ಜೀವ್ ಮ್ಹಜೊ
ಜೀವ್ ಮ್ಹಜೊ
ತ್ಯಾಚ್ ದಿಸಾ ಗೆಲ್ಲೊಗೊ ಚೆಡ್ವಾ
ತುಂವೆ ಆಮ್ಚ್ಯಾ ಉಗ್ಡಾಸಾಚಿ ಕಾಣಿಕ್
ಮ್ಹಜ್ಯಾ ದೊಳ್ಯಾ ಮುಕಾರ್‌ಚ್ಚ್
ಜಳಯ್ತಾನಾ
ಜೀವ್ ಮ್ಹಜೊ
ತ್ಯಾಚ್ ದಿಸಾ ಗೆಲ್ಲೊಗೊ ಚೆಡ್ವಾ
ಗೋಡ್ ಗೋಡ್ ಉತ್ರಾಂ ಉಲಯಿಲ್ಲ್ಯಾ ತುಜ್ಯಾ ತೊಂಡಾನ್
ಧಾರಿಚ್ಯಾ ತಲ್ವಾರಿ ಸರಿ
ತಿಂ ಉತ್ರಾಂ ಉಲಯ್ತಾನಾ
ಜೀವ್ ಮ್ಹಜೊ
ತ್ಯಾಚ್ ದಿಸಾ ಗೆಲ್ಲೊಗೊ ಚೆಡ್ವಾ
ರಾಜ್ ರಸ್ತ್ಯಾ ಲಾಗಿ ಸಗ್ಳ್ಯಾ ಸಾಮ್ಕಾರ್
ಸರ್ಸರಿತ್ ಮಾರ್
ಉಮೆ ದಿಲ್ಲ್ಯಾ ಹ್ಯಾ ಪೊಲ್ಯಾರ್
ತುಂವೆಂ ಮಾರ್ತಾನಾ
ಜೀವ್ ಮ್ಹಜೊ
ತ್ಯಾಚ್ ದಿಸಾ ಗೆಲ್ಲೊಗೊ ಚೆಡ್ವಾ
’ತುಂ ಕೊಣ್ ಹಾಂವ್ ನೆಣಾಂ,
ಪೊಲಿಸಾಂಕ್ ಸಾಂಗೊನ್ ತುಜೆ
ಹಾತ್ ಪಾಂಯ್ ಮೊಡ್ತಾಂ’ ಮ್ಹಣ್ ತುಂವೆಂ ಮ್ಹಣ್ತಾನಾ
ಜೀವ್ ಮ್ಹಜೊ
ತ್ಯಾಚ್ಚ್ ದಿಸಾ ಗೆಲ್ಲೊಗೊ ಚೆಡ್ವಾ
ಲ್ಹಾನ್ಪಣಾ ಥಾವ್ನ್ ಕೆಲ್ಲೊ ಮೋಗ್
ಪಾಂಯಾಂಥಳಿಂ ಮಸ್ತುನ್
ಪೆಲ್ಯಾಚ್ಯಾ ವೆಂಗೆಂತ್ ತುಂ ಆಸ್ತಾನಾ
ಜೀವ್ ಮ್ಹಜೊ
ತ್ಯಾಚ್ ದಿಸಾ ಗೆಲ್ಲೊಗೊ ಚೆಡ್ವಾ
ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್
ತುಜ್ಯಾ ಮೊಗಾನ್ ಹ್ಯಾ ಸ್ಥಿತೆಕ್
ಹಾಡ್ನ್ ಪಾಯ್ಲಾಂ ತೆಂ ಪಳೆವ್ನ್
ಮ್ಹಜ್ಯೆ ಆವಯ್ನ್ ಸಂಸಾರಾಕ್
ಆದೆವ್ಸ್ ಮಾಗ್ತಾನಾ
ವರ್ಸಾ ಆದಿಂ ಮತಿರ್ ನಾತ್ಲ್ಯಾ
ಜಿವಾಚೊ ಆಜ್ ಉಸ್ವಾಸ್
ಮಾತ್ರ್ ಉಬ್ಲೊ
ಪುಣ್
ಜೀವ್ ಮ್ಹಜೊ ತ್ಯಾಚ್ಚ್ ದಿಸಾ
ಗೆಲ್ಲೊಗೊ ಚೆಡ್ವಾ. .!
– ಜೊನ್ಸನ್ ಬೈಂದೂರ್