[ಜಿಯೆಂವ್ಚಿ ಆಶಾ ತರ್ ಸ್ವಪ್ಣಾಂ ಪಳೆಂವ್ಚೆಯೀ ಆಸ್ತಾ, ಆಶೆಲ್ಲ್ಯಾ ಸ್ವಪ್ಣಾಂಕ್ ಜೀವ್ ದೀವ್ನ್ ಸಾರ್ಥಕ್ ಜಾಲಿಂ ತರ್ ತೃಪ್ತಿ ಜಾತಾ. ಪರತ್ ಆನ್ಯೇಕ್ ಆಶಾ ಧರುನ್ ಸ್ವಪ್ಣಾಂ ಪಳೆಂವ್ಚೆ ಸಾರ್ಥಕ್ ಕರುಂಕ್ ಪ್ರಯತನ್ ಕರ‍್ಚೆಂ ಹೆಂಚ್ ಆಮ್ಚೆಂ ಜೀವನ್, ಪುಣ್ ಸಕ್ಕಡ್ ಆಶಾ, ಸಕ್ಕಡ್ ಸ್ವಪ್ಣಾಂಚಿ ಪಾಟ್ ಧರುನ್ ಸುಫಳ್ ಕರುಂಕ್ ಅಸಾಧ್ಯ್, ಆಶಾ ಆನಿ ಸ್ವಪ್ಣಾಂ ಪಳೆಂವ್ಕಿ ಗಡ್ ಆಸ್ತಾ. ಆಮ್ಚೆಂ ಜೀವನ್ ಅಶೆಂಚ್ ಆಶಾ ಆನಿ ಸ್ವಪ್ಣಾಂಚಿ ಪಾಟ್ ಧರುನ್ ವಸೊಂಕ್ ಆಸಾ ಪುಣ್ ಮೀತ್ ಸಾಂಬಾಳುನ್ ತ್ಯಾ, ತ್ಯಾ ಪ್ರಕಾರ್ ಜೀವನ್ ಆಮ್ಚೆಂ ರೂಪಿತ್ ಕರುಂಕ್ ಆಸಾ. ಅಶೋಕ್ ಬೈಂದೂರ್ ಅಶೆಂಚ್ ಆಪ್ಲ್ಯಾ ಕವನಾಂತ್ ವಿಶೇಸ್ ಆಶಾ ಧರುನ್ ಸ್ವಪ್ಣಾಂ ಪಳೆತಾ ಪುಣ್ ಸಾಧ್ಯ್ ನಾ ಆನಿ ಗರ್ಜ್ ನಾ ಮ್ಹಣ್ ಚಿಂತ್ತಾ ಮೀತ್ ಸಾಂಬಾಳುನ್ ಆಶಾ ಆನಿ ಸ್ವಪ್ಣಾಂ ಬದಲ್ತಾ ಆನಿ ಆಪ್ಲ್ಯಾ ಫುಡಾರಾಕ್ ಕಿತೆಂ ಗರ್ಜ್ ತಿಂ ಆಶಾ ಧರುನ್ ಸ್ವಪ್ಣಾಂ ಪಳೆತಾ]- ಡೊಲ್ಫಿ ನಜ್ರೆತ್
ಫುಡಾರಾಚಿ ಆಶಾ
ಲ್ಹಾನ್ ಥಾವ್ನ್ ಎಕ್ಸುರ‍್ಪಣಾಂತ್ ಜಿಯೇವ್ನ್ ಆನಂದ್ ಜೊಡ್ಚಿ ಆಶಾ ಮ್ಹಜಿ
ಹ್ಯಾ ವಿಶಾಲ್ ಸಂಸಾರಾಂತ್ ಹರ‍್ಯೇಕ್ ಶಿರಾಂ ಶಿರಾಂತ್ ರಿಗೊನ್ ರೂಚ್ ಚಾಕ್ಚಿ ಆಶಾ ಮ್ಹಜಿ
ಜಾಂವ್ಕ್ ಆಸಾಧ್ಯ್ ಆಸ್‍ಲ್ಲೆಂ ಸಾಧ್ಯ್ ಕರ‍್ಚಿಂ ಚಿಂತ್ನಾ ಮ್ಹಜಿ
ಪುಣ್ ಆಶೇಕ್ ಮ್ಹಜ್ಯಾ ಎದೊಳ್ ಮೆಳೊಂಕ್ ನಾ ತಡ್
ಸ್ವಪ್ಣಾಂ ಮ್ಹಜಿ ಆಜೂನ್ ಜಾಂವ್ಕ್ ನಾಂತ್ ಪೂರ್ಣ್
ಚಿಂತ್ನಾ ಮ್ಹಜಿ ಆಜೂನ್ ಜಾಂವ್ಕ್ ನಾಂತ್ ಪೂರ್ಣ್
ಚಿಂತ್ನಾ ಮ್ಹಜಿ ಇತ್ಲ್ಯಾರ್ ಜಾಂವ್ಕ್‍ನಾಂತ್ ಅಂತ್ಯ್
ಆಶೆಲ್ಲ್ಯಾ ಆಶೆಕ್ ಪಳೆಯಿಲ್ಲ್ಯಾ ಸ್ವಪ್ಣಾಂಕ್
ಚಿಂತ್ಲೆಲ್ಯಾ ಚಿಂತ್ನಾಕ್ ಕಶೆಂ ಪಾವೊ ಪೊಂತಾಕ್
ಹೆಂಚ್ ಸವಾಲ್ ರಾತ್-ದೀಸ್ ಕಾಂತಯ್ತಾ ಮತಿಂತ್
ಚಿಂತುನ್-ಚಿಂತುನ್ ಸಲ್ವಲಾಂ
ಸ್ವಪ್ಣಾಂಚಿ ಕೀರ್ಣ್ ನಪಂಯ್ಚ್ ಜಾಲಾಂ
ಆಶೆಚೊ ದಿವೊಯೀ ಪಾಲ್ವಲಾ
ಚಿಂತುನ್-ಚಿಂತುನ್ ಸಂಸಾರ್ ಸೈತ್ ಗೆಲಾ ಕಿತ್ಲೊ ಬದ್ಲೊನ್
ರೀತ್-ರಿವಾಜ್ ನೀತ್-ನಿಯಮಾಂ ಸೈತ್ ಬದ್ಲಲ್ಯಾತ್
ದೆಕುನ್ ಹಾಂವೆಯೀ ಆತಾಂ ಮ್ಹಜಿ ಆಶಾ ಬದ್ಲಿಲ್ಯಾ
ಉದೆಲಾ ಮತಿಂತ್ ಏಕ್ ದುಸ್ರಿಚ್ ಆಶಾ
ದೆಕ್ಲಾಂ ಏಕ್ ಬೊಲ್ತೆಂಚ್ ಸ್ವಪಾಣ್
ಮತಿಂತ್ ಏಕ್ ದುಸ್ರೆಂಚ್ ಚಿಂತಾಪ್
ಏಕ್ಸುರ‍್ಪಣಾಂತ್ ಜಿಯೆಂವ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಸ್ವಪಾಣ್ ಪಳೆಂವ್ಚಿ ಸಂವಯ್ ಆತಾಂ ಮ್ಹಾಕಾ ನಾಂ
ಚಿಂತುನ್-ಚಿಂತುನ್ ಕರ‍್ಗೊಂಚೆ ಚಿಂತಾಪ್‍ಯೀ ನಾಂ
ಏಕ್ಸುರ‍್ಪಣಾಂತ್ ಜಿಯೆಂವ್ಚಿ ಆಶಾ ಮ್ಹಾಕಾ ನಾಂ
ಬಗಾರ್ ಕುಶಿಚ್ಯಾ ಬೊರಿ ಸಂಗಿ ಸುಖಾನ್ ಜಿಯೆಂವ್ಚಿ ಆಶಾ ಮ್ಹಾಕಾ
ಕೊಗುಳ್ ಜಾವ್ನ್ ಮಧುರ್ ತಾಳ್ಯಾಂತ್ ಗಾಂವ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ತುಜ್ಯಾ ಪಾಂಯಾಚ್ಯಾ ಪಾಯ್ಜಣಂಚ್ಯಾ ಸಂಗೀತ್ ನಾದನ್ ನಾಸ್ಚಿ ಆಶಾ ಮ್ಹಾಕಾ
ಪಿಸೊಳೆ ಜಾವ್ನ್ ಝಡಾರ್ ಉಡ್ಚಿ ಆಶಾ ಮ್ಹಾಕಾನಾ
ತುಜ್ಯಾ ತ್ಯಾ ಕೋಮಲ್ ಹಾತಾಂನಿ ಹಾತ್ ಮೆಳೊವ್ಚಿ ಆಶಾ ಮ್ಹಾಕಾ
ಫುಲಾಂಚೆ ಮೊಂವ್ ಚಿಂವ್‍ಚಿ ಆಶಾ ಆಶಾ ಆತಾಂ ಮ್ಹಾಕಾನಾ
ಬಗಾರ್ ತುಜ್ಯಾ ವೊಂಟಾಕ್ ವೊಂಟ್ ಮೆಳೊವ್ನ್ ಚಿಂವ್‍ಚಿ ಆಶಾ ಮ್ಹಾಕಾ
ಸುಕ್ಣೆಂ ಜಾವ್ನ್ ವಾರ‍್ಯಾರ್ ಉಬ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ತುಕಾ ಪಿಶ್ಯಾರ್ ಘಾಲ್ಚಿಂ ಆಶಾ ಮ್ಹಾಕಾ
ಚಿಲಿ ಪಿಲಿ ಸುಕ್ಣ್ಯಾಂಚಾ ನಾದಾನ್, ಕೊಂಬ್ಯಾಚಾ ಸಾದಾನ್ ಸಕಾಳಿಂ ಉಟ್ಚಿ ಆಶಾ ಮ್ಹಾಕಾ ನಾಂ
ಬಗಾರ್ ತುಜ್ಯಾ ಕಾಂಕ್ಣಾಚ್ಯಾ ಆವಾಜಾನ್ ಉಟ್ಚಿ ಆಶಾ ಮ್ಹಾಕಾ
ಕವಿ ಜಾವ್ನ್ ಪ್ರಕೃತೆಚೆ ವರ್ಣನ್ ಕರ‍್ಚಿ ಆಶಾ ಆತಾಂ ನಾಂ
ಬಗಾರ್ ತುಜ್ಯಾ ಸೊಭಾಯೆಚಿ ವರ್ಣನ್ ಕರ‍್ಚಿ ಆಶಾ ಮ್ಹಾಕಾ
ಪುಲಾಂ ಜಾವ್ನ್ ಸಂಸಾರಾಚ್ಯಾ ಮಾತ್ಯೆರ್ ಸೊಭ್ಚಿ ಆಶಾ ಮ್ಹಾಕಾ ನಾ
ಬಗಾರ್ ತುಜ್ಯಾ ಕಾಳ್ಜಾಂತ್ ಸೊಭ್ಚಿ ಆಶಾ ಮ್ಹಾಕಾ
ಶಹರಾ ಶ್ಹೆರಾಂನಿ ಘುಂವೊನ್ ತಾಚಿ ಸೊಭಾಯ್ ಪಳೆಂವ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ತುಜಾ ಶಿರಾಂ ಶಿರಾಂನಿ ರಿಗೊನ್ ತುಜೆ ಗೂಣ್ ಪಾರ‍್ಕುಂಚಿ ಆಶಾ ಮ್ಹಾಕಾ
ದರ್ಯಾಂಚಿ ಲ್ಹಾರಾಂ ಜಾವ್ನ್ ತಡಿಕ್ ಆಪ್ಟುಂಚಿ ಆಶಾ ಮ್ಹಾಕಾ ನಾಂ
ಬಗಾರ್ ಮೊಗಾಚ್ಯಾ ಉಮಾಳ್ಯಾನ್ ತುಜಾ ಕುಡಿಕ್ ಆಪ್ಡುಂಚಿ ಆಶಾ ಮ್ಹಾಕಾ
ವಿಶಾಲ್ ಸುವಾತೆರ್ ಎಕ್ಸುರೆಂ ನಿದೊನ್ ವಾರ‍್ಯಾಂ ಸಂಗೀ ಉಲೊಂವ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ತುಜಿ ನವ್ರೊ ಜಾವ್ನ್ ತುಜೆ ಸಂಗಿ ರಾಂವ್ಚಿ ಆಶಾ ಮ್ಹಾಕಾ
ಝಗ್ಲಾಂಣೆ ಜಾವ್ನ್ ಕ್ಷಣಾಂ ಭಿತರ್ ಮಾಯಾಗ್ ಜಾಂವ್ಚಿ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ತುಜ್ಯಾ ಘರಾಚೊ ದಿವೊ ಜಾವ್ನ್ ಮೊರ‍್ತಾ ಪರ‍್ಯಾಂತ್ ಸಾಂಗಾತ್ ದಿಂವ್ಚಿ ಆಶಾ ಮ್ಹಾಕಾ
ಸಂಸಾರಾಚಿ ಕಿತೆಂಚ್ ಆಶಾ ಆತಾಂ ಮ್ಹಾಕಾ ನಾಂ
ಬಗಾರ್ ಆಶಾ, ಕೇವಲ್ ಫುಡಾರಾಚಿ ಆಶಾ.