[ಸಂಸಾರಾಂತ್ಲಿ ಪ್ರಸ್ತುತ್ ಪರಿಸ್ಥಿತಿ ಖಂಯ್ಸರ್ ಪಾಯ್ತಾ, ಖಂಯ್ಸರ್ ಆಖೇರ್ ಜಾತಾ ಕೊಣಾಯ್ಕಿ ಕಳಿತ್ ನಾ. ಕೊರೊನಾ ಮಾರೆಕಾರ್ ಪಿಡೆಕ್ ಸಗ್ಳೊ ಸಂಸಾರ್ ಭಿಯೆಲಾಂ, ಮನ್ಶ್ಯಾಚೆರ್ ಪಿಡಾ, ಕಷ್ಟ್, ಅನ್ವರಾಂ, ಭುಕ್, ಜುಲುಮ್, ಗ್ರೇಸ್ತ್-ದುಬ್ಳೊ, ಜಾತ್-ಧರ್ಮಾಚೊ ದ್ವೇಶ್ ಅಸಲಿಂ ವಾಸ್ತವ್ ಸಂಗ್ತಿ ದಿಸಾನ್ ದೀಸ್ ಝಳ್ಕೊನ್ ಆಸಾ ತರ್, ಆನ್ಯೇಕಾ ಕುಶಿನ್ ದಾಕ್ತೆರ್, ನರ್ಸಾಂ, ಪೊಲೀಸ್, ಸರ್ಕಾರ್ ಕೊರೊನಾ ಮಾರೆಕಾರ್ ಪಿಡೆ ವಿರೋಧ್ ಝುಜೊನ್ ಆಸಾ. ಕಷ್ಟಾಂತ್ ಶಿರ್ಕೊನ್ ಕಂಗಾಲ್ ಜಾಲ್ಲ್ಯಾ ದುಬ್ಳ್ಯಾಂಕ್, ಭುಕೆಲ್ಲ್ಯಾಂಕ್ ಖಾಣ್ ದೀವ್ನ್ ಸೆವಾ ದಿಂವ್ಚೆ ಜಾಯ್ತಿಂ ಸಮಾಜ್ ಸೇವಕಾಂ ಮನ್ಶ್ಯಾಪಣಾಚಿ ಆನ್ಯೇಕ್ ಕೂಸ್ ದಾಕವ್ನ್ ಆಸಾ. ಹ್ಯಾ ಮಧೆಂ ಜಾಯ್ತ್ಯಾಂಚೊ ಫುಡಾರ್, ಸ್ವಪ್ಣಾಂ ಪಿಡ್ಡ್ಯಾರ್ ಜಾಲ್ಯಾ ತರ್ ಎಕಾಮೆಕಾ ಮೆಳ್ಚೆಂ ಭಾಗ್ ನಾಸ್ತಾನಾ ಬಂಧಡೆಚೆ ಪರಿಸ್ಥಿತೆಂತ್ ಅಸಹಾಯಕ್ ಭೊಗ್ಣಾಂಚೆ ಸಿಂತಿಮೆಂತಾಳ್ ವಳ್ವಳೆಂ ಅಶೋಕ್ ಬೈಂದೂರ್ ಹಾಚಿ ಕವಿತಾ ಪ್ರಸ್ತುತ್ ಬಂಧಡ್ ಕಿತ್ಲಿಂ ಕಠೋರ್ ಮ್ಹಣ್ ದಾಕವ್ನ್ ದಿತಾಂ.]
– ಡೊಲ್ಫಿ ನಜ್ರೆತ್
ಬಂಧಡ್
ಹಾಯ್ ವಿಧಿ ಕಸಲೆಂ ಫರ್ಮಾಣ್ ತುಜೆಂ
ಕಿತೆಂ ಆಸ್‍ಲ್ಲೆಂ ಪಾತಕ್ ಸಾಂಗ್ ತುಂ ಮ್ಹಜೆಂ
ಕೊಣಾಕ್ ದುರ್ಸೊಂ, ಕೊಣಾಕ್ ಹಾಂವ್ ಸೊದುಂ
ವಾಟ್ ಹಾಂವ್ ಆತಾಂ ಖಂಯ್ ಥಾವ್ನ್ ಸೊದುಂ
ಕಶೆಂ ಆತಾಂ ಉಲ್ಲೇಕ್ ಕರುಂ ಹಾಂವ್ ತೆಂ ದೀಸ್
ವಾಡ್‍ಲ್ಲೊಂ ಹಾಂವ್ ಜೇವ್ನ್ ಶೆಳೆಂ ಶಿತ್ ಆನಿ ನೀಸ್
ಯೆದೊಳ್ ಹಾಂವೆ ಕೊಣಾಂಕೀ ಕರುಂಕ್ ನಾ ಮೋಸ್
ಕಿತೆಂ ಆಸ್‍ಲ್ಲೆಂ ಕುಟ್ಮಾಂತ್ ಆಮ್ಚ್ಯಾ ಕಾಂಯ್ ದೋಷ್?
ಆಮಿ ದುಬ್ಳೆಂ ತರೀ ಸಾಂಡ್ಲೆ ನಾ ಪಪ್ಪಾ ಧಯ್ರ್ ತುಂವೆ
ದೀಸ್ ರಾತ್ ಘೊಳುನ್ ಝುಜ್ಲೊಯ್ ತುಂ ಕಷ್ಟಾಂ-ಸಂಕಷ್ಟಾ ಸಂವೆ
ವಾಡೊನ್ ಶಿಕೊನ್ ಪಾಂವ್ಚ್ಯಾಕ್ ಬರ‍್ಯಾ ಫುಡಾರಾಕ್ ಹಾಂವೆ
ಬೊರೆಂ ಕುಟಾಮ್ ಬಾಂದುನ್ ದವರ‍್ಚ್ಯಾಕ್ ಜಿಂವೆ
ದಯಾ-ದಾಕ್ಷೆಣ್ ದುಬ್ಳೊ ಮ್ಹಳ್ಳಿಂ ಲಜ್ ತುಕಾ ನಾತ್‍ಲ್ಲಿಂ
ಸದಾಂಚ್ ದಿಸ್ತಾಲಿಂ ಮುಖಮಳಾರ್ ಉರ್ಬಾ ತುಜ್ಯಾ ಕುಡಿಂತ್ಲಿ
ಶಾಂತಿ ಸಮಾಧಾನ್ ಮೋಗ್-ಮಯ್ಪಾಸ್ ಚಿಂತೊನ್ ಕುಟ್ಮಾಂತ್ಲೆ
ಕಿತ್ಲೆಂ ರಗಾತ್ ಆಟಯ್ಲೆಂ ತುಂವೆ ತುಜ್ಯಾ ಜಿವಾಂತ್ಲೆ
ಆಬ್ಳೆಂ ತುಜ್ಯಾ ತ್ಯಾ ನಿಸ್ವಾರ್ಥಿ ಮನೋಭಾವಾಕ್
ದೀಸ್ ರಾತ್ ಲೆಖಿನಾಸ್ತಾ ತುಂವೆ ಕಾಡ್‍ಲ್ಲ್ಯಾ ಕಷ್ಟಾಕ್
ಧನ್ಯಾ ದೆವಾನ್ ಪಾವಯ್ಲೆಂ ಬೆಸಾಂವಾನಿ ಪೊಂತಾಕ್
ಕಷ್ಟಾಂತ್ ಶಿಕೊನ್ ಕೆಲೊಯ್ ಇಂಜಿನಿಯರ್ ಹ್ಯಾ ಪುತಾಕ್
ಪಪ್ಪಾ ತುಂವೆ ರಾತ್ ದೀಸ್ ಕಾಡ್‍ಲ್ಲ್ಯಾ ಕಷ್ಟಾಕ್
ಹಾಂವ್ ಖಂಡಿತ್ ಪಾವಯ್ತಲೊ ಪೊಂತಾಕ್
ಕಾಮಾಕ್ ಆಪೊವ್ಣೆಂ ಆಯ್ಲಾಂ ವೆತಾಂ ಬೆಂಗ್ಳುರಾಕ್
ಸಾಂಬಾಳ್ ಬರೊ ದಿತನಾ ಪಾವ್ತಾತ್ ಲಾಕಾಕ್
ಆನಿ ಪಪ್ಪಾ ಮುಕ್ಲೆಂ ದೀಸ್ ಆಮ್ಚೆಂ ಸುಖಾಚೆ ಜಾತಲೆಂ
ಪಿಂಜ್ಕೊರ್ ವಸ್ತುರ್ ಘಾಲುನ್ ಘೊಳ್ಚೆಂ ದೀಸ್ ವೆತಲೆಂ
ಜೊಡಿನ್ ಮ್ಹಜ್ಯಾ ವೆಗ್ಗಿಂಚ್ ಸಗ್ಳೆಂ ಕಷ್ಟ್ ನಿವಾರ‍್ತಲೆಂ
ಚಿಂತ್ ಪಪ್ಪಾ ದೆವಾನ್ ಆಮ್ಚೆರ್ ಬೆಸಾಂವ್ ಘಾಲೆಂ
***
ಹಾಯ್ ವಿಧಿಂ ಪರತ್ ಹಿ ಸಾವ್ಳಿಂ ಕೀತ್ಯಾಕ್ ತುಜಿಂ ಕಳನಾಂ
ಕಷ್ಟಾಂಚೆ ದೀಸ್ ಸಂಪೊನ್ ನವ್ಯಾ ದಿಶೆನ್ ಫುಡಾರಾಕ್ ಪಾವ್ತನಾ
ಖಂಯ್ ಥಾವ್ನ್ ಆಯ್ಲೆಂ ಮಾರೆಕಾರ್ ಪಿಡೆಂ ಕೊರೊನಾ
ಕಿತ್ಲೆಂ ಚಿಂತ್ಲ್ಯಾರಿ ಜಾಪ್ ಖಂಯ್ಸರೀ ಕೊಣಾಯ್ಕಿ ಮೆಳಾನಾ
ಪಾಚಾರ‍್ತಾ ಮ್ಹಣ್ ಪಿಡಾ ವೇಗಾನ್ ದಫ್ತರಾಂಕ್ ಘಾಲ್ಯಾಂತ್ ಬೀಗ್
ಲಾಗಾನಾ ಜಾಂವ್ಚ್ಯಾಕ್ ಹ್ಯಾ ಪಿಡೆಂ ವೈರಸಾಚೊ ದಾಗ್
ಮ್ಹಣ್ತಾಂತ್ ಸರ್ವಾಂಕ್ ಕುಡಾಂತ್‍ಚ್ ರಾವೊನ್ ನಿವಾರುಂಕ್ ಮಾಗ್
ಕಿತ್ಯಾಕ್‍ಗಾಯ್ ಸಗ್ಳ್ಯಾ ಸಂಸಾರಾಕ್ ಆಯ್ಲಾ ಹೊ ರೋಗ್
ದೀಸ್ ರಾತ್ ಮಾಗ್ಲೆಂ ಆತಾಂ ಎಕ್ಸುರೊ ಜಾಲಾಂ ಸಗ್ಳ್ಯಾನಿ ಲೋಕ್-ಡೌನ್
ಖಂತಿನ್ ಕಂಗಾಲ್ ಜಾಲಾ ಹಾಂವ್ ಹಾಂಗಾ ಸಗ್ಳೊ ಮೌನ್
ಕಾಲ್ಚ್ಯಾ ರಾತಿಂ ಚಿಂತುನ್ ಖಂತಿನ್ ಪಪ್ಪಾ ಸರ್ಲಾ ಹಾರ್ಟ್-ಎಟ್ಯಾಕ್ ಯೇವ್ನ್
ಖಬರ್ ಆಯ್ಕೊನ್ ಕುಡಾಂತ್ ಲಾಚಾರ್ ಬಸ್ಲಾ ಭೆರೊ ಜಾವ್ನ್
ಕಿತ್ಲೆಂ ಪರಾತ್ಲ್ಯಾರಿ ಮೆಳಾನಾ ಮ್ಹಾಕಾ ಪರ್ವಣ್ಗಿ ಘಾಲುಂಕ್ ಏಕ್ ದೀಷ್ಟ್
ಗವರ್ನ್‍ಮೆಂಟ್ ಸಾಂಗ್ತಾ ನಿಯಮ್ ಹೆಂ ಪಾಳ್ ತುಂ ಸ್ವಷ್ಟ್
ಎಕಾಂಚ್ ರಾಜ್ಯಾಂತ್ ಆಸೊನಿ ಭಾಗ್ ನಾ ಘಾಲುಂಕ್ ಮಾತಿ ಏಕ್ ಮೂಟ್
ಭೊಗ್ಸಿ ಪಪ್ಪಾ ನಾ ಕಸಲಿಂಚ್ ಮ್ಹಜೆಲಾಗಿಂ ದುಸ್ರಿಂ ಆತಾಂ ವಾಟ್
ಇತ್ಲೆಂ ಲಾಗಿಂ ಆಸೊನಿ ಕೀತ್ಯಾಕ್ ನಾ ಮ್ಹಾಕಾ ತಡ್
ಧಾಂಪ್ಲ್ಯಾತ್ ಸಗ್ಳ್ಯಾಂನಿ ಭಾಯ್ರ್ ಭಿತರ್ ವೆಚೆಂ ಗಡ್
ಹಾಂವ್ ಜಿವಂತ್ ಆಸೊನಿ ಪಪ್ಪಾ ಅನಾಥ್ ತುಜಿ ಕೂಡ್
ಹಾಯ್ ವಿಧಿ ಕಸಲೆಂ ಫರ್ಮಾಣ್, ಕಸಲಿಂ ಹಿ ಬಂಧಡ್