By ByndoorchiZalak, Pics: Lawrence Fernandes, 05 March 2023
ಬೈಂದೂರ್: 2022-23 ವರ್ಸಾಕ್ ಕ್ರಿಸ್ತಿ ಶಿಕ್ಷಣ್ ಜೊಡ್‍ಲ್ಲ್ಯಾ ಭುರ್ಗ್ಯಾಂ ಥಾವ್ನ್ ಆನಿ ಶಿಕ್ಷಣ್ ದಿತಲ್ಯಾ ಶಿಕ್ಷಕಾಂ ಥಾವ್ನ್ ಕ್ರೀಸ್ತಾಂವ್ ಶಿಕ್ಷಣಾಚೊ ದಿವಸ್ ಆಯ್ತಾರಾ ಮಾರ್ಚ್ 5 ತಾರೀಕೆರ್ ಸಕಾಳಿಂ ಆಚರಣ್ ಕೆಲೆಂ. ಕ್ರಿಸ್ತಿ ಶಿಕ್ಷಣ್ ಜೊಡ್‍ಲ್ಲ್ಯಾ ಭುರ್ಗ್ಯಾಂ ಸಾಂಗಾತಾ ಆನಿ ಶಿಕ್ಷಕಾಂ ಸಾಂಗಾತಾ ಸರ್ವ್ ಲೊಕಾಂನಿ ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊ ಸಾಂಗಾತಾ ಸಂಭ್ರಮೀಕ್ ಮೀಸಾಚೆ ಬಲಿದಾನ್ ಭೆಟಯ್ಲೆಂ. ಉಪ್ರಾಂತ್ ಫಿರ್ಗಜೆಚಾ ಮಿನಿ ಹೊಲಾಂತ್ ಚಲ್‍ಲ್ಲ್ಯಾ ಕಾರ್ಯಕ್ರಮಾಂತ್ ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊ, ಫಿರ್ಗಜ್ ಮಂಡಳಿ ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, 20 ಆಯೋಗಾಚಿ ಸಂಚಾಲಕಿ ಅನಿತಾ ನಜ್ರೆತ್ ಆನಿ ಕೊವೆತಾಂಚಿ ಧರ್ಮ್ ಭಯ್ಣ್ ಸಿ| ಆನ್ಸಿ ಪಾವ್ಲ್ ವೆದಿ ಕಾರ್ಯಕ್ರಮಾಂತ್ ಹಾಜರ್ ಆಸ್‍ಲ್ಲೆಂ.
ದೊತೊರ್ನಿಚಾ ಪರೀಕ್ಷೆಂತ್ ಬರೆಂ ಅಂಕ್ ಜೊಡ್‍ಲ್ಲ್ಯಾ ಭುರ್ಗಾಂತ್ ಇನಾಮಾಂ ವಾಂಟ್ಲೆ ಆನಿ ಸಗ್ಳ್ಯಾ ವರ್ಸಾಂ ಕ್ರಿಸ್ತಿ ಶಿಕ್ಷಣ್ ದೀವ್ನ್ ಸೆವಾ ದಿಲ್ಲ್ಯಾ ಶಿಕ್ಷಕಾಂಕ್ ವಿಗಾರಾನ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಶಿಕ್ಷಕಾಂಚೊ ಉಪ್ಕಾರ್ ಬಾವುಡ್ಲೊ. ಕ್ರಿಸ್ತಿ ಶಿಕ್ಷಣ್ ಜೊಡ್‍ಲ್ಲ್ಯಾ ಭುರ್ಗ್ಯಾಂ ಥಾವ್ನ್ ವಿವಿಧ್ ಮನೋರಂಜನ್ ಕಾರ್ಯಕ್ರಮ್ ಚಲ್ಲೆಂ. ಕಾರ್ಯಕ್ರಮಾಕ್ ಕ್ರೀಸ್ತಾಂವ್ ಶಿಕ್ಷಣ್ ಆಯೋಗಾಚಿ ಸಂಚಾಲಕಿ ಆಶಾ ಲೋಬೊನ್ ಸ್ವಾಗತ್ ಕೆಲೆಂ ಆನಿ ಪ್ರಿಯಾ ನಜ್ರೆತಾನ್ ಕಾರ್ಯಕ್ರಮ್ ಚಲವ್ನ್ ದಿಲೆಂ.
