[ದಿನೇಶ್ ಗ್ರಾಸ್, ಬಿಯಾರ್ ಸರ್ವ್ ಬೈಂದೂರ್ಗಾರಾಂಕ್ ಪರಿಚಿತ್ ಜಾವ್ನಾಸೊನ್, ಫಿರ್ಗಜೆಚಾ ಯುವ ಸಂಘಟನಾಚೊ ಪೂರ್ವ್ ಅಧ್ಯಕ್ಷ್, ಸಭಾರ್ ಸಂಘ್-ಸಂಸ್ಥ್ಯಾಂನಿ ಸೆವಾ ಅರ್ಪಿಲ್ಲೊ ಜಾವ್ನಾಸೊನ್, ಆಪ್ಲ್ಯಾ ಯುವ ಪ್ರಾಯೆರ್ ಥಾವ್ನ್ ಕೊಂಕ್ಣಿ ಭಾಶೆ ಖಾತಿರ್ ಸಭಾರ್ ಲೇಖನಾ ಕೊಂಕ್ಣಿ ಪತ್ರಾರ್, ತಶೆಂಚ್ ಆಯ್ಲೆವಾರ್ ಫೆಸ್ಬುಕಾರ್ ಥೊಡಿಂ ವಿಭಿನ್ನ್ ಲೇಖನಾ ಪರ್ಗಟ್ ಕೆಲ್ಯಾತ್, ರಂಗ್ ಮಾಂಚಿಯೆರ್ ಬರೊ ಕಲಾಕಾರ್ ಜಾವ್ನಾಸೊನ್, ಪ್ರಸ್ತುತ್ ದಿನೇಶ್ ಗ್ರಾಸ್ ದುಬಾಯಾಂತ್ ಆಪ್ಲೊ ವಾವ್ರ್ ಕರುನ್ ಆಸಾ. ಹಾಂಗಾಸರ್ ದಿನೇಶಾನ್ ಕ್ರಿಸ್ತ್ ಯೆಣ್ಯಾಚಾ ಕಾಳಾಕ್ ಆಮ್ಚಿ ತಯಾರಾಯ್ ಕಿತೆಂ ಜಾವ್ನ್ ಅಸಾಜಾಯ್? ಮ್ಹಳ್ಳೆ ಲೇಖನ್ ಪರ್ಗಟಿತ್ ಕೆಲ್ಯಾ]
ಜೆಜು ಯೆಂವ್ಚಾರ್ ಆಸಾ.....!!!
ವರ್ಸಾ ಉಪ್ರಾಂತ್ ಮಹಿನ್ಯಾಚಾ ರಜೆರ್ ಆಪ್ಲೊ ಪೂತ್ ಜೊನಿ ಕ್ರಿಸ್ಮಸಾಕ್ ಗಾಂವಾಕ್ ಯೆಂವ್ಚಾರ್ ಆಸಾ ದೆಕುನ್ ಎಸ್ತುಬಾಯ್ ಜಬರ್ ದಸ್ತ್ ತಯಾರಾಯೆರ್ ಪಡಲ್ಲಿ. ಮ್ಹಜೊ ಪೂತ್ ಯೆಂವ್ಚಾರ್ ಆಸಾ ಮ್ಹುಣ್ ಸರ್ವಾಂ ಲಾಗಿಂ ಸಾಂಗೊನ್ ಆಸಲ್ಲಿ. ಮ್ಹಜೆ ಖಾತಿರ್ ವರ್ಸ್ ಭರ್ ವಾವುರ್ನ್ ಥಕ್ಚೊ ಮ್ಹಜೊ ಪೂತ್ ಯೆತಾ ದೆಕುನ್ ತಾಕಾ ಖುಶ್ ಕರುಂಕ್ ತಿ ಪೆಚಾಡ್ತಾಲಿ. ಘರಾಚಿ ಬರಿ ನಿತಳಾಯ್ ಕರುನ್, ನಮುನ್ಯಾವಾರ್ ಕುಸ್ವಾರ್ ಆನಿಂ ಖಾಣಾಂ ತಯಾರ್ ಕರಿಜಾಯ್ , ಫೆಸ್ತಾಕ್ ಪುತಾಕ್ ರುಚಿಚೆಂ ಜೆವಾಣ್ ತಯಾರ್ ಕರಿಜಾಯ್ ಮ್ಹುಣ್ ತಿ ಚಿಂತುನ್ ಆಸಲ್ಲಿ. ಓಟ್ಟಾರೆ ಆಪ್ಲ್ಯಾ ಪುತಾಕ್ ಸಂತೊಸ್ಭರಿತ್ ಕರ್ಚಿ ತಿಚಿ ಆಶಾ ಜಾವ್ನಾಸಲ್ಲಿ.
ನತಾಲಾಂ-ಫೆಸ್ತ್ ಜೆಜುಚಾ ಜಲ್ಮಾಚೆ ಫೆಸ್ತ್. ಆಮಿ ಆತಾಂ ಕ್ರಿಸ್ತ್ ಯೆಣ್ಯಾಚಾ ಕಾಳಾರ್ ಆಸಾಂವ್. ಹ್ಯಾ ಕಾಳಾಕ್ ಆದ್ವೆಂತ್ ಮ್ಹುಣ್ತಾಂವ್. ಜಶೆಂ ಜೊನಿಚಾ ಯೆಣ್ಯಾಖಾತಿರ್ ತಾಚಿ ಆವಯ್ ತಯಾರಾಯೆರ್ ಪಡಲ್ಲಿ. ಆಮ್ಚಾ ಮೊಗಾಚಾ ಜೆಜು ಖಾತಿರ್ ಆಮಿಯಿ ಹ್ಯಾ ವೆಳಾರ್ ತಯಾರಾಕ್ ಕರುಂಕ್ ಫಾವೊ.
ನತಾಲಾಂ ಪರ್ಬೆಚಾ ಚಾರ್ ಆಯ್ತಾರಾಂ ಪಯ್ಲೆಂ ಥಾವ್ನ್ ನತಾಲಾಂ ಫೆಸ್ತಾಚಾ ಆದ್ಲ್ಯಾ ಸಾಂಜೆ ಪರ್ಯಾಂತ್ಲ್ಯಾ ಕಾಳಾಕ್ ಆಮಿಂ ಆದ್ವೆಂತ್ ಮ್ಹಣ್ತಾಂವ್. ಆದ್ವೆಂತ್ ಮ್ಹುಳ್ಯಾರ್ ’ಯೆಣೆಂ’ ಯಾ ’ಯೆಂವ್ಚೆಂ’ ಮ್ಹುಳ್ಳೊ ಅರ್ಥ್. ’ಸಂಸಾರಾಕ್ ಜೆಜುಚೆಂ ಯೆಣೆಂ’ ಮ್ಹುಣ್ ಸಮ್ಜೊಂಚೆ.
ಆದ್ವೆಂತ್ ಕಾಳಾಚೊ ಆರಂಭ್ ಕಥೊಲಿಕ್ ಇಗರ್ಜ್ ಮಾತೆಚಾ ಲಿತುರ್ಜಿಕ್ ವರ್ಸಾಚಿ ಸುರ್ವಾತ್ ಯಿ ಜಾವ್ನಾಸಾ. ಹೊ ಕಾಳ್ ಸಾಧಾರಣ್ ಜಾವ್ನ್ ನವೆಂಬರ್ 27 ಥಾವ್ನ್ ಡಿಸೆಂಬರ್ 3 ತಾರಿಕೆ ಮಧೆಂ ಪಡ್ತಾಂ. ಆದ್ವೆಂತಾಚಾ ಚಾರ್ ಆಯ್ತಾರಾಂ ಮಧೆಂ ತಿಸ್ರೊ ಆಯ್ತಾರ್ ಉಲ್ಲಾಸ್ ಪಾಂವ್ಚೊ ದೀಸ್ ಜಾವ್ನ್ ಆಮಿ ಆಚರ್ಸಿತಾಂವ್.
ಆದ್ವೆಂತಾಚೊ ಕಾಳ್ ಆರಂಭ್ ಜಾಲೊ. ದೆವಾಚೊ ಪೂತ್, ಸರ್ಗಾ ಸಂಸಾರಾಚೊ ರಾಯ್, ಶಾಂತಿ-ಕುಂವರ್ ಖಾಲ್ತೊ ಜಾವ್ನ್ ಖಾವ್ಣೆರ್ ಜಲ್ಮ್ ಘೆತಾಂ ಶಾಂತೆಚೊ, ಮಾಯಾಮೊಗಾಚೊ, ಭಾವ್ ಭಾಂದವ್ಪಣಾಚೊ ಸಂದೇಶ್ ಹಾಡುನ್ ಮಜೆಂ ಪಾಸತ್ ಆನಿಂ ತುಜೆ ಪಾಸತ್ ಸಂಸಾರಾಕ್ ಯೆತಾಂ ತರ್ ಆಮ್ಚಾ ಕಾಳ್ಜಾಂತ್ ವರ್ತಿ ಧಾದೊಸ್ಕಾಯ್ ಆಸೊಂಕ್ ಜಾಯ್. ಎಸ್ತುಬಾಯೆಕ್ ಆಪ್ಲೊ ಮೊಗಾಳ್ ಪೂತ್ ಯೆಂವ್ಚಾ ಘಡಿಯೆಕ್ ಆಸಲ್ಲಿ ತಿ ಅತುರಾಯ್, ತೊ ಸಂತೊಸ್ ಆಮ್ಕಾಂ ಆಸಾಜಾಯ್ ಆನಿ ತಿ ತಯಾರಿ ಆಮಿಯಿ ಕರುಂಕ್ ಫಾವೊ. ತಿಣೆಂ ಘರ್ ನಿತಳಾಯ್ ಕೆಲ್ಲ್ಯಾಪರಿ ಆಮಿಂ ಕುಡಿ-ಅತ್ಯಾಚಿ ನಿತಳಾಯ್ ಆಮ್ಚಾ ಜೆಜುಚಾ ಯೆಣ್ಯಾವೆಳಾರ್ ಕರುಂಕ್ ಜಾಯ್, ಏಕ್ ಸುಟಾವೆಂ ಕುಮ್ಸಾರ್, ಆತ್ಮೀಕ್ ಅವಲೋಕನ್ ಖಂಡಿತ್ ಗರ್ಜೆಚೆಂ. ಕಷ್ಟಾತೆಲ್ಯಾಂಕ್ ಭುಜಾವಣ್, ದಣ್ಸಾತೆಲ್ಯಾಂಕ್ ಸವ್ಕಸಾಯ್, ಅನೀತ್ ಆನಿ ನಿಂದಾ ಭೊಗ್ತೆಲ್ಯಾಂಕ್ ನೀತ್ ದೀಂವ್ಕ್ ಆನಿಂ ಭುಜಂವ್ಕ್ ಯೆಂವ್ಚಾ ಜೆಜುಕ್ ಆಮಿಂ ಮೊಗಾನ್ ಸ್ವೀಕರ್ಸಿತಾಂವ್ ತರ್ ತಾಣೆಂ ಶಿಕಯ್ಲೆಲಿ ತತ್ವಾಂ ಪಾಳುನ್, ಆಮ್ಚೊ ಸ್ವಾರ್ಥ್ ಸಾಂಡುನ್ ಆಮ್ಚಿ ಸಂಸಾರಿ ಗ್ರೇಸ್ತ್ ಕಾಯ್ ಆನಿ ದೆಣಿಂ ಆಮಿಂ ಗರ್ಜೆವಂತಾ ಥಂಯ್ ವಾಂಟುನ್ ಘೆಂವ್ಕ್ ಫಾವೊ. ತೆದಾಳಾ ಜೆಜುಕ್ ಖರೊ ಸಂತೊಸ್ ಜಾತಲೊ.
ಹ್ಯಾ ಕ್ರಿಸ್ಮಸಾಕ್ ಆಮ್ಕಾಂ ಲೆಖಾವರ್ತೊ ಭಾಯ್ಲೊ ಆಡಂಬರ್ ನಾಕಾ, ಬದ್ಲಾಕ್ ಗರ್ಜೆವಂತಾಚಾ ಗರ್ಜಾಂಕ್ ಪಾಂವ್ಯಾಂ. ಆಮ್ಚಾ ಘರಾಂತ್ ಆಸ್ಲೆಲ್ಯಾ ಆಮ್ಚಾ ಪ್ರಾಯೆಸ್ತ್ ಆವಯ್-ಬಾಪಾಯ್ಚಿ, ವ್ಹಡಿಲಾಂಚಿ ಮೊಗಾನ್ ಜತನ್ ಘೆಂವ್ಚೊ ನಿರ್ಧಾರ್ ಕರ್ಯಾಂ, ಆಮ್ಚಾ ಜಿಣಿಯೆ ಸಾಂಗಾತ್ಯಾ ಸಂಗಿ, ಕುಟ್ಮಾದಾರಾಂ , ಸೆಜಾರಾಂ, ವಾಡ್ಯಾಗಾರಾಂ ಆನಿ ಸಮಾಜೆ ಸಂಗಿ ಮೊಗಾ-ವಿಶ್ವಾಸಾನ್ ಜಿಯೆಂವ್ಯಾಂ ಆಮ್ಚೆಂ ಬರೆಪಣ್ ವಾಂಟುನ್ ಘೆವ್ನ್ ಮೊಗಾಚೊ ಸಂಬಂಧ್ ರುತಾಂ ಕರ್ಯಾಂ. ಅಶೆಂ ಆಮ್ಚೊ ಸಂತೊಸ್ ವಾಡತ್ತ್ ವಚೊಂದಿ. ಆಮ್ಚೊ ಕಥೊಲಿಕ್ ಭಾವಾರ್ಥ್ ನಾಟಕೀಯ್ ರುಪಾಚೊ ಜಾಯ್ನಾಸ್ತಾ, ಆಮಿಂ ಭಾಯ್ಲ್ಯಾ ದೆಖಿಕ್ ಸಂದರ್ಭಾಕ್ ಅನುಸಾರ್ ಜಾವ್ನ್ occasional ಕ್ರಿಸ್ತಾಂವ್ ಜಾಂವ್ಚೆಂ ನಾಕಾ ಬಗಾರ್ ಬರ್ಯಾ ಜಿಣಿಯೆಚಾ ದೆಖಿನ್ ಕಾರ್ಯಾಳ್ ಜಾವ್ನ್ functional ಕ್ರಿಸ್ತಾಂವ್ ಜಾಂವ್ಯಾಂ. ಸದಾಂಚ್ ಹೆರಾಂಚಾ ದೊಳ್ಯಾಂತ್ಲಿ ದುಖಾಂ ಪುಸುನ್ ಭರ್ವಸ್ಯಾಚೊ ಹಾಸೊ ಹಾಡುಂಕ್ ಪ್ರಯತನ್ ಕರ್ಯಾಂ, ಅಶೆಂ ಕೆಲ್ಲ್ಯಾವರ್ವಿಂ ಖಂಡಿತ್ ಜಾವ್ನ್ ಆಮ್ಚಾ ದುರ್ಬಳ್ಯಾ ಕಾಳ್ಜಾಚಾ ಖಾವ್ಣೆರ್ ಜೆಜು ಕೇವಲ್ ನತಾಲಾಂ ಫೆಸ್ತಾಂ ದಿಸಾ ನೈಂ ಬಗಾರ್ ಸದಾಂಚ್ ಜಲ್ಮೊನ್ ಯೆತಲೊ ಆನಿ ಜಿಣಿಯೆಂತ್ ಧಾದೊಸ್ಕಾಯ್ ಹಾಡ್ತಲೊ.
’ದಿನು’, ಬಿಯಾರ್