ಸಾ ಸಾವ್ಳೆಂತ್ ರಾವೊನ್ ಸಾಸ್ಣಾಚೆ ಜಿವಿತ್ ಜೊಡುಂಕ್ ಆಶೆತಾತ್. ಅಸಲೆಂ ಏಕ್ ಪವಿತ್ರ್ ಜಾಗ್ಯಾಕ್ ತುಮಿ ಭೆಟ್ ದಿಂವ್ಕ್ ಆಶೆತಾತ್ ತರ್ ದಿಯೆಸೆಜಿಚೆ ಅಖ್ರೇಕ್ ಆಸ್ಚ್ಯಾ ಬೈಂದೂರ್ ಫಿರ್ಗಜೆಕ್ ಸೊಭಿತ್ ಸುಂದರ್ ಖುರ್ಸಾ ಗುಡೊ ಆಸೊನ್ ದೆವಾಚೊ ದೈವಿಕ್ ಉಲೊ ಹ್ಯಾ ದೊಂಗ್ರಾರ್ ಭೆಟ್ ದಿಂವ್ಕ್ ವೊಡುನ್ ಹಾಡ್ತಾ.
ಖುರ್ಸಾ ಗುಡ್ಯಾಚಿ ಚರಿತ್ರಾ ಆನಿ ಭಕ್ತಿಪಣ್:
ಬೈಂದೂರ್ ಫಿರ್ಗಜ್ ಭಾಗೆವಂತ್ ಸಾಂತ್ ಖುರ್ಸಾಕ್ ಸಮರ್ಪಿಲ್ಲಿ ಇಗರ್ಜ್ ಜಾವ್ನಾಸ್ತಾ, ಇಗರ್ಜೆಕ್ ಸೊಭಿತ್ ಗುಡೊ ಆಸೊನ್ ಬೈಂದೂರ್ ಫಿರ್ಗಜೆಚಾ ಕ್ರೀಸ್ತಿ ಪರ್ಜೆಚೊ ಉಗಮ್ ಸ್ಥಾನ್ ಜಾವ್ನಾಸಾ. ಚರಿತ್ರೆಚಾ ಆಧಾರಾನಿಂ ಆರಂಭಾರ್ ವ್ಯಾಪಾರ್-ವಹಿವಾಟ್ ಚಲಂವ್ಚ್ಯಾ ಗೊಂಯ್ಕಾರ್ ಕ್ರಿಸ್ತಾಂವಾಂನಿ ಹ್ಯಾ ಗುಡ್ಯಾರ್ ರುಕಾಚೊ ಖುರಿಸ್ ಉಬಾರುನ್ ಭಕ್ತಿಪಣ್ ಆರಂಭ್ ಜಾಲ್ಲೆಂ ಮ್ಹಣೊನ್ ಕಳೊನ್ ಯೆತಾ. ಉಪ್ರಾಂತ್ 1935 ಇಸ್ವೆಚಾ ಜನೆರ್ ಮ್ಹಹಿನ್ಯಾಚಾ 22 ತಾರೀಕೆರ್ ತವಳ್ಚೆ ಫಿರ್ಗಜ್ ವಿಗಾರ್ ಮಾ| ಬಾ| ಲಿಯೊ ಪಿ. ಡಿ'ಸೋಜಾ ಹಾಣಿಂ ಆದಿಂ ಆಸ್ ಲ್ಲೊ ರುಕಾಚೊ ಖುರಿಸ್ ಕಾಡುನ್ ಫಾತ್ರಾಚೊ ಖುರಿಸ್ ಬಾಂದಯ್ಲೊ. ಉಪ್ರಾಂತ್ ಖುರ್ಸಾ ಗುಡ್ಯಾರ್ ಖುರ್ಸಾಚೆ ಭಕ್ತಿಪಣಾಕ್ ಪೂರಕ್ ಜಾವ್ನ್ ತವಳ್ಚೊ ವಿಗಾರ್ ಮಾ| ಬಾ| ಮ್ಯಾಕ್ಸಿಮ್ ಪುರ್ಟಾದೊ ಹಾಂಚಾ ಹುಮೆದಿನ್ ಆನಿ ಫಿರ್ಗಜ್ ಲೊಕಾಂಚಾ ಆಧಾರಾನ್ ಧಾರ್ಮಿಕ್ ಕಾರ್ಯಕ್ರಮಾಂಕ್ ಏಕ್ ಸಾವ್ಳಿ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಏಕ್ ಸ್ಮಾರಕ್ ಬಾಂದ್ಪಾಚೆ ಪ್ರಸ್ತಾವನ್ ಜಾಲೆ. ತವಳ್ ಖುರ್ಸಾ ಗುಡ್ಯಾರ್ ಮೆಟಾಂ ಚಡೊನ್ ವೊಸೊಂಕ್ ಆಸ್‍ಲ್ಲೆಂ, ಬಾಂದ್ಪಾಕ್ ಕಟ್ಟೋಣಾಚೆ ಸಾಹೆತ್ ವ್ಹರುಂಕ್ ಕಷ್ಟಾಂಚೆ ಜಾಲ್ಯಾರೀ, ವಿಗಾರಾಚಾ ಆನಿ ಲೊಕಾಂಚಾ ಮಿನ್ಹತೆನ್ ಮೇ, 3, 1985 ಇಸ್ವೆಂತ್ ಸ್ಮಾರಕ್ ಬಾಂದ್ಪಾಚೆ ಉಗ್ತಾವಣ್ ಜಾಲೆಂ. ಉಪ್ರಾಂತ್ 1999 ಇಸ್ವೆಂತ್ ವರ್ಗ್ ಜಾವ್ನ್ ಅಯಿ ಲ್ಲೆಂ ವಿಗಾರ್ ಮಾ| ಬಾ| ಥೋಮಸ್ ಡಿ'ಸೋಜಾ ಹಾಂಚಾ ವಿಶೇಷ್ ಉರ್ಬೆನ್ ಹರ್ಯೇಕ್ಲ್ಯಾನ್ ಖುರ್ಸಾ ಗುಡ್ಯಾರ್ ಪಾಂವ್ಚ್ಯಾ ಖಾತಿರ್ ವಾಹನ್ ವೆಚಾ ಲಾಗೊನ್ ರಸ್ತೊ ನಿರ್ಮಾಣ್ ಆನಿ ಸ್ಮಾರಕ್ ಬಾಂದ್ಪಾ ಮುಖಾರ್ ಆಸ್‍ಲ್ಲೊ ಕರ್ಕಟೊ ಸುವಾತ್ ಸಮತಟ್ಟ್ ಕರುನ್, ರಸ್ತ್ಯಾಚಾ ಬಗ್ಲೆಕ್ ಖುರ್ಸಾ ವಾಟೆಚಾ ಭಕ್ತಿಪಣಾಕ್ ಖುರ್ಸಾ ವಾಟೆಚಿಂ ಸ್ತೆಸಾಂವಾಂ ಕೆಲೆಂ. ಬೈಂದೂರ್ ಖುರ್ಸಾ ಗುಡ್ಯಾಚಿ ಸಸಾಯ್ ಇತರ್ ಫಿರ್ಗಜ್ಗಾರಾಂಕ್ ಪರಿಚಯ್ ದೀವ್ನ್, ದಿಯೆಸೆಜಿಚೆ ಪೂನ್ ಶೆತ್ ಜಾವ್ನ್ ಪರಿವರ್ತನ್ ಜಾಲ್ಯಾ. ಆಜ್ ಹಾಂಗಾಸರ್ ವಿವಿಧ್ ಫಿರ್ಗಜೆ ಥಾವ್ನ್ ಭಾವಾರ್ಥಿ ಯಾತ್ರಿಕ್ ಜಾವ್ನ್ ಭಾಗೆವಂತ್ ಖುರ್ಸಾಚಿ ಸಸಾಯ್ ಜೊಡ್ಚ್ಯಾ ಖಾತಿರ್ ಖುರ್ಸಾ ಗುಡ್ಯಾರ್ ಆನಿ ಇಗರ್ಜೆಕ್ ಭೆಟ್ ದಿತಾ. ಕರೆಜ್ಮಾಂತ್ ವಿವಿಧ್ ಗಾಂವಾ ಥಾವ್ನ್ ಪಂಗಡ್ ಜಾವ್ನ್ ಯೇವ್ನ್ ಖುರ್ಸಾ ವಾಟೆಚಿ ಭಕ್ತಿಪಣ್ ಆಧಾರ್ತಾತ್. ಪರ್ಗಾವಾಂತ್ ಆಸ್ ಲ್ಲಿಂ ಫಿರ್ಗಜ್ಗಾರಾಂ ಗಾಂವಾಂತ್ ಆಯಿಲ್ಲ್ಯಾ ವೆಳಾ ಚುಕಾನಾಸ್ತಾ ಖುರ್ಸಾ ಗುಡ್ಯಾರ್ ಭೆಟ್ ದಿವ್ನ್ ಅರ್ಗಾಂ ಆನಿ ಸಸಾಯ್ ಮಾಗ್ತಾತ್. ಥೊಡೆಂ ಭಕ್ತಿಕ್ ಸಸಾಯ್ ಜೊಡುನ್ ಅರ್ಗಾಂ ದಿಂವ್ಕ್ ತವಳ್, ತವಳ್ ಭೆಟ್ ದಿತಾತ್. ವಿಗಾರಾಂಚಾ ಅಭಿಪ್ರಾಯೆ ಪ್ರಕಾರ್ ಥೊಡೆಂ ಹಾಂಗಾಸರ್ ಯೇವ್ನ್ ಖುರ್ಸಾ ಗುಡ್ಯಾರ್ ಭಾಗೆವಂತ್ ಖುರ್ಸಾ ಥಾವ್ನ್ ಜೊಡ್ ಲ್ಲೆಂ ಬರೆಪಣಾಚಿ ಸಾಕ್ಸೆಚಿ ವಿವರಣ್ ದಿತಾತ್ ಆನಿ ಹೆರಾಂಕ್ ಹಾಂಗಾಸರ್ ಭೆಟ್ ದೀವ್ನ್ ಬರೆಪಣ್ ಜೊಡುಂಕ್ ಆಧಾರ್ ದಿತಾತ್. ಭಾಗೆವಂತ್ ಖುರ್ಸಾಚಾ ಮಜತೆನ್ ಭುಜ್ವಣ್ ಮೆಳ್ತಾ, ಭಾವಾರ್ಥ್ ಚಡ್ತಾ, ಪಿಡಾ-ಶಿಡಾ ಗೂಣ್ ಜಾತಾ, ಖಂತ್ ಬೆಜಾರಾಯ್ ಪಯ್ಸ್ ಜಾತಾ, ವಿಘ್ನಾಂ-ಅನ್ವಾರಾಂತ್ ರಾಕಣ್ ಮೆಳ್ತಾ ಆನಿ ಪಾತ್ಕಾಚೆ ಭೊಗ್ಸಾಣೆ ಮೆಳೊನ್ ಜಿವಿತಾಂತ್ ತೃಪ್ತಿ ಮೆಳ್ತಾ ಮಳ್ಳೆಂ ಹಾಂಗಾಸರ್ ಯೆಂವ್ಚ್ಯಾ ಭಕ್ತಿಕಾಂಚಿ ಪಾತ್ಯೆಣಿ ಜಾವ್ನಾಸಾ.
ಪವಿತ್ರ್ ಖುರ್ಸಾ ಗುಡೊ ಆನಿ ಪ್ರಕೃತಿ ಸೊಭಾಯ್:
ಕೊಂಕಣ್ ಕರಾವಳಿಚಾ ಬಗ್ಲೆ ಥಾವ್ನ್ ಇಲ್ಲೆಶೆಂ ಅಂತರಾರ್ ಅಸ್ಚ್ಯಾ ಹ್ಯಾ ವಿಶಾಲ್ ಗುಡ್ಯಾರ್ ಧ್ಯಾನ್ ಆನಿ ಮಾಗ್ಣೆಂ ಕರ್ಚಾ ಸವೆಂ, ಪ್ರಶಾಂತ್ ವಾರೆಂ ವ್ಹಾಳ್ಚ್ಯಾ ಹ್ಯಾ ಉಂಚ್ ಗುಡ್ಯಾರ್ ಥಾವ್ನ್ ತುಮಿ ದೀಷ್ಟ್ ಘುಂವ್ಡಾಯ್ಲ್ಯಾರ್ ಪ್ರಕೃತೆ ಸೊಭಾಯೆನ್ ನೆಟೊನ್ ಆಸ್ಚ್ಯಾ ಸಗ್ಳ್ಯಾ ಬೈಂದೂರಾಕ್ ಪಳೆವ್ಯೆತ್. ಅಸ್ತಮ್ತೆಕ್ ಸೊಭಿತ್ ಸುಂದರ್ ವಿಶಾಲ್ ದರ್ಯೊ ಆನಿ ದರ್ಯಾ ತಡ್, ತೆಣ್ಕಾಕ್ ಲ್ಹಾನ್-ವ್ಹಡ್ ನ್ಹಯ್, ವಿಶಾಲ್ ಗಾದೆಂ ಆನಿ ನಾರ್ಲಾ ಮಾಡಾಂಚಿ ರಾಸ್, ಬಡ್ಗಾಕ್ ಲಾಂಬಾಯೆಕ್ ಆಸ್ಚೊ ಓತ್ತಿನಣೆ ಗುಡೊ ಸಾಂಗಾತಾ ಪ್ರಸಿದ್ಧ್ ಬೈಂದೂರ್ ಬೀಚ್ ಆನಿ ಉದೆಂತಿಕ್ ಪಯ್ಶಿಲ್ಯಾನ್ ದಿಸ್ಚೆಂ ಗುಡೆ-ದೊಂಗರಾಂಚಿ ರಾಸ್ ದೊಳ್ಯಾಂಕ್ ಆನಿ ಮತಿಕ್ ಸಂತೊಸ್ ದಿತಾತ್. ಅಶೆಂ ಖುರ್ಸಾ ಗುಡ್ಯಾರ್ ಖುರ್ಸಾ ಸಾವ್ಳೆಂತ್ ಆಮಿ ವಿಶೆವ್ ಘೆಂವ್ಕ್ ಹೊ ಪವಿತ್ರ್ ಖುರ್ಸಾ ಗುಡೊ ಖೂಬ್ ಸುಶೆಗ್ ದಿಂವ್ಚೊ ಥಳ್ ಜಾವ್ನಾಸಾ.
ಖುರ್ಸಾ ಗುಡ್ಯಾರ್ ಚಲ್ಚಿಂ ಥೊಡಿಂ ಲಿತುರ್ಜಿ ಕಾರ್ಯಕ್ರಮಾಂ ಹ್ಯಾ ಪರಿಂ ಆಸಾ:
• ಹರ್ಯೇಕಾ ಸುಕ್ರಾರಾ ಸಾಂಜೆರ್ 4:30 ವರಾರ್ ಮಿಸಾಚೆಂ ಬಲಿದಾನ್ ಆನಿ ಭಕ್ತಿಕಾಂಚಾ ತೆಸಾಂವಾ ಖಾತಿರ್ ಪ್ರಾರ್ಥನ್ ಭೆಟವ್ಣಿ.
• ಫೆಬ್ರವರಿಂತ್ ಫಿರ್ಗಜೆಚಾ ವಾರ್ಷಿಕ್ ಪರಬ್ ಜಾವ್ನ್ ಉಪ್ರಾಂತ್ಲ್ಯಾ ಆಯ್ತಾರಾ ಫಿರ್ಗಜ್ಗಾರಾಂ ದೆವಾಕ್ ಅರ್ಗಾಂ ಜಾವ್ನ್ ದಬಾಜಿಕ್ ಅರ್ಗಾಂ ಬಲಿದಾನ್ ಆನಿ ಖುರ್ಸಾ ದೆವಾಸಾಂವಾಂಚೆ ಪ್ರಾರ್ಥನ್.
• ಸ್ಮಾರಕ್ ಬಾಂದ್ಪಾಚಾ ಉಗ್ಡಾಸಾಕ್ ಮೇ ಮ್ಹಹಿನ್ಯಾಚಾ ಪಯ್ಲ್ಯಾ ಆಯ್ತಾರಾ ಸಂಭ್ರಮಿಕ್ ಮೀಸ್ ಆನಿ ಖುರ್ಸಾ ದೆವಾಸಾಂವಾಂಚೆ ಪ್ರಾರ್ಥನ್.
• ಕರೆಜ್ಮಾಚಾ ದಿಸಾಂನಿ ಸಾಂಜೆರ್ 4:30 ವರಾರ್ ಖುರ್ಸಾಚಿ ವಾಟ್ ಉಪ್ರಾಂತ್ ಮಿಸಾಚಿ ಭೆಟವ್ಣಿ ಚಲ್ತಾ.
